Titiraki Mairouia Taani Wareware
E aera bwa a riai Kristian n taratara raoi ni kaineti ma kamanenaani burokuraem ake n te intanete ngkana a na kanakoi ao ni karekei rongorongo?
Tabeman Kristian a kabonganai kukune aika boou ibukin reitakia ma aia utu ao tariia n te onimaki. Ma e riai te Kristian ae ikawai n te onimaki n ururinga te reirei ni kairiri aei: “E nora te kabuanibwai te aomata ae ataibwai ao e karabaa,ma e teimatoa ane e roo nanona ni waaki nako iai ao e rotakibuaka ni mwina.”—TaeRab. 27:12.
Ti ataia ae e tangiria Iehova ni kamanoira. Ngaia are ti aki riai ni kairekerekeira ma aomata aika kauekea te iraraure, aika a a tia ni kabaneaki, ke ake a kabwaouai ana reirei te Baibara. (IRom 16:17; 1Kor. 5:11; 2Ioa. 10, 11) A kona taari tabeman ke tabeman ake a rereitaki ma taari n te ekaretia n aki karinei tuua ake n te Baibara. (2Tim. 2:20, 21) Ngkana ti na rineiia raoraora, ti na ururinga aei. E kona n aki bebete rineakia raoraora aika raraoi rinanon te bwai n reitaki n te intanete.
E kakawaki rinorinoaia raoraora n te intanete, riki ngkana ti kaaina te kurubu ae a rawata kaaina. A kona tabeman Kristian ni kaaina te kurubu anne, ma iai mwina ae buakaka nakoia. E na kangaa te tari te mwaane ke te tari te aine temanna ni bwaina te iangoraoi ngkana e kaaina te kurubu ae nakoni bubua ma bubua ke nga ma nga kaaina? E na aki kona n atai raoi taekaia nakanne ao tera aroni marurungia n aia onimaki. E taekinaki ae kangai n Taian Areru 26:4: “I aki iraorao ma aomata aika mwamwanaa te aba, ao I rarawa nakoia te koraki aika karabai aroia.” E nanonaki n anne kabonganaan te intanete ni kanakoan ao karekean te rongorongo tii nakoia naake ko bon rangi ni kinaia?
E ngae naba ngke te kurubu ae karako mwaitiia kaaina, ma e riai te Kristian ni bairea tianakin ana tai ao irekerekena ma koraki akanne. Ti aki riai n iangoia bwa ti na kaekai aia rongorongo, n aki ongeia bwa tera ae a taekinna ke ananaura aia maroro iai. E anga te kauring Bauro nakon Timoteo ibukia naake a kona n riki bwa “taani winnanti . . . ao taan reberake n roko n tabeia aomata.” (1Tim. 5:13) E kona naba n riki aei ni boong aikai rinanon te intanete.
Akea te Kristian ae ikawai n te onimaki ae e na taekin ke n ongoraei taeka ni kabuakaka ke rongorongo aika aki riai n taekinaki ibukia taani Kakoaua ake tabeman. (TaiAre. 15:3; TaeRab. 20:19) Ao e riai n aki kakoauai rongorongo aika karioaki ke akea koauaia. (IEbe. 4:25) Ti boni karerekei kaongora ni katoa namwakaina man ara atureti n te intanete ao man Ara Kanakobwanaa ae JW® ibukini marikera n taamnei ao rongorongo aika boou mani kona n onimakinaki.
Iai tabeman taani Kakoaua aika kabonganai taian app ibukin te maroro n te intanete ni kaboonakoi bwaai iai, ni boobwai, ao ni katanoatai bwaai tabeua ke ni kakaaeia aika a kani mwakuri. Boni bwaai ibukin te bitineti baikai, ao akea irekerekeia ma taromaurian Iehova. Kristian ake a tangira te aro ae “akea te bakimwane iai” a rawa nakoni kaririaia n aron aikai ni kabonganaia iai taari ibukin te bitineti.—Ebera 13:5.
Ma tera aroni kabonganaani burokuraem n te intanete ibukini karekean te mwane nakoia taari ake a kainnano ke a rotaki imwin te kabuanibwai ae karina? Ti aki toki ni kaotiota te tangira i marenara n tatabemanira nako man arora n ibuobuoki ao n ikaungaunga. (Iak. 2:15, 16) Ma kataakini karaoan anne rinanon te kurubu ae a rangi ni bati kaaina, e kona ni kauntabai ana babaire aika tamaroa riki te aobiti n tararua ke unimwaanen te ekaretia. (1Tim. 5:3, 4, 9, 10, 16) Ao ni koauana, ti aki tangiriia aomata bwa a na iangoia ae ti a tia n rineaki n te aro ae okoro ibukin tararuaiia tarira n te onimaki.
Ti boni kani karaoai bwaai ake e na neboaki iai te Atua. (1Kor. 10:31) Ngaia are ngkana ko kabongana te intanete ke bwaai ni kukune riki tabeua ni kanakoi ke ni karekei rongorongo, iangoi moa kangaanga aika kona riki ao bwaina te iangoraoi.