Boutokaa Ara Mataniwi ae Iesu

1. Tera ae e tangiria Iehova ni boong aikai?

NI BOONG aikai, e tangiria te Atua bwa e na tataekinaki te rongorongo ae raoiroi ae taekan te Tautaeka n Uea ni kabutaa aonnaba. (Mareko 13:10; 1Tim. 2:3, 4) Aio bon ana mwakuri Iehova ae rangi ni kakawaki, ao e a tia n rinea Natina bwa e na kaira te mwakuri aei. Ti kakoauaa bwa i aan ana kairiri Iesu, e na bobonga raoi te mwakuri ni minita n aron nanon Iehova imwain rokon te toki.—Mat. 24:14.

2. Tera ae ti na maroroakinna n te kaongora aei?

² N te kaongora aei, ti na nora iai aron Iesu ni kamanena te “toro ae kakaonimaki ma ni wanawana” ibukini katauraoan amwarake n taamnei ao baireaia taan rimwina nakon te uarongorongo ae rianako ae tuai n noraki mai mwaina. (Mat. 24:45) Ti na nora naba arora n tatabemanira nako ni boutokaa Iesu ao te toro ae kakaonimaki.

E KAIRIRI IESUN TE MWAKURI NI MINITA

3. Tera te mwaaka ni kairiri are e a tia n anganaki Iesu?

³ E tabe ngkai Iesu ni kaira te mwakuri ni minita. Ti na kangaa ni kakoauaa anne? Imwain nakona nako karawa, e botaki ma taan rimwina aika bati n te maunga are i Kariraia. E taku nakoia: “I a tia n anganaki te mwiokoaki i aoni bwaai ni kabane i karawa ao i aonnaba.” Iangoa ana taeka ae imwina: “Mangaia are naako, reireinia aomata mai buakoia botannaomata nako.” (Mat. 28:18, 19) Nanona bwa e a tia Iesu n anganaki te mwaaka ni kairiri i aon te mwakuri ni minita, irarikin riki ake tabeua.

4. E aera ngkai ti kakoauaa ae e boni kaira te uarongorongo Iesu ngkai?

⁴ E taekinna Iesu bwa e na karaoaki te uarongorongo ao te mwakuri ibukini karekeaia taan rimwini Kristo nakoia “botannaomata ni kabane,” ao e na memena i rarikia taan rimwina “ni boong ni kabane ni karokoa tain tokin te waaki ae ngkai i aon te aba.” (Mat. 28:20) A kaotaki n taeka akanne bwa e teimatoa Iesu n tararuaa ara mwakuri n uarongorongo ni karokoa ara bong aikai.

5. Tera tabera ni kaineti ma kakororaoan Taian Areru 110:3?

⁵ E aki raraoma Iesu ngkana e a karako mwaitiia taani mwakuri n tain tokin te waaki ae ngkai. E ataia ae e na boni koro bukin ana taetae ni burabeti te tia areru ae kangai: “A na kukurei am aomata n anga ngaiia n te bong are ko kaira iai am taanga ni buaka nakon te buaka.” (TaiAre. 110:3) Ngkana ko uataboa te mwakuri ni minita, ko a boutokaa iai Iesu ma te toro ae kakaonimaki ao ni buoka kakororaoan te taetae ni burabeti anne. E teimatoa ni waaki te mwakuri ma bon iai naba kangaanga.

6. Tera te kangaanga teuana ae a rinanona ngkai taan tataekina te Tautaeka n Uea?

⁶ Te kangaanga teuana ae a rinanona taan tataekina te Tautaeka n Uea bon te kakaaitara. A uaraoa ara mwakuri nakoia aomata taan tannako man te koaua, mataniwi n Aaro ao taan tautaeka. Ngkana a kairaraangaki n te rongorongo aei ara koraki, raoraora, ao raora ni mwakuri, a kona ngkanne ni kairoroira bwa ti na katoka ara beku ibukin Iehova ao ara uarongorongo. N aaba tabeua, a kona ni kaaitaraira tabeman n aroia ni kakamaakuira ni katikira ao ni karabuutinira. Ti aki mimi n anne. E a kamani kangai Iesu: “Ane kam na riribaaki irouia natannaomata ni kabane ibukin arau.” (Mat. 24:9) E oti man ribaakira bwa e tangirira Iehova. (Mat. 5:11, 12) Bon te Riaboro nibwani kaitaraakira, ma e mwaaka riki Iesu. Ti boni kona ni karokoa te rongorongo ae raoiroi nakoia natannaomata nako man ana boutoka Iesu. Iangoa te bwai ni kakoaua aei.

7. Tera te bwai ni kakoaua teuana ae ko noria n Te Kaotioti 14:6, 7 ae e a kakoroaki bukina?

⁷ Ngkai taan tataekina te Tautaeka n Uea ngaira, ti a kaaitara naba ma te kangaanga ni kaineti ma kakaokoron te taetae. N te kaotioti are e anganaki te abotoro Ioane iroun Iesu, ao e a kaman taekinna Iesu bwa e na boni waakinako te mwakuri ni minita n aki ongea te bwai n tutuki anne. (Wareka Te Kaotioti 14:6, 7.) N te aro raa? Ti kataia n angania aomata aika bati aia tai ni butimwaea te rongorongo ibukin te Tautaeka n Uea. A a kona ngkai aomata ni kabutaa te aonnaba ni wareki kaongora aika boto man te Baibara n ara atureti ae te jw.org, ibukina bwa a a tia ni katauraoaki kaongora aikai n taetae aika 1,000 tabun! E kariaia te Rabwata n Tautaeka rairan ara bwai ni mwakuri ibukini karekeaia taan rimwini Kristo ae te boki ae Ko Kona ni Kukurei n Aki Toki! n taetae aika 700 tabun! A tauraoi naba amwarake n taamnei rinanon taamnei aika raweaki ibukia bonotaninga ao te braille ibukia mataki. Ti a bon nora iai kakororaoan taetae ni burabeti n te Baibara. Ao aomata “man aia taetae ni kabane natannaomata,” a a reiakina “te taetae ae itiaki,” ae ana koaua te Baibara, (Tek. 8:23; Teb. 3:9) A bobonga baikai man ana kairiri Iesu Kristo.

8. Tera mwin ara uarongorongo ae ti a noria ngkai?

⁸ Ni boong aikai, ao aomata aika 8,000,000 tabun n aaba aika 240 a a riki bwa kaain ana botaki Iehova, ao tatabebwi tenga a bwabetitoaki ni katoa ririki! Ma ae kakawaki riki nakon anne, bon te aroaro ni Kristian ae a karikirakea taan rimwin Iesu aika boou ae taekan “te aroaro ae boou.” (IKoro. 3:8-10) A bati aika a katoka aroaroia ae kammaira, te iowawa, te inanonano ao te nanonnaba. E a kakororaoaki Itaia 2:4 bwa a “aki naba manga reireinia te buaka.” Ngkana ti kakorakoraira ni karina i aora te aroaro ae boou, ti a buokiia iai aomata ni katikia nakon Ana botaki Iehova ao ti kaotira naba bwa ti irira raoi ara tia kairiri are Kristo Iesu. (Ioa. 13:35; 1Bet. 2:12) A aki manennanti n riki baikai. E bon anganira Iesu te ibuobuoki ae ti kainnanoia.

E RINEAKI TE TORO IROUN IESU

9. Tera ae e a kaman taekinaki ni kaineti ma te toki? (Mataio 24:45-47)

⁹ Wareka Mataio 24:45-47. E a kaman taekinna Iesu bwa n tain te toki, ao e na mwiokoa “te toro ae kakaonimaki ma ni wanawana” bwa e na katauraoi amwarake n taamnei. Ngaia are ti kantaningaa te toro anne bwa e na mwakuri korakora n ara bong aikai. Bon anne te bwai ae riki. E rinea Iesu te kurubu ae karako mwaitiia aika mwaane aika kabiraki, bwa a na katauraoi kanaia n taamnei ana aomata te Atua ma naake a kan ongora “n te tai ae riai.” A aki iangoia mwaane aikai bwa a na ueana aia onimaki aomata. (2Kor. 1:24) Ma a ataia bwa bon tii Iesu Kristo ae “te tia kairiri ao te mataniwi” i aoia ana aomata.—Ita. 55:4.

10. Te boki raa ane kaotaki n te taamnei, ae e anaa nanom bwa ko na nakonako n te kawai ae tiki nakon te maiu ae aki toki?

¹⁰ E a tia te toro ae kakaonimaki ni katauraoi booki aika bati man 1919, ao a a kona iai aomata aika raoiroi nanoia, ni moani katoong amwarake n taamnei aika kamarurungia. N 1921, e katauraoaki te boki ae The Harp of God ibukini buokaia aika raoiroi nanoia n reiakini moan reirei man te Baibara. Imwina riki, ai manga booki riki tabeua. Te boki raa ae buokiko ni kinaa ao n tangira Tamara are i karawa? Te boki ae “Let God Be True,” The Truth That Leads to Eternal Life, Ko Kona ni Maiu n Aki Toki n te Baretaiti i Aon te Aonnaba, Knowledge That Leads to Everlasting Life, Tera Ana Reirei ni Koaua te Baibara, Tera Reireiara man te Baibara?, ke ara boki ae boou ae Ko Kona ni Kukurei n Aki Toki! A katauraoaki booki aikai ibukini buokara ni karekeia taan rimwini Kristo, ao a boni kainnanoaki raoi n taai ake a boreetiaki iai.

11. E aera bwa e kakawaki reiakinan riki taekan Iehova ao te Baibara?

¹¹ Tiaki tii aomata aika a tibwa kan ongora aika a kainnanoa te reirei ae nano ibukin Iehova ao te Baibara, ma boni ngaira ni kabane. E taku te abotoro Bauro: “Te amwarake ae matoatoa boni kanaia aomata aika ikawai.” E taekinna naba bwa maiuakinan reireiara akanne, ti na buokaki iai n “ataa ae eti ao ae kairua.” (Ebera 5:14) E kona ni kangaanga karaoan anne ngkai, ibukina bwa a bati aomata aika a maiuakina te aroaro ae buakaka. Ma e taraia raoi Iesu bwa ti na reiakini baika ti kainnanoi ibukini kakorakoraakin ara onimaki. Ao nibwan te amwarake aei bon Ana Taeka te Atua ae te Baibara. E katauraoi amwarake aikai te toro ae kakaonimaki ao e tibwatibwai i aan ana kairiri Iesu.

12. Ti na kangaa n neboa aran te Atua n aron Iesu?

¹² Ti a tia n neboa aran te Atua ae te bwai ae riai n anganaki, n aron Iesu. (Ioa. 17:6, 26) N te katoto, n 1931 ti ingoanaki n arara man te Baibara ae Ana Tia Kakoaua Iehova, ao ti kani kinaaki naba irouia aomata man te ara anne. (Ita. 43:10-12) Ao man Okitobwa n te ririki anne, e a kaoti aran te Atua ni moan ara maekatin ni kabane. Irarikin naba anne, e a tia Te Baibara ae Tabu—Te Rairai ae te Aonnaba ae Boou ni kaoka aran te Atua nakon are bon nnena n te Baibara. Ai kaokorora anne ma Aaro ake aongkoa Kristian ngaiia ake a kanakoa aran te Atua n aia rairai ni Baibara aika bati!

E BAIREIIA RAOI IESU TAAN RIMWINA

13. Ko kangaa ni kakoauaa ae e kamanena “te toro ae kakaonimaki ma ni wanawana” Iesu ni boong aikai? (Ioane 6:68)

¹³ Rinanon “te toro ae kakaonimaki ma ni wanawana” ao Iesu e katea te botaki ae rianako n te aonnaba ae e na boutokaa te taromauri ae itiaki. Tera am namakin ibukin te botaki aei? Tao ni kaekaana, ko bae n iangoa ana taeka te abotoro Betero are e kangai nakon Iesu: “Ti na nakon antai? A mena iroum taeka aika kairiri nakon te maiu are aki toki.” (Ioane 6:68) Ti na mena ia n te bong aei ngke arona bwa ti aki reitaki ma ana botaki Iehova? Rinanon te botaki aei, ao e taraia raoi Kristo bwa ti na nuai n te aro n taamnei. E kataneiaira naba bwa ti aonga ni karaoa ara mwakuri n te aro ae uaana. E buokira ni karina “te aroaro ae boou,” i aora bwa ti aonga ni kona ni kakukureia Iehova.—IEbe. 4:24.

14. Tera kabwaiam ngkai ko mena n ana botaki Iehova n taini butinakon te COVID-19?

¹⁴ E katauraoi kaetieti Iesu n taai ni karawawata. A rangi n otara kakabwaia mani kaetieti akanne ni butinakon te COVID-19. A bati kaain te aonnaba aei aika a aikoa ataa te bwai ae a na karaoia. Ma e taraia raoi Iesu bwa a na reke iroura ana kairiri ae mataata ibukin arora ni kawakinira. Ti kaungaaki bwa ti na rabuna ubura ngkana ti mena n taabo ake a mwaiti iai aomata, ao n taua naba raroara. A kauringaki unimwaane bwa a na teimatoa n reitaki ma kaain te ekaretia ni kabane ao n atai naba baike a kainnanoi ibukini maiuia ao n ikotaki ma bwaai n taamnei. (Ita. 32:1, 2) Ti karekei naba kaetieti ao kaungaunga rinanon ana kaongora te Rabwata n Tautaeka.

15. Baikara kaetieti ibukini karaoani bobotaki n taromauri ao te uarongorongo n taini butinakon te aoraki, ao tera mwina?

¹⁵ Ti karekei naba kaetieti aika mataata ibukin arora ni bobotaki n taromauri n te ekaretia ao n te mwakuri ni minita. N te tai ae waekoa, ti a boni karaoi naba ara botaki ni Kristian, ruunga ao bwabwaro rinanon taian taamnei n te intanete. Ti bane naba ni moana ara uarongorongo rinanon te reta ao te tareboon. E boni kakabwaiai Iehova ara kakorakora. E ribootinaki man taian aobiti n tararua bwa e a rikirake mwaitiia taan uarongorongo. Ni koauana, a bati aika iai rongorongoia aika kaungaunga n taai aikai.—Nora naba te bwaoki ae “E Kakabwaiaa Ara Uarongorongo Iehova.”

16. Tera ae ti kona ni kakoauaa?

¹⁶ A bae n iangoia tabeman bwa e a manga rangi n riao raraomaia kaain te botaki ni kaineti ma butinakon te aoraki. Ma imwin tabeua te tai ao a a manga noria bwa ngaia a bon rangi ni manena kaetieti akanne. (Mat. 11:19) Ao ngkana ti iaiangoa aron Iesu ae tatangira ni kairiia ana aomata, ti a kakoauaa iai bwa n aki ongeia bwa tera ae na riki n taai aika i mwaira, ma e na bon teimatoa Iehova ma Natina ni memena i rarikira.—Wareka Ebera 13:5, 6.

17. Tera am namakin ngkai ko mwakuri i aan ana kairiri Iesu?

¹⁷ Ai kakabwaiaakira ngaira ngkai ti mwakuri i aan ana tararua Iesu! Ti boni kaaina te botaki ae katiteuanaaki n aki ongea kaokoron te katei, te aba ao te taetae. Ti kanuaaki raoi n amwarake n taamnei ao ti taubobonga raoi n ara bwai ni mwakuri ibukin te uarongorongo. Ti reireinaki naba n tatabemanira nako bwa ti na karina te aroaro ae boou i aora. Ti kauringaki naba arora n itangitangiri i marenara. Ti bon riai ni kakatonga ngkai ti mena i aan ana kairiri Iesu.