1 | Te Tataro—“Kabanei Ami Iango n Raraoma ni Kaaki i Aona”

TE BAE TAEKINAKI N TE BAIBARA: “Kabanei ami iango n raraoma ni kaaki i [aon te Atua], ibukina bwa e mumutiakiningkami.”—1 BETERO 5:7.

Ae Nanonaki Iai

E kaoira Iehova ae te Atua bwa ti na bunrii rawawatara nako ake ti tabeaianga iai. (Taian Areru 55:22) Ti kona n tataroi ara kangaanga n aki ongea buburana ke uarerekena. Ngkana e kakawaki iroura anne, e na kakawaki naba iroun Iehova. Te tataro nakoina, bon te mwaneka ae kakawaki are ti kona ni karekea iai raun ara iango.—I-Biribi 4:6, 7.

Aroni Buokara n Aei

Ngkana ti kabokorakora ma aorakin ara iango, ti bae n namakinna ae ai bon tii ngaira. A aki ota raoi aomata n te bwai ae ti rinanona n taai nako. (Taeka N Rabakau 14:10) Ma ngkana ti karaua raoi n taekina ara namakin nakon te Atua rinanon te tataro, e tauraoi n taai nako n ongo iroura ao n ota naba. E norira Iehova, e atai marakira, ara kabokorakora, ao e tangirira bwa ti na tataro nakoina ibukin tabeaiangara.—2 Rongorongo 6:29, 30.

Te maroro nakon Iehova rinanon te tataro, e a kakorakora riki iai onimakinan ae e bon tabeakinira. Ti kona n namakina are e namakinna naba te tia areru ngke e tataro ni kangai: “Ko a tia n nora karawawataau, ao ko mutiakina rawawatau ae korakora.” (Taian Areru 31:7) N ataakin ae e nora Iehova te bwai ae ti rinanona, ti a kona ni buokaki riki iai bwa ti na teimatoa n aki kabwarai nanora n taai ni kangaanga. Ma e bati riki ae e karaoia nakon tii noran rawawatara. Bon tii ngaia ao akea riki ae e ota n te bae ti rinanona, ao e buokira bwa ti na karekea kabebeteara ao raun nanora man te Baibara.

Aron te Baibara n Ibuobuoki Julian

Aron Rotakiu n te Raraoma

“I kabokorakora ma te raraoma ao aorakin te iango teuana ae te OCD. I rotaki n te raraoma n taai naba aika aki kantaningaaki. E kona n nakoraoi arou n te tai teuana ao I kona ni manga raraoma imwina riki n akea bukina. I raraoma riki ngkana I mena i buakoia aomata. I iaiangoia bwa tera aia iango ibukiu.

“A bon rangi ni boutokaai naake a ataa au kangaanga. Ni koauana, n tabetai te bwai are a taekinna bon tiaki te bwai ae I kantaningaia bwa N na ongo. Ma I kakaitau n aroia ni buokai.

“N tabetai e a kangaanga irou bwa N na tataro ibukin aorakiu akanne. I kona n iaiangoia bwa tera arou ni kaatuua au iango ao ni maroro nakon Iehova n te tataro. I kona ni waekoa n iangoa te bwai teuana, ao I a manga iangoa te bwai riki teuana, n te aro are n tabetai I aki ataia bwa e nga iai ae N na karaoia. Ngkana I a aki kona n taobarai au iango, e a kangaanga kabwarabwaraan au iango ao au namakin nakon Iehova.”

Aron te Baibara ni Buokai

“I a tia n reiakinna man te Baibara bwa a aki riai n abwabwaki tataro ke ni beberinoaki taekaia ao n tibwa butimwaeaki iroun te Atua. N tabetai ngkana I a aikoa kona n taekin raoi baike I namakin, I a tii tataro naba ni kangai: ‘Iehova, taiaoka buokai.’ E ngae n anne, I kona ni kakoauaa bwa e bon ota irou Iehova ao e kaekaa kainnanou n te tai anne. I aki tii tataro ma I kakaaea naba buokau n te onnaoraki. I kukurei n taekinna bwa I kakaitau n taian ibuobuoki aikai, bwa e a nakoraoi riki ngkai au kangaanga. E boni materaoi au kakorakora ni butiia Tamau are i karawa ana ibuobuoki, ao n nora arona n tangirai ao ni boutokaai.”