2 | “Te Kabebeteaki Man te Koroboki ae Tabu”

TE BAE TAEKINAKI N TE BAIBARA: “Bwaai ni kabane ake a koreaki ngkoa, a koreaki ibukin reireiara, bwa ti aonga ni karekea te kantaninga rinanon nanomwaakara, ao rinanon te kabebeteaki man te Koroboki ae Tabu.”—I-ROM 15:4.

Ae Nanonaki Iai

Iai n te Baibara iango aika kabebetenano ake a kona n anganira te korakora ao te nanomwaaka ake a na kona ni buokira ngkana ti iaiango n te aro ae aki raoiroi. Bon te Baibara ae anganira naba te kantaninga, ae n te tai ae waekoa ao ti nang aki manga rinanon rawawatan te iango ao te namakin.

Aroni Buokara n Aei

Ti bane n namakina te aki kukurei ao te rawawatannano n taai tabetai, ma naake a rotakibuaka man te rawawata ke te raraoma, a kona n rinanon te maraki n taai nako. Ti na kangaa ni buokaki n te Baibara?

Iai n te Baibara iango aika bati aika tamaroa ake a kona n onei mwin iango aika aki raoiroi. (I-Biribi 4:8) A kona ni kaonaki ara iango ni baika kabebetenano ao ni karaunano ake a na buokira ni kanakoraoi ara namakin.—Taian Areru 94:18, 19.
E kona ni buokira te Baibara bwa ti na katoka iaiangoan ae akea bongara.—Ruka 12:6, 7.
A bati kiibu n te Baibara aika ti aki nanokokoraki iai bwa ti aki tiku n tii ngaira ao te Atua ae ara tia Karikiriki, e bon atai raoi ara namakin.—Taian Areru 34:18; 1 Ioane 3:19, 20.
E beritanaki n te Baibara bwa te Atua e nang katoki baika ti ururingi aika kammaraki. (Itaia 65:17; Te Kaotioti 21:4) Ngkana ti taonakinako n iango ao namakin aika karawawata ke ni kakamaaku, ti kona n noria bwa te berita aei e anganira te korakora bwa ti na nanomwaaka.

Aron te Baibara n Ibuobuoki Jessica

Aron Rotakiu n te Rawawatannano

“Ngke 25 au ririki, ao I aki kona ni karaoi baike I kakaraoi ao I a tuangaki ae e a reke irou aorakin te iango ae te bwarannano ae korakora. I aki toki n iangoi ao n ururingi baika riki ni maiu rimoa aika kammaraki. A buokai ni kaotaai taokita bwa te rawawatannano are reke irou, iai irekerekena ma iaiangoani baika aki raoiroi ake I ururingi aika kammaraki ni maiuu. Irarikin te bwatin are I anganaki, I kainnanoa te taokita temanna ae e na buokai bwa I aonga n atai ao ni kaetii au iango aika aki raoiroi.”

Aron te Baibara ni Buokai

“N te tai are I taonaki iai n te rawawata, I namakina te tabeaianga ao te raraoma ae korakora ma te aki mamatu. N angiin te tairiki, I bon taonakinako n iango aika katabeaiangaai ake I aki kona ni kaaitarai. N aron ae taekinaki n Taian Areru 94:19, e kona te Atua ni kabebeteira ao ni karaui nanora ngkana ti taonakinako n te raraoma. Ngaia are I a kaaki au Baibara ao au boki ae uarereke ae kanoana kiibu aika kaungaunga i rarikiu n au kainiwene. Ngkana I a aki kona ni matu, I a wareki naba kiibu tabeua man te Baibara, ao ni kariaia ana iango te Atua bwa e na kabebeteai.

“E kaungaira te Baibara bwa ti na taobarai iango ake a kauntaba ma baike ti atai ibukin te Atua. N taai ake rimoa, I bon namakinna ae akea bongau ao I aki tangiraki. Ma I a ataia ae au iango aikai a boni kauntaba ma ana taeka te Baibara, are e kaotaki iai bwa te Atua bon te Karo ae tatangira, e nanoanga, ao e tabeakinira n tatabemanira nako. Teutana imwin teutana, I a bwaati ni kaetieta au iango, n oneani mwin are N na kariaia au iango bwa e na kairirai. I a rabakau naba n iangoai n aron iangoau iroun te Atua. Aio te mwaneka ae kakawaki are e buokai bwa N na urua au iango ae aki raoiroi i bon ibukiu.

“I kakariariaa te tai are a nangi bane ni kamaunaaki iai iango aika aki raoiroi ao ururingani baika kammaraki. Ataakin ae a nang akea aorakin te iango n aekana nako n taai aika imwaira, I a buokaki iai n nanomwaaka ngkai ao n ingainga nakon te tai ae na roko ike e nang toki iai au kabokorakora ma te rawawatannano.”