3 | Kakabwaia Mani Katoto Aika n te Baibara

E KABWARABWARAAKI N TE BAIBARA . . . Mwaane ao aine aika kakaonimaki aika a rinanon naba namakin “n ai arora.”—IAKOBO 5:17.

Ae Nanonaki Iai

Iai rongorongoia n te Baibara mwaane ao aine aika rinanon aeka n namakin nako. Ngkana ti wareka rongorongoia, ti bae n nora karakinan temanna n te Baibara, ae titeboo ara namakin ma ngaia.

Aroni Buokara n Aei

Ti tangiria bwa a na ota ake tabeman n ara namakin. E rangi ni koaua riki aei ngkana ti kabokorakora ma aorakin ara iango. Ngkana ti wareka te Baibara, ti kona n reiakina iai taekaia tabeman aika titeboo ara iango ao ara namakin ma ngaiia. Ibukin aei, ti a ataia ae iai aika rawawata naba n arora ao ai tiaki tii ngaira ni kaaitara ma te raraoma ao namakin aika aki raoiroi.

A koreaki n te Baibara aia namakin naake a bwarannano ao a rawawata. Ko a tia n nanamakina ae, ‘I a aki kani maiuu n arou aei’? A namakina naba anne Mote, Eria, ao Tawita.—Warekaia Iteraera 11:14; 1 Uea 19:4; Taian Areru 55:4.
E karakinaki n te Baibara rongorongon temanna te aine ae arana Anna, ae e “rangi ni korakora rawawatan” nanona ibukina bwa akea natina ao e teimatoa ni kakanikoaki iroun neiere te buu are temanna.—1 Tamuera 1:6, 10.
E karakinaki n te Baibara te mwaane temanna ae arana Iobi ae e na bae n titeboo arora ma ngaia. E ngae ngke te mwaane ae onimaki, ma e rinanon naba te rawawatannano ae korakora, ao e taekina naba ae kangai: “I ribaa maiuu, I aki kan teimatoa ni maiu.”—Iobi 7:16.

Man reiakinan rongorongoia naake a karakinaki n te Baibara aikai, ake a rabakau aroia ni kaaitarai iango aika aki raoiroi, ti kona naba ni karekea te korakora ae ti kainnanoia ibukini kaitaraan rawawatara.

Aron te Baibara n Ibuobuoki Kevin

Aron Rotakiu n Aorakin Naba te Iango ae te Bipolar Disorder

“I tuangaki iroun te taokita bwa e a reke irou te aoraki ae te bipolar disorder ngke I a kaania 50 au ririki. Iai taai ake I namakinna bwa I a rabakau arou ni kaaitarai kangaanga nako ni maiuu. Ma iai naba taai ake I namakinna bwa ai akea naba bonganan maiuu.”

Aron te Baibara ni Buokai

“Rongorongon temanna ae karakinaki n te Baibara ae e reke naba aei nakoina, bon te abotoro Betero. E karaoi kairua ake e a iangoia iai bwa akea uaana. Ma n oneani mwin are e na iaiangoa anne, e ukeriia raoraona aika tabeakinna. Ngkana e a roko korakoran aorakiu aio, I a kona n iaiangoi baike I aki kororaoi iai ao I a namakinna bwa ai akea uaau. N aroni Betero, I reiakinna ae I riai n teimatoa ni kaaniai ma raoraou ake a kani buokai bwa N na teimatoa ni waakinaanako maiuu.

“Temanna riki are karakinaki n te Baibara, ae I rangi ni kabebeteaki irouna, bon te Uea ae Tawita. E aki toki n namakina te rawawata n te baere e karaoia, ao e uringaaba n ana kairua ake rimoa. I kona ni kabotauai ma ngaia ibukina bwa n tabetai, I karaoi ke n taekini baike I a manga uringaaba iai. I kunei ana taeka ni kabebetenano Tawita ake n Taian Areru 51. Ni kibuna 3, ao e taekina aei Tawita: ‘I atai raoi au kairua, ao e teimatoa ni mena i matau au bure.’ E boni kabwarabwaraa raoi aei au namakin ngkana I rangi n rawawata, ike e a kona ni kangaanga iai iangoan te bwai ae raoiroi ibukiu. Ma I a uringa naba ana taeka Tawita ni kibuna 10: ‘Karika i nanou te nano ae itiaki, ngkoe ae te Atua, ao karina i nanou te iango ae boou, ae teimatoa.’ I tataro naba n aron anne nakon te Atua bwa e na buokai, bwa e aonga ni kaokoro te bae I nanamakinna. Ni kibuna 17, e a anganai kabebeteau. E taekinaki ae kangai iai: ‘Ko na bon aki rawa nakon te nano ae uruaki ao ae karawawataaki, ngkoe ae te Atua.’ E karaua nanou te kibu aei bwa e kaotaki iai ae e bon tangirai te Atua.

“N iaiangoani katoto man te Baibara ao te bwai are e tia n anganai te Atua ngkai, e a kakorakoraaki riki iai au kantaninga ibukin te tai ae na roko. I a kakoauai raoi ana berita te Atua ao I a rangi ni buokaki iai bwa N na waakinaanako maiuu.”