E Roko n Tiana Hulda

NGKE arona bwa ko kawara te abamwakoro teuana ae uarereke ae Sangir Besar i Indonesia tabeua te ririki n nako, ko na bae n noriia teniman taari aine aika Kristian i aon te bike. A rangi ni kinaaki n te abamwakoro anne ibukin aia mwakuri ni minita ni buokiia aomata bwa a na ota n te Baibara. Ma n te tai anne, a boni karaoa te bwai teuana ae kaokoro.

Te moan, a rianna i taari ni kakaaei atibu ao n uotii nako aon te bike. Titeboo buburan tabeua atibu akanne ma te booro ni butibooro. Imwina, a tekateka i aoni kaintekateka aika kaai ao a kabongana te aama n ororei atibu aikai nakoni mwakorokoro aika uarereke riki nakoni bunnimoan te moa. A karini ngkanne atibu aika uarereke akanne n te bwaketi ao ni waerake ma ngaai nakon aia auti. Imwina a karini ni baeki aika bubura ao ni katokai n te turaki bwa e na kabonganaaki ibukini karaoan te kawai.

Temanna i buakoia taari aine aikai bon Hulda. E reke riki ana tai nakoia ake tabeman ni karaoa te mwakuri aei. E kakabongana ana mwane ae reke n ana mwakuri aei ni kabooi iai baika kainnanoi ana utu ni katoabong. Ma ngkai, e a mwakuri ma tiana riki teuana. E kani kabooa ana tablet bwa e aonga ni kabongana te JW Library^® app. E ataia Hulda ae taian taamnei ao kanoan riki tabeua te app anne, a na kanakoraoa riki ana mwakuri ni minita ao otana n te Baibara.

E mwakuri Hulda uoua te aoa ni katoa ingabong i nanon teuana ao te iterana te namwakaina, n ororei atibu ni kaona bukin te turaki ae uarereke. N tokina e a reke ana mwane ae tau ibukini kabooan ana tablet.

E taku Hulda, “E ngae ngke I rangi ni kua ao n nimarakiraki man ororean atibu, ma I mwaninga taekani marakiu ni kabane ngke I a kamanena au tablet ae boou aei ni kanakoraoa riki au mwakuri ni minita, ao ni karaoan au katauraoi n te aro ae bebete riki ibukini bobotaki ni Kristian.” E taekinna naba bwa e buokaki n ana tablet ni moani butinakon te aoraki, n toma iai ma kaain te ekaretia ibukin te bobotaki ao te uarongorongo. Ti kimwareirei iroun Hulda ngkai e roko n tiana anne.