Aron te Buaka ao te Tiritiri n Rotiira ni Kabane
“E tuai man reke mwaitini buaka aika riki n tii teuana te tai ae bubura riki nakoni buaka aika tabe ni waaki ngkai, mai mwin te Kauoua ni Buaka ae Katobibia te Aonnaba ao ai 2 te birion ngkai mwaitiia aomata—kuatani mwaitiia aomata ni kabutaa te aonnaba—aika maeka n taabo aika rotakibuaka iai.”
Te Kauoman n Tia Koroboki ni Kabuta n te UN Amina J. Mohammed, Tianuare 26, 2023.
E kona n rina n riki te buaka ao te tiritiri n taabo aika bon rau. Ao e ngae ngke iai aika maeka n taabo ake akea iai te buaka, ma a kona n rotaki iai ibukina bwa e a korakora riki ngkai te reitaki i marenaia kaain te aonnaba ni bwaai n itoman. Ao e kona ni kakaiaki mwin te buaka i nanon te tai ae maan. Nori katoto tabeua:
Karakon te amwarake. E taekinna te World Food Programme bwa “te buaka boni ngaia raoi te bwai ae karekea te baki, ao 70 te katebubua mwaitiia aomata ni katobibia te aonnaba aika rotaki n te baki, n taabo ake e korakora iai te buaka ao te tiritiri.”
Kangaanga ma aorakin te rabwata ao te iango. A kona aomata n rinanon te rawawata ao te tabeaianga, man taian taeka ni kakamaaku ibukin te buaka. Aomata aika maeka n taabo aika riki iai taiani buaka, a kona n ikoaki ao ni karikirakei naba kangaanga ni kaineti ma aorakin aia iango. Ma n angiin te tai, a aki kona ni karekea te buoka are a kainnanoia man te onnaoraki.
Te mwaing nako. N Tebetembwa 2023 ao e raka i aon 114 te mirion aomata ni katobibia te aonnaba, aika a riai ni birinako mani mwengaia, n aron ae e taekinna te Kamitina n te UN Ibukia Taani Birinako Mai Abaia. Oin raoi rikin aei, bon te buaka ao te tiritiri.
Kangaanga ma te mwane. A ririnanoni kangaanga ni kaineti ma te mwane aomata imwin te buaka, n aroni keerakeni booni bwaai. A bae n rotakibuaka iai ibukina bwa e a manga kabanemwane te tautaeka i aoni bwaai ni buaka, n oneani mwin ae e na kabanea ni waaki n ibuobuoki, n aron te mwakuri ni kuakua ao te reirei. Ao e bon rangi ni bobuaka naba karaoani mwin ana urubwai te buaka.
Kangaanga ma te otabwanin. A rawawata aomata ngkana e a rotakibuaka te aba are a maeka iai. A kona ni wenenako aorakia aika reke mani baarekan te ran, te ea, ao te tano, ao e ngae ngke e a toki te buaka, ma a kona n ruanikai n taiani boom aika katukaki ni karabaaki n taabo tabeua.
E bon urubwai ao ni kabanemwane te buaka.