Kakairi n Aron Iehova ao Iesu n Iaiango

1-2. Tera ae irekereke ma tangiran Iehova, ao e kangaa Iesu ni kaotia ae tangira Iehova ma ana iango ni kabane?

“KO RIAI n tangira Iehova ae Atuam ma nanom ni kabane, maium ni kabane, korakoram ni kabane, ao am iango ni kabane.” (Ruka 10:27) E kamataataa raoi Iesu bwa aei te tua ae moan te kakawaki n te Tua Rinanoni Mote. E irekereke tangiran Iehova ma nanora, ae nanonaki naba iai baika ti tatangiri, ao ara namakin. E irekereke naba iai nanora ni kabane, ao korakorara. Ma tangiran Iehova e irekereke naba ma ara iango, ae nanonaki naba iai arora n iaiangoi bwaai. E koaua ae ti aki kona n ota raoi n ana iango ni kabane Iehova. Ma ti kona n ota riki n ana iango te Atua ngkana ti ukera ana “iango te Kristo,” ibukina bwa e iango n aron ana iango Tamana.​—1Kor. 2:16.

² E tangira Iehova Iesu ma ana iango ni kabane. E ataa nanon te Atua ibukina ao e motinnanoia bwa e na karaoa ae boraoi ma nanona, e ngae ngke e na karawawataaki iai. Ibukina bwa e kaatuua karaoan nanon Tamana Iesu, akea te bwai teuana ae tukia man tiana anne.

3. Tera reireian te abotoro Betero mairoun Iesu, ao tera are e kaungaia iai Kristian Betero bwa a na karaoia? (1 Betero 4:1)

³ A kakabwaiaaki Betero ao abotoro ake tabeman ngke a kona ni kabanea aia tai ma Iesu ao n reiakina arona n iaiango. Ngke e moani korea ana reta Betero ae kairaki koreana, e kaungaia Kristian bwa a na kataubobongaia n te iango ae tii te arona ma Kristo. (Wareka 1 Betero 4:1.) E kamanena Betero te taeka ae kabwarabwaraa aroia tautia ni katauraoiia ibukin te buaka ae kangai: “Kataubobongaingkami.” Ngaia are ngkana a kakairi Kristian n aron Iesu n iaiango, a na bon tauraoi ma aia bwai ni buaka ni kaitaraa kani karaoan ae kairua ao ni kaitaraa te waaki ae tautaekanaki iroun Tatan.​—2Kor. 10:​3-5; IEbe. 6:12.

4. E na kangaa te kaongora aei ni buokira ni kakairi n ana taeka n reirei Betero?

⁴ Ti na neneri aron Iesu n iaiango ao arora ni kakairi iai. Ti na noria bwa ti na kangaa ni kona (1) ni kakairi n aron Iehova n iaiango, ike ti na buokaki iai ngaira ni kabane ni boraoi n iango, (2)  ni bwaina te akoi, ao (3) ni bwaina te iangoraoi n onimakinan Iehova n te tataro.

KAKAIRI N ARON IEHOVA N IAIANGO

5. N te aro raa are e a aki iango iai Betero n aron Iehova n iaiango n te tai teuana?

⁵ Iangoa te tai teuana are e a aki iango iai Betero n aron Iehova n iaiango. E a tia Iesu n tuangia ana abotoro ae e na nako Ierutarem, e na tauaki irouia mataniwin Aaro, e na kammarakaki, ao imwina e a kamateaki naba. (Mat. 16:21) E kangaanga irouni Betero kakoauaan ae e na kariaia Iehova kamatean Iesu are ngaia ae e na kamaiuia tibun Iteraera ao te Mesia ae beritanaki. (Mat. 16:16) Ngaia are e kaira Iesu ni kaokoroa Betero ao e taku: “Te Uea, ke e kawakiniko mai iai te Atua, e na aki riki anne nakoim.” (Mat. 16:22) Ibukina bwa e aki iango Betero n aron Iehova n iaiango, e aikoa boraoi n iango ma Iesu.

6. N te aro raa ae kaotia Iesu ae titeboo ana iango ma ana iango Iehova?

⁶ Titeboo raoi ana iango Iesu ma ana iango Tamana are i karawa. E taku Iesu nakoni Betero: “Naako akuu, Tatan! Ko a riki bwa te bwai ni kabwakabwaka nakoiu, bwa tiaki ana iango te Atua am iango, ma bon te iango n aomata.” (Mat. 16:23) E raoiroi nanoni Betero, ma e ribaa ana taeka n reirei Betero Iesu. E reke reireiara iai. Tiaki nanon Iehova bwa e na irantangaaki Iesu. E reke reireiani Betero ae kakawaki n te tai anne ae e na iango n aron Iehova n iaiango.

7. E kangaa ni kaotia Betero imwina riki ae e kani kaboraoa ana iango ma aron Iehova n iaiango? (Nora te taamnei )

⁷ Imwina riki ao e a kaotia Betero bwa e kani kaboraoa ana iango ma aron Iehova n iaiango. E a roko te tai are a nang riki iai Tientaire ake a aki korotobibiaki bwa ana aomata te Atua. E mwiokoaki Betero bwa e na uarongorongo nakoni Korenerio ae temanna i buakoia Tientaire ake a moan riki bwa Kristian. A rarawa I-Iutaia n reitaki ma Tientaire, ngaia are e riai Betero ni bita ana iango, bwa e aonga ni karaoa mwiokoana aei. Ngke e a ataa nanon te Atua n aei Betero, ao e a bita ana iango. Ngaia are e “aki rawa” ngke e kawaekoaaki. (Mwa. 10:​28, 29) E uarongorongo nakoni Korenerio ma kaaini batana ao a bwabetitoaki.​—Mwa. 10:​21-23, 34, 35, 44-48.

8. Ti na kangaa ni kaotia ae e boraoi ara iango ma ana iango Iehova? (1 Betero 3:8 ao te kabwarabwara mai nano)

⁸ Iraua te ririki imwina, ao e a kaungaia raona ni Kristian Betero bwa a na “kaboraoi [aia] iango.” (Wareka 1 Betero 3:8 ao te kabwarabwara mai nano.) Ngkai ana aomata Iehova ngaira, ti kona ni kaboraoi ara iango ngkana ti iaiangoi ana iango Iehova aika kaotaki n ana Taeka. N te katoto, e kaungaia taan rimwina Iesu bwa a na moanibwaia moa ana Tautaeka n Uea te Atua ni maiuia. (Mat. 6:33) E iaiangoa te kibu anne temanna n am ekaretia ao e kona ni motikia bwa e na karaoi bwaai tabeua aika e na beku iai ni kabwanina ana tai. N oneani mwin are ti na tuangnga bwa e na kakaaea riki te bae e na bebete iai maiuna, ti riai n taekina raoiroin tiana anne ao n tauraoi ni buokia.

BWAINA TE NANORINANO

9-10. E kangaa Iesu ni kaotiota te nanorinano ae rianako?

⁹ N te tairiki are imwaini maten Iesu, ao e reireina Betero ma abotoro riki ake tabeman te reirei ae kakawaki ae taekan te nanorinano. Mai mwaina, ao e a tia Iesu ni kanakoia Betero ao Ioane bwa a na katauraoi bwaai ibukin ana kabanea ni katairiki Iesu ma ngaiia imwaini matena. A bae ni katauraoa te beetin ao taiani kaoa ibukini kamwauani waeia iruwa imwain te amwarake. Ma antai ae e na kani karaoa te mwakuri ae mangori aei?

¹⁰ E aki tabwara Iesu ni kaotiota te nanorinano ae rianako. A rangi ni mimi ana abotoro ngke e karaoa ana mwakuri te toro. E buuta ana kauaatao Iesu, e kabaea te kaoa i nukana, e kanoaa te beetin n te ran, ao e a teboki naba waeia. (Ioa. 13:​4, 5) E anaa tabeua te tai tebokani waeia abotoro aika 12, ao temanna naba i buakoia bon Iuta are e na kamwanea. Ma e nanorinano naba Iesu ni karaoa te mwakuri anne. Imwina e kangai Iesu ma te taotaonakinnano: “Kam ota n te bwai ae I karaoia nakoimi? Kam aranai bwa ‘te tia Reirei,’ ao ‘te Uea,’ ao e bon eti ami taeka, bwa boni ngaia ngai. Mangaia ae ngkai I teboki waemi ngai ae te Uea ao te tia Reirei, ao kam riai naba n iteboteboki waemi.”​—Ioa. 13:​12-14.

11. E kangaa ni kaotia Betero bwa e kananorinanoa? (1 Betero 5:5) (Nora naba te taamnei.)

¹¹ E reke reireiani Betero man nanorinanon Iesu. Imwini waeraken Iesu nako karawa, e karaoa te kakai Betero n arona ni kamarurunga te mwaane ae mwauku mangke e bungiaki. (Mwa. 1:​8, 9; 3:​2, 6-8) A bati aomata aika nora te mwakuri ni kakai aei. (Mwa. 3:11) E na ranginako Betero ni kamoamoaana ngkai e bon nako man te tabo ae korakora iai kaotiotan te kani kakannato? E aki, e kananorinanoa Betero n rawa nakoni kamoamoaana i bon irouna, ao e kamoamoaa Iehova ao Iesu ni kangai: “E kakorakoraaki teuae kam noria ma ni kinaa aei n aran Iesu ao n onimakinan arana iroura.” (Mwa. 3:​12-16) Ti bae ni kauringaki n taeka ake e kamanenai Betero n ana reta nakoia Kristian ibukini karikirakean te nanorinano, taekan te tai are e kabaea iai Iesu te kaoa i aona ao n teboki waeia ana abotoro.​—Wareka 1 Betero 5:5.

12. Ti na kangaa n teimatoa ni karikirakea te nanorinano n aroni Betero?

¹² Ti kona ni kakairi n ana katoto Betero ni karikirakean te nanorinano. Uringnga are e bati riki ae nanonaki n te nanorinano ni koaua nakon tii taekinan taeka aika raoiroi. Te taeka are kamanena Betero ibukin te “nanorinano” e irekereke ma arora n iaiangoira ao tabemwaang. Ti karaoi mwakuri n akoi ibukia tabemwaang ibukina bwa ti tangira Iehova ao ti tangiriia aomata, tiaki ibukina bwa ti kani kamoamoaaki. Ti kaotia bwa ti nanorinano ngkana ti kabanea ara konaa ni beku iroun Iehova ao taari ma te kukurei, e ngae ngkana e noraki ara kakorakora ke e aki.​—Mat. 6:​1-4.

BWAINA “TE IANGORAOI”

13. Kabwarabwaraa bwa tera ae irekereke ma bwainan “te iangoraoi.”

¹³ Tera ae irekereke ma bwainan “te iangoraoi?” (1Bet. 4:7) E kabanea ana konaa te Kristian ae bwaina te iangoraoi, ni karaoi ana motinnano aika e oti iai bwa e iaiango n aron Iehova n iaiango. E ataia te Kristian anne bwa e kakawaki riki ni maiuna ana iraorao ma Iehova. E bwaina te iango ae riai i bon ibukina bwa e ataia ae iai tokin ana ataibwai. Ao e kaota onimakinan te Atua irouna n arona ni kakawara Iehova n te tataro.a

14. E kangaa Betero n te taina ni kabwaka n onimakina Iehova?

¹⁴ E kauringia taan rimwina Iesu n te tairiki are imwaini matena, ni kangai: “Kam na bane ni bwaka ibukiu n te tairiki aei.” E taku Betero bwa e aki kona, ngaia are e kaeka ni kangai: “E ngae ngke a na bane ni bwaka naakai ibukim, ma I bon aki kona ni bwaka ngai!” E kauringia taan rimwina tabeman Iesu n te tairiki anne: “Teimatoa n tantani ao n tatataro.” (Mat. 26:​31, 33, 41) Ngke arona bwa e ongeaba Betero n te taeka n reirei arei, e na kona n ninikoria ni kaotia ae te tia rimwin Iesu ngaia. Ma e rangi n uringaaba Betero ngke e kakeaa ana toka.​—Mat. 26:​69-75.

15. E kangaa Iesu ni bwaina te iangoraoi n ana kabanea n tairiki?

¹⁵ E onimakina raoi Iehova Iesu. E ngae ngke e kororaoi Iesu ma e okioki n tataro. E reke iai ninikoriana ni karaoa nanon Iehova ibukina. (Mat. 26:​39, 42, 44;Ioa. 18:​4, 5) E bae n rangi n rotaki Betero imwin noran Iesu n okioki n tataro.

16. E kangaa ni kaotia Betero bwa e karikirakea bwainan te iangoraoi? (1 Betero 4:7)

¹⁶ Ni waakinakon te tai, e a kabatiaa riki onimakinan Iehova Betero n ana tataro. Imwini kautan Iesu, ao e karaua nanoni Betero ma abotoro ake tabeman, bwa a na boni karekea te taamnei ae raoiroi bwa a aonga ni kakororaoa tataekinan te rongorongo ae raoiroi. Ma e tuangia Iesu bwa a na tataninga i Ierutarem ni karokoa e riki anne. (Ruka 24:49; Mwa. 1:​4, 5) Tera ae karaoia Betero ngke tataninga? E “teimatoa n tataro” Betero ao raona ni Kristian ake tabeman. (Mwa. 1:​13, 14) Imwina, n ana moan reta e kaungaia raona ni Kristian Betero bwa a na bwaina te iangoraoi ao n onimakina Iehova n aia tataro. (Wareka 1 Betero 4:7.) E reke reireiani Betero ao e a onimakina Iehova ao e riki bwa bouan te ekaretia.​—IKar. 2:9.

17. E ngae ngke a bebete karaoani bwaai iroura, ma tera ae ti riai ni kateimatoa karaoana? (Nora naba te taamnei.)

¹⁷ Ti riai n tatataro nakon Iehova bwa ti aonga ni kona n iaiango raoi. Ti riai ni kateimatoa ara tataro nakon Iehova e ngae ngke iai iroura te konabwai. Ngaia are ti tataro nakon Iehova ibukin ana kairiri, moarara riki ngkana ti karaoi motinnano aika kakawaki, ao n onimakinna bwa e ataa te kabanea n tamaroa ibukira.

18. Ti na kangaa ni kaboraoa riki ara iango ma aron Iehova n iaiango?

¹⁸ Ti rangi ni kakaitau ngkai e karaoira Iehova ma te konaa ni kakairi n aroarona. (KBwaai 1:26) E koaua ae ti aki kona ni kakairi iroun Iehova n te aro ae kororaoi. (Ita. 55:9) Ma n aroni Betero ti kona n ririkirake ni boraoi n iango ma ana iango Iehova. Ti bia karaoa anne n arora n teimatoa ni kakairi n aron te Atua n iaiango, ni bwaina te nanorinano, ao ni bwaina te iangoraoi.