Kawara Iehova Ibukini Kabebeteam

1. Kabwarabwaraa te baere a rinanona I-Iutaia ake taenikai.

IANGOA aia namakin I-Iutaia ake taenikai i Baburon. A nora kamaunaan abaia. A kairakinako mani mwengaia nakon te aba ae ianena, ibukin aia bure ao aia bure aia bakatibu. (2Rong. 36:​15, 16, 20, 21) E koaua ae iai teutana inaomataia taenikai aikai ni karaoi baika tataneiai ni karaoi ni katoabong i Baburon. (Ier. 29:​4-7) Ma e bon aki bebete maiuia ao bon tiaki te maiu ae a rineia. Tera aia namakin n te baere a rinanona? Nori ana taeka te taenikai temanna ae kakaonimaki: “I rarikini karaangani Baburon ike ti tekateka iai, ao ti tang ngke ti uringa Tion.” (TaiAre. 137:1) A kainnanoa kabebeteaia taenikai aika bwara nanoia aikai, ma a na karekea ia kabebeteaia?

2-3. (a) Tera are e karaoia Iehova ibukia I-Iutaia ake taenikai? (b) Tera ae ti na maroroakinna n te kaongora aei?

² Bon “te Atua ae anga te kabebetenano n aekana nako” Iehova. (2Kor. 1:3) Ngkai te Atua ae tatangira, e kukurei ni kabebeteia aomata nako aika kaania ma ngaia. E ataia Iehova ae a na butimwaea ana reirei ni kaetieti tabeman i buakoia naake a taenikai ao ni manga okiria. (Ita. 59:20) Ngaia are e kaira te burabeti are Itaia n taamneina, bwa e na korea te boki ae ingoanaki n arana, tebubua tabun te ririki imwain te taenikai. Bukin tera? E kangai Itaia: “‘Kabebeteia au aomata, kabebeteia,’ bon ana taeka Atuami.” (Ita. 40:1) Eng, e katauraoa Iehova kabebeteaia I-Iutaia ake taenikai ae a na kainnanoia, rinanon ana koroboki te burabeti.

³ N aroia I-Iutaia ake taenikai, ti kainnanoa naba kabebeteara n te tai teuana ma teuana. N te kaongora aei, ti na maroroakin aanga aika tenua ake e kabebeteia iai taenikai Iehova: (1) E berita bwa e na kabwarai aia bure ake a rairi nanoia, (2) e angania ana aomata te kantaninga, ao (3) e katoka maakuia. Ngkana ti maroroakini baikai, noria bwa ti na kangaa ni kona ni kakabwaiaaki man ana taeka ni karaunano Iehova.

E NANOANGAIRA IEHOVA NI KABWARAI ARA BURE

4. E kangaa Iehova ni kaotia ae te Atua ngaia ae nananoanga? (Itaia 55:7)

⁴ Bon “te Tama ae nananoanga” Iehova. (2Kor. 1:3) E kaota te aroaro anne ngke e berita bwa e na kabwarai aia bure taenikai ake a rairi nanoia. (Wareka Itaia 55:7.) E taku: “N na bon nanoangaiko n te tangira ae koaua ae akea tokina.” (Ita. 54:8) E kangaa Iehova ni kaota ana nanoanga? E ngae ngke a na bon rotakibuaka I-Iutaia ni mwin aia mwakuri, ma e berita Iehova bwa a na aki tiku i Baburon n aki toki. A na tiku n taenikai tii i nanon tabeua te tai. (Ita. 40:2) A bae ni kabebeteaki ao ni karauaki nanoia naake a rairi nanoia i buakoia!

5. Bukin tera ngkai e a bati riki bukina iroura bwa ti na kakaitau n ana nanoanga Iehova, nakoia I-Iutaia ake taenikai?

⁵ Tera reireiara? E kukurei Iehova ni kaabwabwaka kabwaraan aia bure ana toro. E bati riki bukina iroura n ara bong aikai ae ti riai iai ni kakaitau n te baei nakoia I-Iutaia ake taenikai. Bukin tera? Ti a ataa te baere e karaoia Iehova ibukini karekeani kabwaraan ara bure. Irabubua te ririki imwin ana taetae ni burabeti Itaia, ao Iehova e kanakoa Natina ae moan te tangiraki nakon te aonnaba bwa e na katauraoa te kaboomwi ibukia taani bure aika rairi nanoia. Man te kaboomwi aei are e a kona iai ni ‘kamaunaaki raoi ara bure.’ (Mwa. 3:19; Ita. 1:18; IEbe. 1:7) E bon nanoanga te Atua ae ti beku irouna!

6. Ti na kangaa ni kakabwaiaaki ngkana ti kaatuua ara iango i aon ana nanoanga Iehova? (Nora naba te taamnei.)

⁶ E kona ni kabebeteira ana taeka Iehova ake e kairi koreana n Itaia 55:7 ngkana ti a taonakinako n te nanokawaki imwini karaoan ae bure. A kona tabeman i buakora n teimatoa n namakina anne ibukin aia kairua rimoa e ngae ngke a a tia n rairi nanoia. E kona n reke riki aio ngkana ti teimatoa n rotaki ni mwin ara kairua. Ngkana ti a tia ni kaotii ara bure ao ni kaeta kawaira, ti kona ni kakoauaa ae e a tia Iehova ni kabwaraa ara bure. Ao ngkana e kabwaraa ara bure Iehova, e rineia bwa e na aki manga uringa ara bure. (Kabotaua ma Ieremia 31:34.) Ngaia are ngkana e aki ururingi Iehova ara bure ake rimoa, ti aki naba riai ni karaoa anne. E kakawaki iroun Iehova te bae ti karaoia ngkai ao tiaki ara kairua ake ti karaoi rimoa. (Etek. 33:​14-16) Ao n te tai ae waekoa, e nang kainaomataira raoi Tamara ae nananoanga, mani mwin nako ara kairua.

7. Tera ae kona ni kairira bwa ti na ukera buokara ngkana ti karabaa te bure?

⁷ Tera ae ti riai ni karaoia ngkana e tabetabe mataniwin nanora ibukini karabaan te bure ae kakaiaki? E kaungaira te Baibara bwa ti na butiia unimwaane buokara. (Iak. 5:​14, 15) Ma e kona ni kangaanga kaotan te bae bure ae ti karaoia. Ma ti na kairaki bwa ti na kawariia mwaane aika kakaonimaki akanne, ngkana ti raira nanora ao ngkana ti uringnga ae e na kaota te nanoanga nakoira Iehova ao mwaane ake e mwiokoiia bwa a na buokira. Iangoa aron ana nanoanga Iehova ngke e kabebetea te tari te mwaane ae Arthur,a are e rangi n tabetabe mataniwin nanona. E taku Arthur, “I mamatakuakina te bwaitingako i nanon teuana te ririki. Ma imwin ongoraean te kabwarabwara ibukin te mataniwinnano, I a kaota au bure nakoni buu ao unimwaane n te ekaretia. I namakina te bebete imwina ma I bon teimatoa naba n rawawata n te baere I karaoia. A kauringai unimwaane ae e bon aki kaaki taekau Iehova. E anganira te reirei ni kaetieti ibukina bwa e tangirira. E ringaki nanou n aia taeka n akoi ao I buokaki iai bwa N na manga kabooua au iango.” E a beku ngkai Arthur bwa te bwaiania ao te tabonibai. Ai kabebetenanora ataakin ae e nanoangaira Iehova ngkana ti raira nanora!

E ANGANIRA TE KANTANINGA IEHOVA

8. (a) Tera te kantaninga are e angania taenikai Iehova? (b) N aron ae oti n Itaia 40:​29-31, tera aron rotakia I-Iutaia ake taenikai n te kantaninga?

⁸ N aia taratara aomata, ai akea te kantaninga ibukia I-Iutaia ake taenikai. E kinaaki te Tautaeka ae Mwaaka n te Aonnaba ae Baburon n arona ae aki kakainaomataia ana taenikai. (Ita. 14:17) Ma e angania ana aomata Iehova te kantaninga. E berita bwa e na kainaomataia ana aomata ao akea te bwai teuana ae kona n tukia. (Ita. 44:26; 55:12) Kaanga ai aroni bubun te tano Baburon n ana taratara Iehova. (Ita. 40:15) Ngkana ko tii ukianako ao e a bua naba. Tera aron rotakia taenikai n te kantaninga? A kabebeteaki iai. Ma e bati riki nakon anne. E korea aei Itaia: “E na manga reke korakoraia te koraki ake a kabotoi aia kantaninga i aon Iehova.” (Wareka Itaia 40:​29-31.) Eng a na kakorakoraaki n te kantaninga, ao a na “kiba n aron ae kaanga iai baia ni kiba aika baia ni kiba ikare.”

9. Tera bukina ngkai a riai taenikai n onimakin ana berita Iehova?

⁹ E kaota naba Iehova bukina ngkai a riai taenikai n onimakin ana berita. N te aro raa? Iangoi taetae ni burabeti ake a a tia ni koro bukia. A ataia ae e kataenikaiaki te Tautaeka n Uea ae Iteraera mai meang iroun Aturia ao e kairiianako aomata bwa taenikai. (Ita. 8:4) A noriia kaaini Baburon ni kamauna Ierutarem ao ni kairiia kaaina bwa taenikai. (Ita. 39:​5-7) A maiu ngke e kamatakiaki te Uea are Tetekia ao ni kairaki nako Baburon. (Ier. 39:7; Etek. 12:​12, 13) A bane ni koro bukini baike e a kaman taekin Iehova. (Ita. 42:9; 46:10) E a kakorakoraaki riki iai irouia onimakinan ae e na boni koro naba bukin ana berita Iehova are e na kamaiuia!

10. Tera ae kona ni buokira ni kateimatoa nenen ara kantaninga i nanoni kabaneani boong aikai?

¹⁰ Tera reireiara? Ngkana ti namakina te bwarannano, e kona ni kabebeteira te kantaninga ao ni buokira ni manga kaoka korakorara. Ti a maeka n taai aika karuanikai ao ti kaitaraaki irouia aiara aika korakora. Ma ti aki riai ni kabwaraa nanora. E a tia Iehova n anganira te kantaninga ae tamaroa ae te maiu n aki toki ma te rau ni koaua ao te mweraoi. Ti riai n teimatoa n iaiangoa te kantaninga anne ao ni kaaki i nanora. Bwa ngkana ti aki, ao e na kona ni maabubu ara kantaninga n aron taraakin te tabo ae tamaroa, ae e taraa ni maabubu ibukina bwa ti tataraia man te winto ae baarekareka. Ti na kangaa ni kaitiaka te winto ni kaikonaki anne, ni kateimatoa nenen ara kantaninga? Ti kona ni karekea ara tai ni katoabong ni kataamneia aron tamaroani maiura ae e na reke n te aonnaba ae boou. Ti kona ni wareki kaongora, ni mataku n taamnei, ao n ongoraei anene aika taekan ara kantaninga. Ao ti kona n taekin nakon Iehova n te tataro, taiani berita aika ti ingainga ni kan nori kakororaoaia.

11. Tera ae buoka te tari te aine temanna ae iai aorakina ae kakaiaki bwa e na manga reke korakorana?

¹¹ Iangoa aron te kantaninga ni kabebetea ao ni kakorakoraa te tari te aine ae Joy, ae taonaki n te aoraki ae kakaiaki. E taku neiei: “I kaota au namakin nakon Iehova ngkana I namakinna ae I a rangi n taonakinako, bwa I ataia ae e ota irou. E a tia n anganai Iehova n taai akanne ‘te korakora ae riaoni korakoraia aomata.’” (2Kor. 4:7) E kataamneia naba Joy bwa aongkoa e mena n te aonnaba ae boou, ae “akea te tia maeka iai ae e na kangai: ‘I aoraki.’” (Ita. 33:24) E kona ni manga reke korakorara ngkana ti bunra naba nanora nakon Iehova ao ni kaatuua ara iango i aon te kantaninga.

12. Bukin tera ngkai ti riai n onimakini ana berita Iehova? (Nora naba te taamnei.)

¹² E a tia Iehova ni kaota bukina aika bati ngkai ti riai n onimakini ana berita, n aron are e karaoia nakoia taenikai. Iangoi taetae ni burabeti aika ti a nori kakoroani bukia. N te katoto, ti a nora te tautaeka ae mwaaka riki n te aonnaba ae “korakora . . . n te itera teuana, ao ni mamaara n te itera riki teuana.” (Tan. 2:​42, 43) Ti ongo naba taekani “mwaeiein te aba n te tabo teuana ma teuana,” ao ti uarongorongo nakoia “botannaomata ni kabane.” (Mat. 24:​7, 14) E a kakorakoraaki riki iroura man taetae ni burabeti aikai ao ake tabeua riki, onimakinan ana berita Iehova aika kabebetenano aika i aoni kawaia ni koro bukia.

E KATOKA MAAKURA IEHOVA

13. (a) Baikara kangaanga aika a na kaaitarai I-Iutaia n taini kamaiuaia? (b) N aron ae kabwarabwaraaki n Itaia 41:​10-13, e kangaa Iehova ni kabebeteia I-Iutaia ake taenikai?

¹³ E ngae ngke e kabebeteia taenikai Iehova n te kantaninga ae tamaroa, ma e ataia ae a na kaaitara ma kangaanga n taini kamaiuaia. E a kaman taekinna Iehova ae n raatokin kataenikaiaia I-Iutaia ao e na karawawataia natannaomata ake i rarikia te tia kataenikaia te aba, ao e na ninia Baburon. (Ita. 41:​2-5) A riai n raraoma I-Iutaia? E a kamani kabebeteia Iehova ana aomata ni kangai: “Tai maaku bwa I memena iroum. Tai raraoma bwa bon Atuam ngai.” (Wareka Itaia 41:​10-13.) Tera ae e nanonna n ae “bon Atuam ngai”? E aki kauringia I-Iutaia bwa a na taromauria ibukina bwa a a kaman ataa anne. Ma e kauringia ae e teimatoa n tei n aia itera.​—TaiAre. 118:6.

14. Tera riki ae karaoia Iehova ni katoka iai maakuia taenikai?

¹⁴ E katoka naba maakuia taenikai Iehova n arona ni kauringia ae akea tiani mwaakana ao ana atatai. E kaoia I-Iutaia ake taenikai bwa a na tararake n tarai itoini karawa. E tuangia ae e aki tii karikii itoi ma e atai naba araia ni kabane. (Ita. 40:​25-28) Ai bebetera riki ngkanne ataakin araia ana toro nako! Ao ngkai iai mwaakan Iehova ni karikii itoi, iai naba mwaakana ni buokiia ana aomata. Eng, akea bukina ngkai a riai n raraoma ke ni maaku I-Iutaia ake taenikai.

15. E kangaa te Atua ni katauraoiia I-Iutaia ake taenikai imwain te bae e na riki imwaia?

¹⁵ E katauraoiia naba ana aomata Iehova imwain te bae e na riki imwaia. Ni moan iteran te boki are Itaia ao e tuangia te natannaomata te Atua ni kangai: “Riin n ami ruu ake kam na mano iai, ao kaini ami mataroa imwimi. Karabaingkami i nanon te tai ae kimototo ni karokoa bunginakon te un.” (Ita. 26:20) E bae ni moani kakororaoaki nanon te rongorongo aei ngke e kataenikaiaki Baburon iroun te Uea are Tairati. E taekinna te tia korea rongorongon rimoa ae te I-Kuriiti bwa ngke e ninia Baburon Tairati, ao “e tuangia [ana tautia] bwa a na bane ni kamateia naake a noriia i tinaniku.” Iangoa aroni maakuia kaaini Baburon! Ma a bae ni kamaiuaki I-Iutaia ake taenikai ibukina bwa a ongeaba n ana kaetieti Iehova.

16. Bukin tera ngkai ti aki riai n rangi n raraoma ibukin taai aika imwaira? (Nora naba te taamnei.)

¹⁶ Tera reireiara? I aoni kawaina ao e nang moanaki te rawawata ae korakora. A na aki ota aomata ao a na maaku ngkana e roko. Ma e na aki riki anne nakoia ana aomata Iehova. Ti ataia ae bon Atuara Iehova. Ti na tei ni kaetiira bwa ti ataia ae e a “kan roko [kamaiuara].” (Ruka 21:28) Ti na bon tei n nene e ngae ngkana e buakanira te natannaomata ae ikotaki. E na kamanoira Iehova rinanoia ana anera ao n anganira kaetieti aika ti na kamaiuaki iai. Ti na kangaa ni karekei kaetieti akanne? Ti a bon noria n taina. Ma ti na boni bae ni karekei kaetieti akanne man ara ekaretia. A na riki ara ekaretia bwa kaanga ara “ruu” ae ti na kamanoaki iai. Ti na kangaa ni katauraoira nakoni baika a na riki imwaira? Ti riai ni kaanira ma tarira n te onimaki, ni kukurei n ongeaba nakoni kaetieti man ana botaki Iehova, ao ni kakoauaa ae bon Iehova ae kaira ara botaki.​—Ebera 10:​24, 25; 13:17.

17. Kam na kangaa ni kawara Iehova ibukini kabebeteami?

¹⁷ E ngae ngke e aki bebete te baere a rinanona I-Iutaia ake taenikai, ma e katauraoa Iehova kabebeteaia ae a kainnanoia. E na karaoa naba anne ibukira. Ngaia are e ngae ngkana ti aki ataa kanoan te ingabong, ma ti bia teimatoa ni kawara Iehova ibukini kabebeteara. Eng, onimakina ana nanoanga ae rianako. Kateimatoa ami kantaninga. Uringnga, ae bon akea te bae kam na maakua ngkai Atuami Iehova.