Kakoauaa Kabwaraan Am Bure Iroun Iehova

1-2. Tera te kabebeteaki ae a kona ni karekea taani bure aika rairi nanoia? (Nora naba te taamnei te maekatin.)

E ATAA aron namakinan te uringaaba ibukini buure ake rimoa te Uea are Tawita. (TaiAre. 40:12; 51:3; atun te areru) E karaoi kairua tabeua aika kakaiaki i nanoni maiuna. Ma e kaota te rairannano ni koaua ao Iehova e kabwaraa ana bure. (2Tam. 12:13) Ibukin anne, e ataa naba aron te kabebeteaki Tawita ae reke ngkana e kabwarai ara bure Iehova.​—TaiAre. 32:1.

² N aron Tawita ti kona naba n namakina te kabebeteaki ae reke man nanoangaara iroun Iehova. Ai kabebetenanora ataakin ae ngkana ti raira nanora ni koaua, ti kaotii ara bure, ao ti kabanea ara konaa n aki manga karaoia, e bon tauraoi Iehova ni kabwarai, n ikotaki naba ma ara bure aika kakaiaki! (TaeRab. 28:13; Mwa. 26:20; 1Ioa. 1:9) Ao ai karaunanora riki ataakin ae e boni mwanuokini ara bure, kaanga aron ae ti tuai karaoa te bure anne!​—Etek. 33:16.

3-4. Tera ana namakin te tari te aine temanna imwini bwabetitoana, ao tera ae ti na maroroakinna n te kaongora aei?

³ N tabetai ao a kona tabeman n namakinna ae kangaanga kakoauaani kabwaraan aia bure iroun Iehova. Iangoa ana katoto Jennifer, are e kaikawaaki n te koaua. Ngke e a roronrikirake ao e irekereke ma mwakuri aika bubuaka ao e kiriuoua maiuna. Iraua te ririki imwina ao e a okira Iehova ao ni katauaki imwina riki nakon te bwabetito. E taku neiei: “Ni maiuu are mai mwaina ao I momoanibwaia karekean te mwane ae bati, te wene ni bure, te kokoro ni manging, ao I rangi ni kiunun. I ataia ae ngke I tia ni bubutii kabwaraan au bure ao n raira nanou, I a itiaki man ana karea ni kaboomwi Kristo. Ma I bon aki te roko ni kakoauaa i nanou ae e a kabwaraaki au bure.”

⁴ Iai taai ake ko namakinna bwa e kangaanga iai kakoauaan ae e a tia Iehova ni kabwarai am bure ake rimoa? E tangiria Iehova bwa ti na namakinna ae ti kamanoaki n ana nanoanga n aron Tawita. Ti na maroroakinna n te kaongora aei bwa bukin tera ngkai ti riai ni kakoauaa kabwaraan ara bure iroun Iehova ao tera ae kona ni buokira ni karaoa anne.

BUKIN TERA NGKAI TI RIAI NI KAKOAUAA KABWARAAN ARA BURE IROUN IEHOVA?

5. Tera ae e tangiria Tatan bwa ti na kakoauaa? Aanga te katoto.

⁵ Ngkana ti kakoauaa kabwaraan ara bure iroun Iehova, ti na bon aki kona ni mwane n ana bwai ni kamwane Tatan teuana. Uringnga ae e na boni kabanea ana konaa Tatan ni katoka ara beku iroun Iehova. E na teke tian Tatan aei, ngkana e kataia ni kairira bwa ti na kakoauaa ae a aki kona ni kabwaraaki ara bure. Iangoa ana katoto te mwaane are i Korinto are e kanakoaki man te ekaretia ibukin te wene ni bure. (1Kor. 5:​1, 5, 13) Ngke e a raira nanona imwina, ao e tangiria Tatan bwa a na aki bwaina te kabwarabure kaain te ekaretia, n te aro are a aikoa kani butimwaea teuaei. Ma e tangiria naba Tatan bwa e na namakinna teuaei ae e aki kabwaraaki ana bure, e aonga n “taonakinako teuaei n nanokawakina” ao e na katoka ana beku iroun Iehova. E tuai mani bitaki tian Tatan ke ana kunemwaan. Ma ti bon “aki babanga n ana kunemwaan.”​—2Kor. 2:​5-11.

6. Ti na kangaa ni kona ni kabebeteaki man rawawatan te uringaaba?

⁶ Ngkana ti kakoauaa kabwaraan ara bure iroun Iehova, ti kona ni kabebeteaki man rawawatan te uringaaba. Ngkana ti bure, ao ti aki toki n namakina te rawawata n uringaaba. (TaiAre. 51:17) Ao e raoiroi anne. E kona ni kairira mataniwin nanora bwa ti na karaoi mwaneka aika raraoi ni kaeta kawaira. (2Kor. 7:​10, 11) Ma ngkana ti rawawata n uringaaba n te tai ae maan e ngae naba ngkana ti a tia n raira nanora man ara bure, ao ane ti na bon taonakinako iai. Ngkana ti kakoauaa kabwaraan ara bure iroun Iehova, ti a kona ni katikui i akura rawawatara n uringaaba, bwa bon anne raoi nnena. Ao ti na kona ni beku iroun Iehova n aron are e tangiria, ae te beku irouna ma mataniwin nanora ae itiaki ao te kimwareirei. (Koro. 1:​10, 11; 2Tim. 1:3) Ma ti na kangaa ngkanne ni kona n namakina ana kabwarabure Atuara?

TERA AE KONA NI BUOKIRA NI KAKOAUAA KABWARAAN ARA BURE IROUN IEHOVA?

7-8. E kangaa Iehova ni kabwarabwaraa i bon irouna nakoni Mote, ao tera ae ti kona ni kakoauaa iai? (Te Otinako 34:​6, 7)

⁷ Iaiangoa aron Iehova ni kabwarabwaraa i bon irouna. N te katoto, nora ana taeka Iehova nakoni Mote n te Maunga are Tinai.a (Wareka Te Otinako 34:​6, 7.) A bati riki aroaro aika e kona n taekin Iehova ni kabwarabwaraa iai, ma e rineia bwa e na kabwarabwaraa i bon irouna bwa “te Atua ae nanoanga ao e atataiaomata.” E kona ngkanne te aeka n Atua anne n aki kabwaraa ana bure te tia taromauria ae raira nanona ni koaua man ana bure? E aki! Anne boni kaotan te aki nanoanga ao te aki tatangira, aika aroaro aika akea iroun Iehova.

⁸ Ti kona ni kakoauaa ae e aki kona Iehova ni kabwarabwaraa taekana nakoira n te aro ae kewe, bwa bon te Atua ngaia ae tataekina te koaua. (TaiAre. 31:5) Ngaia are ti kona ni kakoauaa ana taeka. Ngkana ko noria bwa e kangaanga iroum tokin uringaabam ibukin am bure ake rimoa, titirakiniko aei: ‘I kakoauaa ae e bon nanoanga ao e atataiaomata Iehova, ao e aki kona n ae e na aki kabwaraa ana bure te tia bure ane e raira nanona? Tiaki ngkanne I riai ni kakoauaa ae e a tia ni kabwarai au bure?’

9. Tera ae nanonaki ni kabwaraan ara bure? (Taian Areru 32:5)

⁹ Kananoa am iango i aon te baere e kairiia taani korea te Baibara Iehova bwa a na koreia ibukin ana kabwarabure. N te katoto, iangoa aron te tia korea te Baibara are Tawita ni kabwarabwaraa ana kabwarabure Iehova. (Wareka Taian Areru 32:5.) E kangai Tawita: Ko kabwarai au kairua ma au bure.” Te taeka n Ebera ae rairaki bwa “kabwarai” e kona n nanona “tabekia,” “uotianako,” ke “uouotia.” Ngke e kabwaraa ana bure Tawita Iehova, ai aron ae e tabeki ana bure Tawita ao e uotiinako. E kabebeteaki Tawita man te rawawata n uringaaba are e uouotia ngkoa. (TaiAre. 32:​2-4) Ti kona ni kabebeteaki n aron naba anne. Ngkana ti rairi raoi nanora man ara bure, ti a aki riai ngkanne n teimatoa n uouota te rawawata ae reke man te uringaaba ibukin ara bure ake e a tia n tabeki Iehova ao n uotiinako mairoura.

10-11. Tera ae ti a ataia ibukin Iehova n taeka aika “tauraoi ni kabwarabure”? (Taian Areru 86:5)

¹⁰ Wareka Taian Areru 86:5. E taekina Iehova ikai Tawita bwa e “tauraoi ni kabwarabure.” Ni kaineti ma te taeka aei, ao e koreaki ae kangai n te boki teuana ae kabwarabwaraa te Baibara, ibukin Iehova: “[E] ‘kakabwarai buure,’ bwa bon anne ‘anuana.’ ” E aera ngkai bon anuan Iehova kabwaraakini buure? E kabwarabwaraaki ni kangai ni banen te kibu aei: “E bati am tangira ae koaua ibukia te koraki ni kabane ake a weteiko.” N aron ae ti reiakinna n te kaongora are imwain aei, e kairaki Iehova n te tangira ae koaua bwa e na karekea ana iraorao ae rangi ni kaan ao ae teimatoa ma taan taromauria aika kakaonimaki. E kairaki n ana tangira ae koaua bwa e na “tauraoi ni kabwarai [aia bure]” taani bure ni kabane aika rairi nanoia. (Ita. 55:​7, kbn.) Ngkana e kangaanga iroum kakoauaani kabwaraan am bure iroun te Atua, ko kona n titirakiniko aei: ‘I kakoauaa ae e kakabwarai buure Iehova, ao e tauraoi ni kabwarai aia bure taani bure ni kabane ake a rairi nanoia, ao ni bubutiia bwa e na nanoangaiia? Tiaki ngkanne I riai ni kakoauaa ae e a tia ni kabwarai au bure ngke I butiia bwa e na nanoangaai?’

¹¹ Ti kona ni kabebeteaki n ataakin ae e bon ataa raoi rikiara Iehova ae te bure. (TaiAre. 139:​1, 2) E mataata raoi aei n ana areru riki teuana Tawita, ae e kona ni buokira naba ni kakoauaa kabwaraan ara bure iroun Iehova.

TAI MWANINGA TE BAE E URINGNGA IEHOVA

12-13. Ni kaineti ma Taian Areru 103:​14, tera ae e ururingnga Iehova ibukira, ao tera ae e kairaki iai bwa e na karaoia?

¹² Wareka Taian Areru 103:14. E taekina Iehova ikai Tawita bwa e “uringira bwa taano ngaira.” E oti n taeka aikai bukina ngkai e tauraoi Iehova ni kabwarai aia bure taan taromauria aika rairi nanoia: E ataa rikiara ae te bure. Ti na rinanon ngkai ana taeka Tawita aikai bwa ti aonga n ota riki iai.

¹³ E taekinna Tawita bwa e “atai raoi aroni karaoara” Iehova. E karaoa Atam “man te tano” ao e ataia raoi ae iai tian aia konabwai aomata aika kororaoi, n aron ae a kainnanoa te amwarake, te matu, ao te ikeike. (KBwaai 2:7) Ma ngke e bure Atam ao Ewa, e a bati riki ngkanne ae nanonaki n ae bon taano ngaiia. Ngkai kanoaia ngaira, e a riki te bure bwa ai rikiara ao ti a kai kaririaki nakoni karaoani baika kairua. E aki tii ataia Iehova ae bon rikiara te bure, ma e ‘ururingnga’ naba n aron ae e taekinna Tawita. Te taeka n Ebera ae kabonganaaki ikai e kona n nanona karaoan te bwai ae raoiroi. Ngaia are ti kona ni kakimototoi ana taeka Tawita ni kangai: E ataia Iehova ae ti kona ni kairua n tabetai, ngaia are e nanoangaira ao e kabwarai ara bure ngkana ti rairi raoi nanora.​—TaiAre. 78:​38, 39.

14. (a) E kangaa Tawita ni kabwarabwaraa aron Iehova ni kabwarai buure? (Taian Areru 103:12) (b) E kangaa Iehova ni kabwarai raoi buure, n aron ae oti n te baere riki nakon Tawita? (Nora te bwaoki ae “Aron Iehova ni Kabwarai Buure ao ni Mwanuokini.”)

¹⁴ Tera aron Iehova ni kabwarai ara bure? (Wareka Taian Areru 103:12.) E taku Tawita bwa ngkana e kabwarai buure Iehova, E a kaaki naba ara bure akanne n te raroa ae “ai aron raroan otin taai [mainiku] ma bungin taai [maeao].” N aron ae ti ataia, e rangi n raroanako maeao ma mainiku ao a aki kona ni kaitiboo taabo aikai. Tera ngkanne reireiara ibukini buure ake e a tia ni kabwarai Iehova? E taekinaki ae kangai ni mwin te kakaae teuana: “Ngkana e a tia ni kararoaaki te bure, ti kona ni kakoauaa ngkanne bwa e nang riai n akea boina, tamruruna, ao ururingana.” N tabetai e kona te boi ni kaoka te ururing. Ma ngkana e kabwarai buure Iehova, ai aron ae akea naba teutana boina n tiku, are e na manga uringnga ao ni katuuaaeira iai.​—Etek. 18:​21, 22; Mwa. 3:19.

15. Tera ae ti kona ni karaoia ngkana ti bon teimatoa naba ngkai n rawawata ibukin uringaabara n ara bure ake rimoa?

¹⁵ A kangaa ana taeka Tawita ake n Taian Areru 103 ni buokira ni kakoauaa kabwaraan ara bure iroun Iehova? Ngkana ti teimatoa n rawawata n uringaabara ibukin ara bure rimoa, ti kona n titirakinira ni kangai: ‘I mwanuokini baike e ururingi Iehova, ae taekan rikiau ae te bure ao e kabwaraa ana bure ane e raira nanona ni koaua? I bon ururinga naba ngkai te bwai are e rineia Iehova bwa e na mwanuokinna, ae taekan ae e a tia ni kabwarai au bure ao e a aki kona ni manga katuuaaeai n au bure akanne?’ E aki katuuaa ana iango Iehova i aon ara bure ake rimoa. Ao ngaira ti aki naba riai. (TaiAre. 130:3) Ngkana ti a kakoauaa kabwaraan ara bure iroun Iehova, ti nang kona ngkanne ni kabwarai ara bure i bon iroura ibukin ara kairua ake rimoa, ao ni manga waakinaanako maiura.

16. Kabwarabwaraa karuanikain ururingan ara bure ake rimoa. (Nora naba te taamnei.)

¹⁶ Iangoa te kaikonaki aei. Ururingan am bure ake rimoa, ai aron ae ko kabuta te kaa ma ko teimatoa n tataraa am kiraati are mai moa. E tamaroa ngkana ko taraia teutana te tai bwa ko kona ni katuako iai mani kangaanga ake mai bukim. Ma ngkana ko na buti n akea am kangaanga, ko riai n taraa raoi kawaim ane i moam. N aron anne, e kona n ibuobuoki ngkana ti a manga tarai ara kairua ake rimoa n taai tabetai, bwa e kona n reke iai reireiara ao ni kananomatoaira bwa ti na aki manga karaoi. Ma ngkana ti kaatuui ara iango i aon ara kairua ake rimoa, e na kona rawawatara n tiatiana te bae ti kona ni karaoia ngkai n ara beku ibukin te Atua. Ngaia are ti bia kaatuua taraani kawaira ae i moara. Ti a toua te kawai ae tiki nakon te maiu n ana aonnaba te Atua are e beritanna, are a nang aki kona ni “manga rin n te iango” ururing aika bubuaka.​—Ita. 65:17; TaeRab. 4:25.

TEIMATOA N ANAA NANOM BWA KO NA NAMAKINNA

17. Bukin tera bwa ti riai n teimatoa n anai nanora bwa ti na namakina ana tangira Iehova ao ana kabwarabure?

¹⁷ Ti riai n teimatoa n anai nanora bwa ti na namakina ana tangira Iehova ao ana kabwarabure. (1Ioa. 3:​19, kbn.) Bukin tera? Ibukina bwa e botumwaaka Tatan n ananai nanora bwa ti na namakina ae ti aki kona n tangiraki ao a aki kona ni kabwaraaki ara bure. N aki ongeia bwa tera ae e karaoia ma bon tii teuana tiana, ae katokan ara beku iroun Iehova. Ti kona ni kantaningaia bwa e na kakorakoraa riki Tatan ngkai e ataia bwa e a kimototo ana tai. (TeKao. 12:12) Ti riai n aki kariaia bwa e na tokanikai!

18. Tera ae ko kona ni karaoia bwa ko aonga n namakina ana tangira Iehova ibukim ao arona ni kabwarai buure?

¹⁸ Ngkana ko kani kakoauaa raoi ana tangira Iehova ibukim, maiuakini aanga n ibuobuoki ake n te kaongora are imwain aei. Ko kona ni kakoauaa ae e kabwarai buure Iehova, ngkana ko ururinga arona ni kabwarabwaraa taekana i bon irouna. Kananoa am iango i aoni baike e kairiia taani korea te Baibara bwa a na koreia ibukin arona ni kabwarai buure. Tai mwaninga ae e bon ataa raoi rikiam ae te bure ao e na bon nanoangaiko. Ao ururingnga are ngkana e kabwarai buure, e boni kabwarai raoi ni koaua. Ao n aron Tawita n aki nanokokoraki ibukin ana nanoanga Iehova, ko kona naba ngkoe ni kangai, “Ko rabwa Iehova ngkai ko ‘kabwarai au kairua ma au bure’!”​—TaiAre. 32:5.