Uoman Kaain te Rabwata n Tautaeka Aika Boou

N OKITOBWA 5, 2024, ao iai te katanoata ae okoro n te botaki ae katoa ririki ae a a mwiokoaki Brother Jody Jedele ao Jacob Rumph bwa kaain te Rabwata n Tautaeka Ibukia Ana Tia Kakoaua Iehova. A kaai ni beku iroun Iehova ma te kakaonimaki taari mwaane aikai i nanon ririki aika bati.

E bungiaki Brother Jedele i Missouri, U.S.A. ao e kaikawaaki n te koaua. A maeka ana utu n te aono ae a karako iai Taani Kakoaua. Ma e ngae n anne, e kaitiboo ma taari aika bati aika kakaokoro ake a roko ikanne bwa a na buoka tataekinan te rongorongo ae raoiroi. E rangi n rotaki n aia tangira ao aroia ni katiteuanaaki. E bwabetitoaki ngke ai tibwa tebwi tabun ana ririki n Okitobwa 15, 1983. E rangi ni kukurei n te mwakuri ni minita, ao imwini banen ana reirei n te kauarinan, e a moana ana bwaiania ae katoatai n Tebetembwa 1989.

A aki toki ana karo Brother Jedele ni kakairiia ma mwaanena ni kawara te Betaera ngke te roronrikirake ngaia. A kaungaaki natiia man aei bwa a na katea tiaia ae te beku n te Betaera, ae te tia ae a uaia n roko iai. E rin Brother Jedele n te Betaera i Wallkill n Tebetembwa 1990. E mwakuri moa i rarikia naake a tabe ma te kaitiaki ao imwina riki ma naake a tabe ma bwainnaoraki.

N te tai anne, ao a ririkirake ekaretia aika kabongana te taetae n Tibein ao a a kainnanoaki iai taari mwaane. Ngaia are e a kaaina teuana mai buakon ekaretia akanne Brother Jedele ao e a reireinna te taetae n Tibein. Teutana te tai imwina, e a kaitiboo ma te tari te aine ae Damaris, ae bwaiania n te aono naba anne. Imwina riki ao a a mare ao e a raonna neiei n te Betaera.

A kitana te Betaera n 2005 ibukin tabeakinaia aia karo aika kakaonimaki. N te tai anne, a beku bwa bwaiania aika katoatai. E ibuobuoki Brother Jedele n angareirei n te Kuura Ibukin te Mwakuri ni Bwaiania, ao e beku n te Komete Ibukin te Reitaki ma te Onnaoraki ao te Komete Ibukin te Kateitei n te Aono.

N 2013, a a manga kaoaki Brother ao Sister Jedele nakon te Betaera ibukin te mwakuri ni kateitei i Warwick. Man te tai anne, a beku naba i Patterson ao i Wallkill. E a tia Brother Jedele ni mwakuri n te Aobiti Ibukin te Korotaamnei/Kateitei n te Aono ae Uarereke ao n te Aobiti ae Tabe ma Mwakuri ni Kuakua. Ni Maati 2023, e a mwiokoaki bwa te tia ibuobuoki n te Komete Ibukin te Mwakuri. E taku ngke e ururing rikaaki ni mwiokoana aikai: “Ngkana e boou mwiokoam, ko kona n namakina te maaku. Ma n te tai anne ko riai n uringnga bwa ko na onimakina Iehova ibukina bwa boni ngaia ae karaoia bwa e na riki.”

E bungiaki Brother Rumph i California, i U.S.A. Ngke e uarereke ao e mamaara n te onimaki tinana ma e kabanea ana konaa neiei n reireina natina koaua man te Baibara. Ni katoa ririki e kakawara naba tibuna te unnaine ae te tia Kakoaua ae kakaonimaki. E buokaki iroun tibuna bwa e na manga kan ongora te koaua, ao ngke 13 ana ririki ni maiu e a tuatua bwa e kan reirei n te Baibara. N Tebetembwa 27, 1992, ao e a bwabetitoaki ngke tebwi tabun ana ririki. E kakukurei bwa e a manga kekeiaki tinana ao a a bane kaain ana utu n ririkirake ao ni bwabetitoaki.

E nora aroni kukureia bwaiania Brother Rumph ngke e roronrikirake. Ngaia are imwini banen ana kauarinan ao e a moana ana bwaiania n Tebetembwa 1995. N 2000, ao e a mwaing nako Ecuador ni beku n te tabo ae kainnanoaki riki iai te ibuobuoki. Ikanne are e a kaitiboo naba ma te tari te aine ae Inga, ae te bwaiania mai Kanata, ao imwina riki a a mare. Imwini mareia, a a beku n te kaawa i Ecuador ae karako iai taan uarongorongo. E a reke ngkai te ekaretia iai ae korakora.

Imwina riki ao a a mwiokoaki Brother ao Sister Rumph bwa bwaiania aika okoro ao imwina riki n te mwakuri ni mwamwananga. N 2011 ao a a kaoaki nakon te ka-132 ni kuura ni Kireata. Imwin aia angabeeba ao a a beku n taabo aika kakaokoro n te aonnaba ao ni karekei aeka ni beku aika kakaokoro n aron te beku n te Betaera, te mwakuri ni mitinare, ao te mwakuri n te aono. E riki naba Brother Rumph bwa te tia reirei n te Kuura Ibukia Taan Uarongorongoa te Tautaeka n Uea.

Ibukin te aoraki ae te COVID-19, a a manga okira te United States Brother ao Sister Rumph. A kaoaki nakon te Betaera i Wallkill ike e a kataneiaaki iai Brother Rumph n te Aobiti Ibukin te Mwakuri. Imwina riki, a a manga kaokaki nakon te aobiti n tararua i Ecuador, ike e a beku iai Brother Rumph bwa kaain te Komete n te Aobiti n Tararua. N 2023 a a manga kamwaingaki nako Warwick. N Tianuare 2024, ao e a mwiokoaki Brother Rumph bwa te tia ibuobuoki n te Komete Ibukin te Mwakuri. E taku ngke e ururingi taabo ake e beku iai, “E aki kakawaki bwa ko beku ia, ma te bwai ae kakawaki riki bon aomata ake ko beku ma ngaiia.”

Ti kakaitau n aia mwakuri korakora taari mwaane aikai, ao ti ‘teimatoa ni karineia taari aika ai aroia naakai.’​—IBir. 2:29.