“Maiuakina te Aro ni Katiteuanaaki Rinanon te Taamnei”
E KAUNGAIA Kristian ake i Ebeto te abotoro Bauro bwa a na teimatoa n ‘taotaon nanoia i marenaia n te tangira, ni kaingaingai nanoia ni maiuakina te aro ni katiteuanaaki rinanon te taamnei n te bwai ni kabaebae are te raoi.’—IEbe. 4:2, 3.
E reke “te katiteuanaaki” ae iroura “rinanon te taamnei.” Ae nanona bwa e reke mani mwaakan te Atua ae mwamwakuri. Ma n aron ae taku Bauro, e kainnanoaki te kakorakora ibukini kateimatoaan te katiteuanaaki. Iroun antai? Ni koauana e riai te Kristian temanna ma temanna ni karaoa tabena “ni maiuakina te aro ni katiteuanaaki rinanon te taamnei.”
N te katoto, iangoia bwa iai temanna ae anganiko te kaa ae boou. Antai tabena kateimatoaan raoiroina? E boni mataata te kaeka iai. Ko aki kona ni bukina te aomata are anganiko te kaa ngkana e uruaki, ibukina bwa ko bon aki tararuaia raoi.
N aron anne, e ngae ngke bon te bwaintangira mairoun te Atua katiteuanaakira ni Kristian, ma bon tabera n tatabemanira nako maiuakinana. Ngkana e aki nakoraoi reitakira ma tarira ke mwaanera temanna, ti riai n titirakinira aei, ‘I karaoa tabeu ni maiuakina te aro ni katiteuanaaki rinanon te taamnei n arou ni kanakoraoa te kangaanga?’
“KAINGAINGAI NANOMI” NI MAIUAKINA TE KATITEUANAAKI
N aron ae taku Bauro, iai taai ake ti kainnanoa iai te kakorakora ni maiuakina te aro ni katiteuanaaki. E kona n riki anne ngkana iai tarira ke mwaanera temanna ae kaunira. E kainnanoaki n taai nako bwa ti na kawara te aomata ao ni maroroakina te kangaanga, ibukini maiuakinan te katiteuanaaki? E aki. Titirakiniko aei, ‘Ngkana I karaoa anne, e na nakoraoi riki te kangaanga ke e na bubura riki?’ N tabetai ko wanawana riki ngkana ko tarariaoia ke ni kabwarabure.—TaeRab. 19:11; Mareko 11:25.
Titirakiniko aei, ‘Ngkana I karaoa anne, e na nakoraoi riki te kangaanga ke e na bubura riki?’
N aron ae e koreia te abotoro Bauro, ti bia teimatoa n ‘taotaon nanora i marenara n te tangira.’ (IEbe. 4:2) E taekinaki n te boki teuana bwa te kibuntaeka aei e kona n nanona “butimwaeiia n aroia anne.” Nanon anne bwa ti butimwaea ae a bubure raora n te onimaki n ai arora. Ni koauana, ti kekeiaki ni karina i aora “te aroaro ae boou.” (IEbe. 4:23, 24) Ma akea i buakora ae kona ni karaoa anne n te aro ae kororaoi. (IRom 3:23) Ngkana ti butimwaea te koaua anne, e na bebete riki iroura bwa ti na taotaon nanora i marenara, ni kabwarabure, ao ni “maiuakina te aro ni katiteuanaaki rinanon te taamnei.”
Ti na boni karekea “te bwai ni kabaebae are te raoi” ngkana ti kabwarabure ao ni mwaninga baike a karaoi tabemwaang ni kaunira iai. Te taeka ni Kuriiti ae rairaki bwa “te bwai ni kabaebae” n I-Ebeto 4:3 e rairaki bwa “taian ia” n I-Korote 2:19. Boni bwaai ni kabaebae aika matoatoa baikai i nanon te rabwata aika katomaa te ri teuana nakon are teuana. N aron anne e buokira te rau n ikotaki ma tangiraia tarira, bwa ti na teimatoa ni kaanira ma ngaiia n aki ongei ara kangaanga ma ngaiia.
Ngaia are ngkana iai raom n te onimaki ae kauniko, ke ni kammaraka nanom, kataia n nanoangaa te aomata anne nakon ae ko na kabuakakaa. (IKoro. 3:12) Ngkai a aki kororaoi aomata ni kabane, ko bae naba n tia ni kauna temanna n te tai teuana. E na buokiko ururingan anne bwa ko na karaoa tabem “ni maiuakina te aro ni katiteuanaaki rinanon te taamnei.”