Aomata Aika A Aki Kang Baika A Riki Mairouia Maan​—Tera ae E Taekinna te Baibara?

A mwaiti aomata ni katobibia te aonnaba aika a rineia bwa a na aki kang ke ni kabonganai baika a riki mairouia maan.

• “Te taeka ae veganism bon te iango n aomata ma aroia ni karaoa aia kabanea ni konaa n totokoi mwakuri n ribuaka nakoia maan, ke ruanikaini maiuia bwa a na aki kabonganaaki ibukin te amwarake, te kunnikai ke bwaai riki tabeua.”​—The Vegan Society.

Ao ibukin tabeaiangaia ibukia maan, a a maiuakina te aroaro ni maiu aei aomata tabeman ibukin tabeakinani mweraoin taabo ke te otabwanin, ibukini kanakoraoani marurungin rabwataia, ke ibukin aia onimaki.

• “E kaokoro ma angiini waaki ni kamarurung ibukin te amwarake bwa te veganism e aki toki n iangoaki bwa kaanga te koaua teuana, te motinnano ae riai, ao ana aanga temanna ni kani bita te waaki n te aonnaba aei nakon ae nakoraoi riki.”​—Britannica Academic.

Te veganism bon te anga ae e na kanakoraoa riki te marurung n ara buraneti aei n te tai ae imwaira? Tera ae e taekinna te Baibara?

Ana iango ara tia Karikiriki ibukia aomata ao maan

E oti n te Baibara bwa ara tia Karikiriki ae Iehova ae te Atua,a e iangoiia aomata bwa a kakawaki riki nakoia maan ao e mwiokoiia bwa a na taui aroia. (Karikani Bwaai 1:​27, 28) N tokin te tai, e a kariaia te Atua bwa a na kabonganaia maan aomata ibukini kanaia. (Karikani Bwaai 9:3) Ma e ngae n anne, e aki kukurei ni bwainikirinaia maan.​—Taeka N Rabakau 12:10.

N aron ae e taekinaki n te Baibara, e a nakon temanna ma temanna ana motinnano ibukini kanakin irikon te man.b Akea rakan arora i matan te Atua man ara motinnano iai. (1 I-Korinto 8:8) Akea ae e riai ni kabuakakaa ana rinerine temanna ni kaineti ma te amwarake are e kani kanna.​—I-Rom 14:3.

Te anga ibukini kanakoraoan taai aika imwaira

E oti n te Baibara bwa ara rinerine ibukin aroaroni maiura, a na aki kona ni kaetii kangaanga aika a riki n te aonnaba. A mwaiti kangaanga aika a riki man aia waaki taan tautaeka, aroaroia aomata i marenaia ao biribirin ma tibwatibwaani kaubwain te aba, ake a aikoa kona ni kaetaki moa ngkai. E taku te Baibara:

• “E aki kona ni kaetaki te bwai ae bwaoua.”​—Te Minita 1:15.

E na kanakoraoi ara kangaanga ni kabane ara tia Karikiriki. E kabonganai taeka ni kaikonaki te Baibara ni kabwarabwaraa iai te bwai ae e na karaoia te Atua.

• “Ao I nora karawa ae boou ao te aonnaba ae boou, bwa e a tia ni mauna karawa nikawai ao te aonnaba nikawai, ao ai akea marawa.”​—Te Kaotioti 21:1.

E na onea mwin aia tautaeka aomata ke “karawa nikawai” te Atua nakoni “karawa ae boou,” ae taekan ana Tautaeka n Uea i karawa. Ana Tautaeka n Uea aei, e na kamauna “te aonnaba nikawai” ae taekaia naake a buakaka, ao e na tautaeka n “te aonnaba ae boou” ke i aoia naake a kukurei n aantaeka n ana kairiri.

Bon tii ana kairiri Ana Tautaeka n Uea te Atua are a na kona iai aomata n reiakina aroia ni maiu ma te rau ma maan ao ni karinei bwain nako te otabwanin.​—Itaia 11:​6-9.