Te Koaua ae Ana Tia Kakoaua Iehova Boni Boretetanti?
Tiaki ngaia anne. Ana Tia Kakoaua Iehova boni Kristian, ma ti aki iangoira bwa Boretetanti. Bukin tera?
E kabwarabwaraaki nanon te taeka ae Boretetanti bwa “Aaro aika rawa nakon te Aro ni Katorika.” E ngae ngke e koaua bwa a aki boraoi n iango Ana Tia Kakoaua Iehova ma ana reirei te Aro ni Katorika, ma ti aki iangoira bwa Boretetanti ni kaineti ma bukina aikai:
A bati aia koaua Aaro ni Boretetanti aika kaitaraa ana reirei te Baibara. N te katoto, e reirei te Baibara bwa “tii temanna te Atua,” ao tiaki te Temanna n Teniman. (1 Timoteo 2:5; Ioane 14:28) Ao e teretere iai te reirei ae e katuuaaeia aomata aika buakaka te Atua, tiaki n te ai ni moone, ma n te kamaunaaki n aki toki.—Taian Areru 37:9; 2 I-Tetaronike 1:9.
Ti aki karaoi bwaai ni kaitaraa te Aro ni Katorika ke ni kataia ni bita ana waaki, ke Aaro riki tabeua. Ma ti bon tii tataekina te rongorongo ae raoiroi ae taekan Ana Tautaeka n Uea te Atua, ni kakorakoraira ni buokiia tabemwaang bwa a na onimakina te rongorongo ae raoiroi. (Mataio 24:14; 28:19, 20) Ti aki kani bitii aia waaki Aaro tabeua ma ti boni kan reireinia aomata n tatabemania nako te koaua ibukin te Atua ao ana Taeka ae te Baibara.—I-Korote 1:9, 10; 2 Timoteo 2:24, 25.