Antai Aika Nako Karawa?
Ana kaeka te Baibara
E rineiia tabeman Kristian aika kakaonimaki te Atua bwa a na kautaki nakon te maiu i karawa. (1 Betero 1:3, 4) Ngkana a kani karekea te kaniwanga aei, a riai n teimatoa n ongeaba nakon te Atua ao ni kakorakorai aia onimaki.—I-Ebeto 5:5; I-Biribi 3:12-14.
Tera ae a na karaoia i karawa?
A na beku ma Iesu bwa ueea ao ibonga i nanon 1,000 te ririki. (Te Kaotioti 5:9, 10; 20:6) A na karika “karawa ae boou” ke te tautaeka i karawa, ae e na tautaekana te “aonnaba ae boou” ke te botannaomata. A na tautaekana te aonnaba ni kabutaa mai karawa, ao a na buokiia aomata ni maiuakina ae boraoi ma nanon te Atua ae te bwai ae tangiria n te moantai.—Itaia 65:17; 2 Betero 3:13.
Iraman aika a na kautaki nako karawa?
E taekinaki n te Baibara bwa iai aomata aika 144,000 aika a na kautaki nako karawa. (Te Kaotioti 7:4) N te miitara are e koreaki n Te Kaotioti 14:1-3, ao te abotoro Ioane e nora “te Tiibutetei ae tei i aon te Maunga ae Tion, ao raona 144,000.” N te miitara aei, ao e tei “te Tiibutetei” ibukin Iesu imwini kautana. (Ioane 1:29; 1 Betero 1:19) E tei te “Maunga ae Tion” ibukin nakoan Iesu ae rietata ao naake 144,000 ake a a kairiri ma ngaia i karawa.—Taian Areru 2:6; Ebera 12:22.
Te koraki “ake a weteaki, ake a rineaki” bwa a na kairiri ma Kristo n te Tautaeka n Uea, a aranaki bwa te “nanai ae uarereke.” (Te Kaotioti 17:14; Ruka 12:32) E oti n anne bwa a boni karako mwaitiia ni kabotauaki ma mwaitiia ana tiibu Iesu ni kabane.—Ioane 10:16.
Reirei aika kairua ibukia naake a nako karawa
Te reirei ae kairua: A na nako karawa aomata ni kabane aika raoiroi.
Te koaua: E beritana te maiu are aki toki te Atua i aon te aonnaba ibukia angia aomata aika raoiroi.—Taian Areru 37:11, 29, 34.
E taku Iesu: “Akea te aomata ae e a tia ni waerake nako karawa.” (Ioane 3:13) E kaotia iai bwa a aki nako karawa aomata aika raoiroi ake a a tia ni mate imwaina, n aron Aberaam, Mote, Iobi ao Tawita. (Mwakuri 2:29, 34) Ma a kantaningaa te mangauti nakon te aonnaba.—Iobi 14:13-15.
E aranaki te mangauti nako karawa bwa “te moani mangauti.” (Te Kaotioti 20:6) E oti n aei bwa iai riki te mangauti teuana. E na riki aei i aon te aonnaba.
E angareirei te Baibara bwa i aan Ana Tautaeka n Uea te Atua, ao “e nang akea riki te mate.” (Te Kaotioti 21:3, 4) E kaineti te berita aei nakon te aonnaba, ibukina bwa akea te mate i karawa.
Te reirei ae kairua: Ti kona n rineia bwa ti na maiu i karawa ke i aon te aonnaba.
Te koaua: E rineiia bwa antai Kristian aika kakaonimaki te Atua aika a na karekea “te kaniwanga ae te wewete nako karawa,” ae taekan te maiu i karawa. (I-Biribi 3:14) Ti aki kona n rineia bwa ti na beku iroun te Atua i karawa ke ikai i aon te aonnaba.—Mataio 20:20-23.
Te reirei ae kairua: E raoiroi riki te maiu i karawa nakon te maiu n te aonnaba. A raoiroi riki naake a nako karawa nakoia naake a na maiu n te aonnaba.
Te koaua: E arania naake a na karekea te kantaninga i aon te aonnaba te Atua bwa “au aomata,” “au aomata aika rineaki,” ao “aomata aika kakabwaiaaki iroun Iehova.” (Itaia 65:21-23) A nang karekea te maiu are aki toki ao ni kimwareirei ni bita te aonnaba aei nakon te bwaretaiti. Aei te bwai ae tangiria te Atua ibukia aomata.—Karikani Bwaai 1:28; Taian Areru 115:16; Itaia 45:18.
Te reirei ae kairua: Te nambwa ae 144,000 are taekinaki n te Kaotioti bon tiaki te nambwa ni koaua.
Te koaua: Tabeua nambwa ake n te Kaotioti bon nambwa ni koaua. N te katoto, e taekinaki iai “aara aika 12. . ., ake araia ana abotoro te Tiibutetei ake 12.” (Te Kaotioti 21:14) Ti kangaa n ataia ae te nambwa ae 144,000 bon te nambwa ni koaua?
E koreaki n Te Kaotioti 7:4 “mwaitiia te koraki ake a kanikinaeaki, [ke, ni kamatoaaki bwa a na maiu i karawa], aika 144,000.” E a manga taekinaki imwina taekaia “te koraki ae uanao ae akea temanna ae kona ni warekiia.” “Te koraki ae uanao anne” a karekea naba te kamaiuaki mairoun te Atua. (Te Kaotioti 7:9, 10) Ngke arona bwa te ware ae 144,000 bon te nambwa ni kaikonaki ibukia aika a na kamaiuaki ni kabane, e a aki boo ma ongina ngkanne ngkai manga iai riki te korakina ae “akea temanna ae kona ni warekiia.”a
Irarikin anne, a kabwarabwaraaki naake 144,000 bwa a “kabooaki . . . mai buakoia aomata bwa moan uaa.” (Te Kaotioti 14:4) Te taeka ae “moan uaa” e kaineti nakoia kaain te kurubu ae uarereke. E kaineti aei nakoia naake a na tautaeka i karawa ma Kristo i aoia kaain te aonnaba ae e aki kona ni warekaki mwaitiia.—Te Kaotioti 5:10.
a E korea naba ae kangai te tia rabakau ae Robert L. Thomas ni kaineti ma te ware are 144,000 are e taekinaki n Te Kaotioti 7:4: “Bon te mwaiti ae katauaki ni kabotauaki ma te ware are e aki ataaki mwaitina are taekinaki ni mwakoro 7:9. Ngke arona bwa bon te nambwa ni kaikonaki, ai a akea ngkanne te nambwa ni koaua, ae taekinaki n te boki aei.”—Te Kaotioti 1-7: An Exegetical Commentary, iteraniba 474.