Aekakira Tein Iesu?
Ana kaeka te Baibara
Akea ae ataa raoi tein Iesu bwa aekakira, kioina ngkai e aki kabwarabwaraaki n te Baibara. E oti iai bwa e aki kakawaki anne. Ma e ngae n anne, e taekini bwaai tabeua te Baibara aika ti kona n ataa iai tein Iesu.
Kabwarabwaraana: Bon te I-Iutaia Iesu ao e bae ni katotongi teia tibun Iuta, ni katotonga tinana. (Ebera 7:14) E bae n aki rangi n okoro teina, bwa n te taina ao e karaba ni mwananga mai Kariraia nako Ierutarem ao e aki te roko ni kinaaki. (Ioane 7:10, 11) Ao n taraana e aki naba rangi n tei n okoro i buakoia taan rimwina, bwa e riai Iuta Itekariota ni kotea Iesu nakoia naake a na kaburea.—Mataio 26:47-49.
Mwarain irana: E na bae n aki mwarairai iran Iesu bwa e taekinaki n te Baibara bwa “ngkana e mwarairai iran te mwaane ao e kamaamaeaki iai.”—1 I-Korinto 11:14.
Buaina: Iai buain Iesu bwa e kakairi n aia tua I-Iutaia, are a katabuaki mwaane ‘ni korei buaia ni kakororoi.’ (Nakoaia Ibonga 19:27; I-Karatia 4:4) Ao irarikina, e mwaneweaki naba n te Baibara taekani buain Iesu, n te taetae ni burabeti are kaineti ma karawawataana.—Itaia 50:6.
Rabwatana: E oti bwa e bon marurung raoi rabwatan Iesu. Ni karaoan ana mwakuri ni minita ao e mwamwananga nakon taabo aika raroanako. (Mataio 9:35) E kaitiaka aia tembora I-Iutaia uatai, e karangai aia taibora ni mwane, ao n te taina e kaotinakoia tiibu ma kaao n te kai ni kataere. (Ruka 19:45, 46; Ioane 2:14, 15) E koreaki ae kangai n te McClintock and Strong’s Cyclopedia: “E oti man taian euangkerio bwa e marurung raoi [Iesu] ao ni korakora rabwatana.”—Volume IV, iteraniba 884.
Ubuna: E akoi ma n atataiaomata Iesu, ao akea te nanououa bwa bon anne naba taraan ubuna. (Mataio 11:28, 29) A bane aeka n aomata nako ni kawaria ibukini kabebeteaia ao buokaia. (Ruka 5:12, 13; 7:37, 38) A kawaria naba ataei n aki maakinna.—Mataio 19:13-15; Mareko 9:35-37.
Iango aika kairua ni kaineti ma tein Iesu
Te iango ae kairua: A taku tabeman bwa bon te I-Aberika Iesu, kioina ngke e kabotauaki irana n te boki ae Te Kaotioti ma buraen te tiibu ao waena bwa “te buraati ae e kabuekaki ni kaitiakaki.”—Te Kaotioti 1:14, 15, Te Baibara ni Katorika.
Te koaua: E koreaki te boki ae Te Kaotioti ni kamanenai taiani “kanikina.” (Te Kaotioti 1:1) Kabwarabwaraan iran Iesu ao waena bon taiani kaikonaki ni kaineti ma aroarona imwini kautana, ma tiaki taekan teina ni menana i aon te aba. Ngke e taekinaki n Te Kaotioti 1:14 bwa e “mainaina atuna ma irana n aroni buraen te tiibu ae mainaina n ai aron te tino,” e nanonaki iai karani buraen te tiibu ma tiaki teina. E kaotaki iai wanawanana ngkai e a bati ana ririki. (Te Kaotioti 3:14) E aki kabotauaki n te kibu aei iran Iesu ma tein te tino, ngaia are e aki naba kabotauaki ma teini buraen te tiibu.
Taraani waen Iesu “ai aron te buraati ae raneanea ngkana e kabuekaki n te ai ni nnen te ai ae uramwaaka.” (Te Kaotioti 1:15) Ao ubuna naba “ai aron taai ngkana e kirokiro riringana.” (Te Kaotioti 1:16) Kioina ngkai akea te reeti n aomata ae titeboo karani kunia ma baika taekinaki aikai, nanona ngkanne bwa te miitara aei bon te kaikonaki, ae kaotaki iai Iesu imwini kautana bwa e a “mamaeka n te oota ae aki kona ni kaaniaki.”—1 Timoteo 6:16.
Te iango ae kairua: E mamaara Iesu ao e ngore.
Te koaua: E oti n aroaron Iesu bwa te mwaane ngaia ae ninikoria. N te katoto, e ninikoria ni kaotia nakoia te koraki ake a roko ni katikia ni kaburea. (Ioane 18:4-8) E riai naba ni korakora, kioina ngkai bon te kabentaa ngaia ae kakamanenai bwaai ni mwakuri aika aki maiu man te iti.—Mareko 6:3.
Ma e aera ngkanne Iesu ngke e kainnanoa buokana n uota ana kai ni kammaraki? Ao e aera ngke e moani mate riki nakoia raona ake a kamateaki ma ngaia? (Ruka 23:26; Ioane 19:31-33) Imwaini kamatean Iesu ao e a kamani mamaara rabwatana. E aki matu n uaa e ngaina ibukina naba bwa e korakai nanona n raraoma. (Ruka 22:42-44) N te tairiki anne ao a bwainikirinna I-Iutaia, ao n te ingabong are imwina e a kammarakaki irouia I-Rom. (Mataio 26:67, 68; Ioane 19:1-3) Anne bukina ae e a moantaai riki ni mate iai.
Te iango ae kairua: E unun Iesu ma n nanokawaki.
Te koaua: E kaotiotii raoi Iesu aroaron Tamana ae i karawa ae Iehova, ae taekinaki n te Baibara bwa “te Atua ae kukukurei.” (1 Timoteo 1:11; Ioane 14:9) E bon reireinia tabemwaang Iesu aroia ni kukurei. (Mataio 5:3-9; Ruka 11:28) E oti ni koaua aikai bwa e boni kukukurei Iesu.