Kammarakin te Rawawatannano

“E raka i aon 39 te ririki maaniu n tekateka ma Sophia,a n uaa matena n te aoraki ae wenemaan. A rangi ni boutokaai raoraou, ao I teimatoa ni katabetabeai. Ma i nanon teuana te ririki, ao ai aron ae kaanga I ewaraki n te maraki. E roroko ae I a bon taonakinako naba n te nanokawaki. E ngae ngke e a kaan tenua te ririki imwini mateni buu, ma I bon rotaki naba ni maraki aika bati, ao n angiin te tai a rina n riki.”​—Kostas.

E a tia ni mate temanna ae ko tangiria? Ngkana eng, e bae n titeboo am namakin ma Kostas. Iai bwaai tabeua aika kauekea riki te raraoma ke te uruakinnano nakoni mateni buum, am koraki, ke raoraom ni kaan. A kakoauaa naba anne taan rabakau ake a kamatebwaia kammarakin te rawawatannano. E taekinaki n te kaongora ae boreetiaki n te boki ae The American Journal of Psychiatry, bwa “te mate bon te kabanea ni kammaraki ao e kangaanga tokina.” Ngkana a riki maraki aika kakaiaki aikai aika rereke ni maten temanna, e a kona ni kangai iai te aomata ae rawawata: ‘A na maanra namakin aikai? I kona ni manga kukurei? E na reke ia kabebeteau?’

A kaekaaki titiraki akanne n te maekatin aei ae te Taratara! E na rinanoaki n te kaongora ae imwina te bae ko kona ni kariaa rikina ngkana e mate ae ko tangiria. Ao kaongora ake imwina a na kaotii aanga aika a na buokiko ni kauarerekea marakim n rawawatam.

Bon ara kantaninga bwa baika a na maroroakinaki imwina, a na kabebeteia ao ni buokiia naake a rinanon te maraki ibukin rawawatan nanoia.