Kakawakin Ataakin te Kaeka

E aera bwa e kakawaki ataakin ae iai te tia Karikiriki? Ngkana ko kairaki n te bwai ni kakoauaa bwa iai te Atua ae moan te mwaaka, ane ko na kan nenera te bwai ni kakoaua anne, bwa e kairaki korean te Baibara irouna. Ao ngkana ko onimakina te bwai ae taekinaki n te Baibara, ane ko na kakabwaiaaki n aanga aikai.

E na kakukurei riki maium

TE BAE TAEKINAKI N TE BAIBARA: “E anganingkami [te Atua] te karau mai karawa ao boongi ni mari, ao e kanuaingkami n te amwarake ma ni kaon nanomi n te kimwareirei.”—Mwakuri 14:17.

AE NANONAKI IAI: Bwaai ake ko karekei n te aonnaba aei, bon te bwaintangira mairoun te tia Karikiriki. Ko na rangi ni kakaitau riki ibukini bwaintangira aikai, ngkana ko ataia ae rangi ni korakora tabeakinam iroun te tia Anga.

Karekei taeka n reirei aika manena aika na buokiko ngkai

TE BAE TAEKINAKI N TE BAIBARA: “Ko na ota ngkanne n te raoiroi, ao n te eti, ao n te riai, ae kawain nako te raoiroi.”—Taeka N Rabakau 2:9.

AE NANONAKI IAI: Ngkai te Atua bon am tia Karikiriki, e bon atai baika ko kainnanoi bwa ko aonga ni kukurei. Ngkana ko wareka te Baibara, ko kona n reiakini baika bati aika a na buokiko ni maium ngkai.

Karekei kaekaan am titiraki

TE BAE TAEKINAKI N TE BAIBARA: “E na reke iroum ataakin te Atua.”—Taeka N Rabakau 2:5.

AE NANONAKI IAI: Ataakin ae bon iai te tia Karikiriki, ko kona ni buokaki iai ni karekei iai kaekaan titiraki aika rangi ni kakawaki, n aron: Tera manenan te maiu? E aera ngkai e a rangi ni bati te rawawata? Tera ae e na riki ngkana ti mate? Ko kona ni karekei kaeka aika karaunano man te Baibara.

Karekea te kantaninga ibukin taai aika a na roko

TE BAE TAEKINAKI N TE BAIBARA: “‘I ataa te bwai ae N na karaoia nakoimi,’ bon ana taeka Iehova, ‘N na anganingkami te rau ao tiaki te kabuanibwai, bwa e aonga n reke iroumi te bwai ae raoiroi nakon taai aika a na roko, ao te kantaninga.’”—Ieremia 29:11

AE NANONAKI IAI: E berita te Atua bwa n taai aika na roko, e nang kamauna te buakaka, te rawawata, ao te mate naba. Ngkana ko onimakini ana berita te Atua, am kantaninga ibukin taai aika a na roko, e na bon buokiko ni kaaitarai am kangaanga ma te ninikoria n te bong teuana ma teuana.

Aroia Tabeman ni Kakabwaiaki Mani Kakoauaan te tia Karikiriki

“I mimi n taai nako ngkana I nora aron te Atua ni buokira n iterani maiura aika bati. E buokira bwa ti na ataa te bwai ae moan te kakawaki ni maiura, e na nakoraoi arora ma aomata nako, ao ti na riki bwa raoraon te Atua.”—Cyndi, U.S.A.

“E rau nanou ao I kukurei ni maiu, ibukina bwa I kakoauaa te tia Karikiriki. Kioina ngkai I kakoaua te Atua, e aki kabotu maiu, a bati riki baika I kona n reiakin ibukina, ana karikibwai ao ana Taeka.”—Elise, France.

“Maiuakinan baike e reiakinira ara tia Karikiriki n te Baibara, I a riki iai bwa te aomata ae kukurei riki. E buokai bwa N na aki bati n tiribure, N na tabeakinia riki aomata, ao ni kukurei riki. E buokai naba bwa N na riki bwa te karo ae raoiroi riki.”—Peter, Netherlands.

“Imwain reiakinan taekan te Atua irou, te bwai ae I kakaraoia, I a bon amwamwarake naba, I matu ao ni kabokorakora ma rokou ni mwakuri i aon te tai. I aki rangi ni kukurei ni maiu! Ma ngkai, I a ataia bwa te maiu bon te bwaintangira ae moan te tamaroa, ae nanona bwa N na rangi ni kukurei ao n tabeakinaki raoi.”—Liz, Estonia.

“Bon te aomata ngai ae I tabeaianga. Ma n ataakin ae e nang toki te buakaka, te ribuaka ao te rawawata, I a buokaki iai bwa N na tokanikai i aon te tabeaianga.”—Adrien, France.