KEKEIAKI MA RIKIRAKENI BOONI BWAAI
Bwabwaina te Tituaraoi
Ngkana ko kekeiaki ni kaangaraoiko ma rikirakeni booni bwaai, ko bae n namakinna bwa e na kangaanga bwainan te tituaraoi. Ma ko na boni kunea bwa te tituaraoi nakoia tabemwaang e kona ni buokiko ni kekeiaki ma kangaanga aika kaineti ma te mwane. Ko boni kona n tikona am mwane ao n tituaraoi naba.
BUKINI KAKAWAKINA
Bwabwainan te tituaraoi n aanga naba aika uarereke—e kairira bwa ti na namakina te kukurei ao n iai naba uaara iai. A taekinna taokita tabeman bwa te anganga e kona n raoiroi nakoni marurungin rabwatara ao ara iango. N te katoto, e kona ni kakerikaaka raraomara, tabeaiangara, rietatan raraara, ao ai marakira aika bati. E kona naba ni kanakoraoa te matu.
Ngkana ti tituaraoi n anga te mwane nakoia tabemwaang ke tera riki, ti bae ni kunea bwa ti na kai butimwaea riki te ibuobuoki ngkana ti a kainnanoia. E taku Howard ae maeka i Engiran: “Mani kakaaean aanga n tituaraoi ao n ibuobuoki nakoia tabemwaang, I namakinna ma buu bwa ti aki rangi ni karawawataia aomata ngkana a nang buokira.” Ni koauana, a bon aki kariaa kabooani mwin aia mwakuri aomata aika tituaraoi mai nanoia. Ma te bwai ae a na kona ni karekea, bon raoraoia ni koaua aika tatauraoi n buokiia n taai ni kangaanga.
TE BAE KO KONA NI KARAOIA
Aanga te baere iai iroum. E ngae ngke e uarereke te baere iai iroum, ma ko boni kona naba n anga nakoia tabemwaang, e ngae ngke tii te amwarake ae bon tau. A maiu ni kainnano Duncan ma ana utu aika maeka i Uganda, ma a teimatoa ni bwabwaina te nano n tituaraoi. E taku Duncan: “Ni katoa Taabati, ti kakaoa temanna bwa ti na amwarake ma ngaia n te auti ngai ma buu. Ti kukukurei ni kabanea ara tai ma tabemwaang.”
Ni koauana, ngkana ko anganga nakoia tabemwaang, ao karaoia n ae riai. Ko na bon aki kan anga n te aro ae riao ao a nang aki reke baike a kainnanoi am utu.—Iobi 17:5.
Kataa aei: Angan temanna te amwarake ae bon tau ke te moi naba. Ngkana iai bwaai aika ko a aki kainnanoi, e aera ko aki angania raoraom ke kaain rarikim ake a na kona ni kakabwaiaaki iai ao ni kabonganai?
Anganano n itera tabeua. Iai tabeua bwaai n tituaraoi aika moanibaan te tamaroa aika aki kona ni kabooaki n te mwane. N te katoto, ti kona n anga ara tai ao ni kaota tabeakinaia tabemwaang mani karaoani mwakuri n ibuobuoki nakoia. Taeka naba aika kaota te akoi e kona n riki bwa te bwaintituaraoi! Ngaia are taekinna nakoia tabemwaang bwa a rangi ni kakawaki ke ko rangi n tangiriia.
Kataa aei: Buokiia tabemwaang n aia mwakuri tabeua, n onobwaian mwengaia ke ni bwaai riki tabeua. Korea am taeka ni kakaitau n te card teuana ke kanakoa am text nakon raoraom temanna, e ngae naba ngkana ko tii taekinna ae ko mwannanoia.
Ngkana ko kakaaei aanga ake ko na bwabwaina iai te tituaraoi, ko a kauka iai te mataroa nakoni kakabwaia aika bati.