Mwakoro 1

Te Karikibwai ni Karokoa te Ieka

E kanga n riki karawa ma te aonnaba? A a kanga naba n riki taai, namwakaina, itoi ao ai bwain nako te aonnaba? E anga te kaeka ae eti te Baibara ngke e taekinna bwa a karikaki iroun te Atua. Mangaia are e moanaki ara boki ni karaki man te Baibara aei, n rongorongon te karikibwai.

Ti reiakinna iai bwa ana moani karikibwai te Atua bon aomata aika taamnei ae bon aekakina naba. Naakai bon anera. Ma e karikaki te aonnaba ibukia aomata aika ai arora. Mangaia are e karika te mwaane ao te aine te Atua, ao e arania bwa Atam ma Nei Ewa, ao e kamaekaia n te oo-n-aroka ae moan te raoiroi taraana. Ma a aki ongeaba iroun te Atua ao ibukin anne e bua irouia te riai n teimatoa ni maiu.

Maanin te tai man moani karikan Atam ni karokoa tain te Ieka ae korakora, bon 1,656 te ririki. N taai akanne ao a bati aomata aika buakaka. Iai aomata aika taamnei i karawa aika a aki nonoraki, ae Tatan ma ana anera aika buakaka. I aon te aba ao iai naba aomata aika buakaka n aron Kain ao a a bati riki, n ikotaki ma mwaane aika rangi n aintoa. Ma iai naba aomata aika raoiroi n te aonnaba n aron Abera, Enoka ao Noa. Ni Mwakoro TEUANA ti na wareki iai, rongorongoia naakai ni kabane ao bwaai ake a riki.