KARAKI 13

Aberaam Bon Raoraon Te Atua

E ARANAKI bwa Ura te tabo teuana are a nako ni maeka iai aomata imwin te Ieka. E a riki bwa te kaawa ae kaubwai ao iai auti aika rangi n tamaroa iai. Ma a taromauria atua aika kewe aomata iai. Anne are a karaoia naba i Babera. Kaain Ura ao Babera, a aki katotongia Noa ma natina ae Tem, ake a teimatoa n toro iroun Iehova.

N tokina, e a mate Noa are kakaonimaki 350 te ririki imwin te ieka. Uoua te ririki imwina ao e a bungiaki te aomata ae ko noria n te taamnei aei. Bon te aomata ae rangi n tatangiraki iroun te Atua. Arana bon Aberaam. E mamaeka ma ana utu n te kaawa ae Ura.

N te bong teuana ao e tuanga Aberaam Iehova ni kangai: ‘Kitana Ura ao kitania am koraki iai, ao naako nakon te aba ae N na tuangko.’ Te koaua bwa e ongeaba Aberaam ao e kitana Ura ae te tabo ae rangi ni kamwengaraoi? Eng, e boni karaoa anne. Ao ibukina bwa e aki toki n ongeaba Aberaam iroun te Atua, e a aranaki iai bwa raoraon te Atua.

Tabeman kaain ana utu Aberaam, a iria ni kitana Ura. E iria tamana are Tera ao ai natina are Rota. Ao e iri naba buun Aberaam are Nei Tara. Ngke a a roko n te tabo ae arana Aran ao e a mate iai Tera. A a rangi n raroa nako ma Ura.

Imwina ao a a manga kitana Aran, Aberaam ma ana utu n nako Kanaan. Ngke a a roko iai ao e taku Iehova: ‘Aio te aba ae N na angania am kariki.’ E tiku i Kanaan Aberaam ao e maeka n te auti n rianna.

E a moana ana ibuobuoki te Atua nakon Aberaam, ni kamwaitiia ana nanai n tiibu ao ni man, ao ana toro aika bubua ma bubua mwaitiia. Ma bon akea natina ma Tara.

Ngke e a koro 99 ana ririki Aberaam, ao e taku Iehova nakoina: ‘I berita bwa ko na riki bwa tamaia botannaomata aika mwaiti.’ Ma e na kanga n riki aei ngkai a a rangi ni kara Aberaam ma Tara, ma n aki tau nakon te kariki?

Karikani Bwaai 11:​27-32; 12:​1-7; 17:​1-8, 15-17; 18:​9-19.