KARAKI 15

E Tanrikaki Buun Rota

A UAIA ni maeka Rota ma Aberaam ao aia utu n te aba ae Kanaan. N te bong teuana ao e taku Aberaam nakon Rota: ‘E a aikoa tau te aba aei ibukia ara man. Taiaoka ni kariaia bwa ti nang raurenako. Ngkana ko nako n te itera arei, ao ngai N na nako n te itera are teuana.’

E taraa te aba Rota ao e nora iteran te aba are teuana bwa e rangi n tamaroa, bwa iai te ran ae bati iai ao e bati naba te uteute ibukin kanaia maan. Aio bon Aonon Ioretan. Mangaia are e a nako ni maeka Rota ma ana utu ao ana man ikekei. A a katea mwengaia n te kaawa ae Totom.

A rangi ni buakaka kaain Totom ao e a kaunaki nanon Rota iai ibukina bwa bon te aomata ae raoiroi ngaia. E un naba te Atua n aroia. N tokina ao e a kanakoia uoman anera te Atua bwa a na tuanga Rota bwa e nang kamaunaki Totom ao te kaawa ae uakaan ae Komora, ibukin buakakaia.

A tuanga Rota ni kangai anera: ‘Kawaekoako! Kaira buum ao natim ao kawaekoai ngkami ni birinako mai ikai!’ A waeremwe n nakonako Rota ma ana utu, ngaia are a a tauaki baia irouia anera ni kaotinakoaki man te kaawa. Imwina e taku te anera are temanna nakoia: ‘Birinako ni karekea maiumi! Tai tanrikaaki. Birinako nakon te maunga, bwa kam aonga n aki mate.’

A ongo tuangaia Rota ma natina aine ao a birinako mai Totom. A aki katoka biriia, ao a aki tatanrikaaki naba. Ma e aki ongeaba buun Rota. Ngke a a raroa teutana mai Totom, ao e a katoka naba birina ma n tanrikaaki. E a riki naba buun Rota bwa te boua ae te taoro. Ko noria n te taamnei?

E kona n reke reireiara ae raoiroi man aei. E kaotaki nakoira bwa te Atua e kamaiuiia te koraki ake a ongeaba irouna, ma a na kabuanibwai ake a aki ongeaba.

Karikani Bwaai 13:​5-13; 18:​20-33; 19:​1-29; Ruka 17:​28-32; 2 Betero 2:​6-8.