KARAKI 37

Te Umwa-n-rianna N Taromauri

KO ATAIA bwa tera te kateitei aei? Bon te umwa-n-rianna ae onoti ibukin taromaurian Iehova. E aranaki naba bwa te umwa-n-rianna ae tabu. E tia raoi kateana irouia aomata ngke e koro teuana te ririki imwin kitanan Aikubita irouia. Ko ataia bwa antai ana iango ae e kairaki iai kateana?

Bon ana iango Iehova. E tuangaki Mote aroni kateana iroun Iehova ngke e mena n te Maunga are Tinai. E tua bwa e na karaoaki te umwa-n-rianna bwa e aonga ni kai uruakaki tomatomana nako. E na kai uouotaki mwakorokorona ngkana e na manga mwaing te aba nakon te tabo teuana, ao ni manga kona ni katomaaki. Mangaia are ngkana a mwaing tibun Iteraera nakon te tabo teuana n te rereua, ao a uouota te umwa-n-rianna arei.

Ngkana ko nora nanon te ruu are e uarereke i tabon te umwa-n-rianna, ao ko na nora iai te bwaoki ke te ati. E aranaki bwa te ati ni berita. Iai uoman anera ke kerubim i aona aika a karaoaki man te koora, ake a tei ni kaaitara, temanna i tabona ao temanna i tabona are teuana. E a manga korei riki Tuua Ake Tebwina te Atua i aon atibu aika baaba ibukina bwa e urua Mote are mai mwaina. A kawakinaki naba atibu aikai i nanon te ati ni berita. E kawakinaki naba i nanona te bwatoro ni manna. Ko uringnga ngkoa bwa tera te manna?

E rineaki tarin Mote are Aaron iroun Iehova bwa e na riki bwa te ibonga ae rietata. E kairiia aomata teuaei n taromauria Iehova. Ao a riki naba natina bwa ibonga.

Nora ngkanne ruun te umwa-n-rianna ane e bubura riki. E taboro iai buburan te ruu are uarereke. Ko nora te bwaoki ke te ati ae uarereke ae iai te bubu ae otinako mai iai? Aio bon te baonikarea are a kakabueka iai te bwai ae boiarara ae boikamaiu ibonga, ae arana te ribano. Iai naba te kai n taura ae tei ao iai itua taura i aona. Ao te katenua ngkanne ni bwai i nanon te ruu arei bon te taibora. Iai kariki aika 12 mwaitiia ake a kawakinaki i aona.

N oon te umwa-n-rianna ngkanne ao iai te boora ae bubura ke te betin ae onrake n te ran. A kakabongana ibonga ibukin kaitiakaia. Iai naba te baonikarea ae bubura iai. Ikai are a kakabuekaki iai maan aika mate ake taian angabwai nakon Iehova. E kateaki raoi te umwa-n-rianna aei i nukan te maeka, ao a katei aia umwa-n-rianna tibun Iteraera ni katomimia.

Te Otinako 25:​8-40; 26:​1-37; 27:​1-8; 28:1; 30:​1-10, 17-21; 34:​1, 2; Ebera 9:​1-5.