KARAKI 45
Te Rinanon Te Ioretan
NORIA! ae a a rinanon te Karaanga ae te Ioretan tibun Iteraera! Ma e ngaa ranna? Ni koauana e rangi n iabuti te karaanga aei tabeua te miniti n nako, ibukina bwa te tai aei n te ririki, ae e rangi ni bati ni kakarau. Ma ai akea ngkai ranna ni kabane! Ao a a tabe tibun Iteraera n rinanona i aon te tano ae mwau, n aron are a karaoia naba n Taari ae Uraura! E nakea ranna? Ti na noria.
Ngke e a roko te tai are a nang rinanon iai te Karaanga ae te Ioretan tibun Iteraera, ao e tuangaki Iotua iroun Iehova bwa e na kangai nakoia aomata: ‘A riai ibonga n uota te ati ni berita n rimoara. Ngkana e toko rangaia ma ranin te Karaanga ae te Ioretan, ao e a toki naba raanganakona.’
Mangaia are a tabeka te ati ni berita ibonga, ao a uotia n rimoaia aomata. Ngke a a roko n te Ioretan, ao a a bon rangata naba waeia nakon te ran. E rangi ni korakora raangan te ran n te tai aei ao e nano. Ma n te tai are e bon toko naba waeia ma te ran, ao e a bon toki naba raanganakona! Bon te kakai baei! E a tia ni katoka butin te ran Iehova. Mangaia are n te tai ae waekoa ao ai bon akea naba te ran n te karaanga!
A nako kabin raoi te karaanga are ai akea ranna arei, ibonga ake a uouota te ati ni berita. Ko nora taamneia? I nanon aia tai n tei iai, ao a a bane tibun Iteraera n rinanon te Karaanga ae te Ioretan i aon te tano ae mwau!
Ngke a a tia aomata ni kabane n rinanona, ao e a tuangaki Iotua iroun Iehova bwa e na tuangia 12 mwaane aika a aintoa ni kangai: ‘Ruo n te karaanga nakon te tabo are a tei iai ibonga ma te ati ni berita. Ao anai atibu aika 12 mwaitiia, ao katei n te tabo ae kam na tiku iai n tairiki. Rimwi riki n taai aika a na roko, ngkana a titiraki natimi bwa baikara atibu aikai, ao kam na tuangia taekan are e a tia n toki ngkoa raanganakon te ran, ngke e rinanon te Ioretan ana ati ni berita Iehova. Atibu aikai boni kanuringan te kakai aei!’ E katei naba atibu Iotua aika 12, i kabin te karaanga ike a tei iai ibonga.
N tokina ao e a tuangia ibonga Iotua ake a uouota te ati ni berita ni kangai: ‘Aerake man te Ioretan.’ N te tai are a aerake iai, ao e a bon okira naba arona te karaanga arei ni manga raanganako ranna.