KARAKI 47
Te Tia Iraa I Iteraera
NORA te bwai ae taunna te mwaane aei n ana umwa-n-rianna! Bon te kunnikai ae tamaroa, ao te koora ma mwakorokoro n tirewa. E uotii nako man te kaawa ae Ieriko. Ma tera ngkoa ae e riai ni karaoaki ma bwain Ieriko aikai? Ko uringnga?
A riai ni kamaunaki bwaai, ma te koora ao te tirewa e riai n anga te aba nakon ana umwa-n-rianna ae tabu Iehova. Mangaia are a aki ongeaba aomata aikai iroun te Atua. A a tia n iraea ana bwai te Atua. Aran te mwaane aei bon Akan, ao naaka i rarikina boni kaain ana utu. Ti na noria bwa tera ae riki.
Imwin iraean baikai iroun Akan, ao e a kanakoia aomata tabeman Iotua bwa a na buakana te kaawa ae Ai. Ma a konaaki n te buaka. A tiringaki tabeman, ao a birinako ake nikiraia. E rangi n nanokawaki Iotua. E wene ni bobaraki i aontano ao e tataro nakon Iehova ni kangai: ‘E aera ngkai ko kariaia bwa e na riki aei nakoira?’
E kaeka Iehova ni kangai: ‘Teirake! E a tia ni bure Iteraera. A anai bwaai ake a riai ni kamaunaki ke a riai n anga aomata nakon ana umwa-n-rianna ae tabu Iehova. A iraea te kunnikai ae tamaroa ao a karabaa. N na aki kakabwaiai ngkami ni karokoa kam kamaunai, n ikotaki naba ma te aomata are e anai baikai.’ E taku Iehova bwa e na kaota te aomata ane e buakaka anne nakon Iotua.
Mangaia are e a botiia aomata nako Iotua, ao Iehova e a rinea te mwaane are e buakaka ae arana Akan. E taku Akan: ‘I a tia ni bure. I nora te kunnikai ae tamaroa, ao te koora ma mwakorokoro n tirewa. I rangi ni mataiakin ngaia are I a anai naba. Ko na nori bwa I tauni i aan au umwa-n-rianna.’
Ngke a a kuneaki baikai ma n uotaki nakon Iotua, ao e taku nakon Akan: ‘E aera ngkai ko karekeira n te kangaanga? Ngkai e nang manga karekeko Iehova n te kangaanga!’ Ikanne are e a karebanaki iai Akan ma ana utu irouia aomata ni kabane ni karokoa mateia. Tiaki e oti n anne bwa ti bon riai n aki anai bwaai aika tiaki ara bwai?
Imwina ao a a manga mwananga naba Iteraera bwa a na buakana Ai. N te tai aei, e a buokiia ana aomata Iehova, ao a a tokanikai n te buaka.