KARAKI 54

Te Kabanea N Aintoa

KO ATAA aran te mwaane ae te kabanea n aintoa are e a tia ni maiu ngkoa? Bon te tia moti ae arana Tamton. Bon Iehova are e angan Tamton korakorana. E a kaman tuangaki tinan Tamton iroun Iehova ni kangai: ‘E nang reke natim te mwaane. E na boni kaira te mwakuri ni kamaiuia Iteraera mairouia I-Biritia.’

I-Biritia bon aomata aika buakaka aika a maeka i Kanaan. E bati aia tia buaka, ao bon taani karawawataia tibun Iteraera. N te taina ngke e mwananga Tamton nakon te tabo are a maeka iai I-Biritia, ao e a kaitiboo naba ma te raian ae bubura ae bekorara nakoina. Ma e kamatea te raian arei Tamton ni baina. E kamateia naba bubua ma bubua kaain Biritia.

Imwina riki ao Tamton e a tangira te ateiaine ae arana Terira. A berita mataniwia I-Biritia nakon Nei Terira bwa ngkana e kaongoia bukin rangi n aintoan Tamton, ao a na anganna kaka 1,100 mwakorokoro n tirewa, ngaiia n tatabemania nako. E kani karekei mwaane aikai ni kabane Nei Terira. Bon tiaki te rao ni koaua nakon Tamton, ke nakoia ana aomata te Atua. Mangaia are e a kekeraanako bukin rangin aintoan Tamton.

N tokina ao e a tuangaki Nei Terira iroun Tamton taekan te baere raba are e karekea korakorana. E taku: ‘E aki kokoreaki irau. Man te tai are I bungiaki iai ao e rineai te Atua bwa ana toro ae okoro ae te Natiraite. Ngkana e koreaki irau ao e a nako naba korakorau.’

Ngke e a ataa aei Nei Terira, ao e a kamatua naba Tamton i aon toaniwaena. Imwina ao e a wetea te mwaane temanna bwa e na rin ni korea irana. Ngke e a uti Tamton, ao ai bon akea korakorana. A rinnakoia I-Biritia ao a taua. A autii kanoani matana ao a a karikia bwa aia kaaunga.

N te bong teuana ao a karaoa aia bukamaru ae bubura I-Biritia, bwa a na taromauria atuaia ae Takon, ao a kaotinakoa Tamton man te matawariki bwa a na bwainingareia. Man te tai are a moani kamatawarikia iai ni karokoa te tai anne ao e a manga mwarairai naba irana. E taku Tamton nakon te teinimwaane are e taataua baina: ‘Kairai bwa N na taui boua ake e tei mai iai te auti aei.’ E tataro Tamton ibukin reken korakorana mairoun Iehova, ao e taui boua akekei. Imwina ao e a takarua naba ni kangai: ‘Kariaia bwa N na mate ma I-Biritia.’ Mwaitiia I-Biritia ake a bukamaru bon 3,000, ao ngke e notui boua akekei Tamton, ao e a ingu nako naba te auti arei, ma ni kamateia aomata ake a buakaka ake iai ni kabane.

Taani Motiki-taeka mwakoro 13 nakon 16.