KARAKI 66

Ietebera​—te Uea N Aine Ae Buakaka

IMWIN maten te Uea are Ieroboam, ao a a boni bubuakaka naba uea n te tautaeka n uea ni barongan aika tebwina mai meang, ae Iteraera arana. Te Uea ae Aaba boni karoton raoi te buakaka i buakoia. Ko ataia bwa bukin tera? Teuana oin bukina boni mairoun buuna are Ietebera, are te Uea n Aine ae buakaka.

Nei Ietebera bon tiaki kaain Iteraera. Bon natin uean Titon. E taromauria te atua ni kewe ae Baara, ao e anaa nanon Aaba ma kaain Iteraera aika bati bwa a na taromauria naba Baara. E riribaa Iehova Ietebera ao e tiringia naba ana burabeti aika bati. Iai tabemwaang ake a a karabarabaia n nangananga ni bwaa bwa a aonga n aki tiringaki. Ngkana iai te bwai ae e tangiria Nei Ietebera, ao e kona n tiringa te aomata ibukin kani karekeana.

N te bong teuana ao e a rangi n nanokawaki te Uea ae Aaba. Mangaia are e titirakinna Ietebera ni kangai: ‘E aera ngkai ko nanokawaki n te bong aei?’

E kaeka Aaba ao e taku: ‘I nanokawaki n ana taeka Nabota nakoiu. I kani kabooa ana nne ni kurebe ma e taku bwa e aki kona n anganai.’

E taku Ietebera: ‘Tai raraoma, bwa N na karekea ibukim.’

Mangaia are e a kororeta Ietebera nakoia mwaane ake a mataniwina te kaawa are e maeka iai Nabota ni kangai: ‘Karekeia mwaane aika a buakaka bwa a na taekinna bwa e a tia Nabota, n taetaebuakaa te Atua ao te uea. Imwina kaira nako Nabota nako tinanikun te kaawa ao karebanaia n atibu ni karokoa matena.’

Ngke e a ongo Ietebera bwa e a mate Nabota, ao e a taku nakon Aaba: ‘Anaa ana nne ni kurebe Nabota bwa am bwai.’ Ko kakoauaa ae e bon riai ni katuuaeaki Ietebera ibukin karaoan te mwakuri ae kakaiaki buakakana aei?

Mangaia are n te taina, ao e a kanakoaki te mwaane ae Ieu iroun Iehova bwa e na katuuaea Ietebera. Ngke e a ongo Ietebera bwa e a roko Ieu, ao e a kabiri matana n te bwai ni katamaroa ae kirimatamata ma ni kataia ni kabotonnainea. Ma ngke e a roko Ieu ao e nora Ietebera n te winto, e a weteia naba mwaane ake n te bareti ao e kangai nakoia: ‘Karenakoa neiei!’ A ongeaba mwaane akekei n aron ae ko noria n te taamnei. A karenakoa ao ikanne are e a toki naba iai maiun te Uea n Aine ae buakaka ae Ietebera.

1 Uea 16:​29-33; 18:​1-4; 21:​1-16; 2 Uea 9:​30-37.