KARAKI 71

E Beritana Te Baretaiti Te Atua

TE TAAMNEI aei e katotonga bannan te baretaiti are e kaotia te Atua nakon te burabeti are Itaia. E maiu Itaia tabeua te tai imwin maten Iona.

Nanon te taeka ae baretaiti, te “oo-n-aroka” ke te “tabo ni kamaangang.” Tiaki ko kauringaki iai taekan te bwai are ti noria mai mwaina n te boki aei? Tiaki bon aekan te oo-n-aroka are rangi ni kan, are e karaoia Iehova ibukin Atam ma Nei Ewa? Ma e kona ni baretaiti te aonnaba ni kabutaa?

E tuanga ana burabeti are Itaia Iehova, bwa e na korea taekan rokon te baretaiti ae boou ibukia ana aomata ni kangai: ‘A na uaia ni maeka ma te rau kameanti ma tiibu. A na uaia n amwarake kaao ataei ao raian ataei, ao a na tararuaiia ataei. E na aki naba ikoaki te merimeri ae takaakaro i rarikin te naeta ae boitin.’

A bati aika taku: ‘E aki kona n riki aei, e na waaki nako naba te kangaanga n te aonnaba.’ Ma iangoa aei: Aekakira ngkoa mwengaia Atam ma Nei Ewa are e angania te Atua?

E kamaekaia Atam ma Nei Ewa te Atua n te baretaiti. Ma e bua mwengaia are rangi ni kan arei, ibukina bwa a aki ongeaba iroun te Atua, ao a a rikirake iai ni kara ao ni mate. E berita te Atua bwa e na angania aomata ake a tangiria, bwaai ake a kabuai Atam ma Nei Ewa.

N te baretaiti ae na roko, ai akea te bwai ae e na kammaraki ke n urubwai. E na kororaoi te rau iai. A na bane ni marurung aomata ao ni kukurei. E na bon roko aeka are e tangiria te Atua n te moantai. Ma ti na reiakina aron te Atua ni karokoa, imwina riki.

Itaia 11:​6-9; Te Kaotioti 21:​3, 4.