KARAKI 73
Te Kabanea N Uea Ae Raoiroi I Iteraera
AI TIBWA wanua ana ririki Iotia ngke e moana ueana ni baronga aika uoua mai maiaki, i aon Iteraera. E a bon rangi n uarereke ngkana e a riki bwa te uea. Mangaia are e a buokaki moa irouia tabeman ikawai ni kaira te natannaomata.
Ngke e a tia n uea Iotia i nanon itua te ririki, ao e a moanna n ukoukora Iehova. E toua mwin aia kairiri uea ake a raraoi n aron Tawita, Ieotiabata, ao Etekia. Ma ngke bon te roro-n-rikirake naba teuae Iotia, ao iai te mwakuri n ninikoria are e karaoia.
A a tia n rangi ni buakaka kaain Iteraera i nanon te tai ae maan. A taromauri atua ni kewe ao a bobaraki naba nakoni bouannanti. Mangaia are e a mwananga Iotia ma ana mwaane, ao e a moana katokan te taromauri ae kewe man te aba. Bon te mwakuri ae bubura te baei bwa a rangi ni bati aomata ake a taromauri atua ni kewe. Ko kona n nora Iotia ma ana mwaane ikai bwa a a urui bouannanti.
Imwina ao e a kateia mwaane aika teniman Iotia bwa a na mataniwia onobwaian ana tembora Iehova. E rikoaki te mwane mairouia aomata, ao a anganaki mataniwi aikai bwa a na kabooa iai mwin te mwakuri n onobwai are e karaoaki. Ngke a tabe ni mwakuri n te tembora, ao e a kunea naba ikekei te bwai ae rangi ni kakawaki, mataniwia ibonga are Irekia. Boni bokin te tua are e kairaki Mote iroun Iehova bwa e na koreia rimoa. E a tia ni bua i nanon ririki aika bati.
E uotaki te boki nakon Iotia, ao e tua bwa e na warekaki nakoina. Ngke e tabe ni kakauongo, ao e a tibwa ataia Iotia bwa a a tia ni kabwaka aomata n ira nanon ana tua Iehova. E rangi n rotaki n te nanokawaki iai, ngaia are e a raeuaka ana kunnikai, n aron ae ko noria ikai. E taku: ‘E a rangi n un Iehova iroura, ibukina bwa a aki kawakini tuua ara karo, aika a koreaki n te boki aei.’
E tuangaki mataniwia ibonga ae Irekia iroun Iotia bwa e na kakaaea bwa tera ae e na karaoia Iehova nakoia. E kawara Nei Ureta ae te burabeti Irekia, ao e titirakinna. E anganna te rongorongo mairoun Iehova bwa e na uotia rikaaki nakon Iotia ae kangai: ‘E na katuuaeaki Ierutarem ao aomata ni kabane, ibukina bwa a taromauri atua ni kewe, ao e a onrake te aba n te buakaka. Ma ibukina bwa ko a tia ni karaoa ae raoiroi ngkoe ae Iotia, e na roko te katuuaa aei imwin matem.’