KARAKI 77

A Rawa Ni Bobaraki

KO URINGIA ngkoa rorobuaka n ataei aika teniman aikai? Eng, bon raoraon Taniera ake a rawa ngkoa ni kana te amwarake ae aki raoiroi ibukiia. A aranaki irouia kaain Baburon bwa Tiateraka, Metiaka ao Abeteneko. Ma noriia ngkai. E aera ngkai a rawa ni bobaraki nakon te boua ae rangi ni buburakaei, n aron are a karaoia aomata nako? Ti na noria.

Ko uringi tuua ake e korei ngkoa Iehova ake a aranaki bwa Tuua ake Tebwina? E kangai te moan tua iai: ‘Ko aki riai n taromauria te atua temanna riki i rarikiu.’ A ongeaba n te tua aei rorobuaka n ataei aikai, e ngae ngke e aki bebete karaoana.

E weteia aomata aika kakannato aika bati uean Baburon are Nebukaneta, bwa a na karinea te boua ae e a tia ni kateia aei. N te tai aei ao e a tibwa tia n tuangia aomata ni kabane ae kangai: ‘Ngkana kam ongo tangin te konete ma te aabi ma bwaai ni katangitang riki ake tabeua, ao kam a bobaraki naba ma n taromauria te boua ae te koora aei. Ane aki bobaraki ma n taromauri, ao e na karenakoaki nakon te nne ni kanaiai are e kabuebue arei ngkai naba.’

Ngke e a ataia Nebukaneta bwa a aki kani bobaraki Tiateraka, Metiaka, ao Abeteneko, ao e a rangi n un. E tua bwa a na kairaki nakoina. E a manga angania riki aia tai ni bobaraki. Ma a onimakina Iehova rorobuaka n ataei aikai ao a taku nakon Nebukaneta: ‘E kona ni kamaiura Atuara are ti toro irouna. Ma ngkana e aki kamaiura, ao ti na bon aki naba bobaraki nakon am boua ane te kora anne.’

Ngke e ongo aei Nebukaneta ao e a rangi n un riki. E uakaan te nne ni kanaiai, mangaia are e a tua ni kangai: ‘Karakaa kabuebuen te nne ni kanaiai anne itua te tai nakoni kabuebuena are mai mwaina!’ Imwina ao e a tua kabaeakia Tiateraka, Metiaka ao Abeteneko irouia ana aomata ake taiani kabanea n aintoa, ao a a karenakoia naba n te nne ni kanaiai. E a rangi ni kabuebue te nne ni kanaiai, n te aro are a a mate mwaane ake a aintoa akekei ni kabuebuen te ai. Ma tera aroia rorobuaka n ataei ake teniman ake a karenakoia iai?

E taraa nanon te nne ni kanaiai te uea ao e a rangi ni maaku. E titiraki ni kangai: ‘Tiaki ti kabaeia mwaane aika teniman ao ni karenakoia nako nanon te nne ni kanaiai are e kabuebue arei?’

A kaeka ana toro ni kangai: ‘Eng, ti karaoa anne.’

E a manga taku: ‘Ma I a noriia ngkai aman mwaane n nakonako i nanon te ai. E a bwara kabaeaia, ao akea rotakia n te ai. Ma are te kaaman titeboo taraana ma te anera.’ E keerakea mataroan te nne ni kanaiai te uea ao e a takarua naba ni kangai: ‘Tiateraka! Metiaka! Abeteneko! Otinako, ngkami aika ana toro te Atua ae Moan te Rietata!’

Ngke a a otinako, ao a a bane n noraki irouia aomata bwa a aki bue. Imwina ao e taku te uea: ‘E na neboaki Atuaia Tiateraka, Metiaka, ao Abeteneko! E a tia ni kanakomaia ana anera ao e kamaiuia, ibukina bwa a rawa ni bobaraki ma n taromaurii atua riki tabeua i rarikin are bon oin Atuaia.’

E aki ngkanne raoiroi bwa ti na toua mwin te katoto aei, ni kakaonimaki naba nakon Iehova?

Te Otinako 20:3; Taniera 3:​1-30.