KARAKI 78
Te Koroboki I Aon Te Oo
TERA ae riki ikai? E a boo atin te baka n amwarake. E kaoiia bwakuaku aika tengaa mwaitiia uean Baburon, bwa iruwa. A kabonganai mwangko aika koora ma tirewa, ao boora ake a uotaki nako man ana tembora Iehova i Ierutarem. Ma e a karina naba ni kaoti bain te aomata n taarere i aon te ea, ao e a moana naba ana koroboki i aon te oo. A a bane ni maaku aomata.
N te tai aei ao e a uea tibun Nebukaneta are Beretiata. E takaruaia ana tia rabakau bwa a na karinaki, ao e taku: ‘Ane kona ni wareka te taetae ane koreaki anne, ao n tuangai nanona, ao N na anganna bwaintangira aika bati, ao N na karikia naba bwa te kateniman ni kakannato n te tautaeka.’ Ma bon akea naba temanna ana tia rabakau ae kona ni wareka are e mwakoro i aon te oo, ao n tuangnga naba nanona.
E ongongo te kakarongoa tinan te uea, ngaia are e a rinnako n te ruu n amwarake are bubura ao n taku nakon te uea: ‘Taiaoka ma tai maaku. Iai te aomata i abam ae e atai atua aika tabu. Ngke e uea tibum are Nebukaneta, ao e kateia bwa te mataniwi i aoia ana taan rabakau. Arana bon Taniera. Weteia bwa e na nakomai, ao e na tuangko ae nanonaki n te baerei ni kabane.’
Mangaia are e a karinaki Taniera n te tai naba arei. Imwin rawan Taniera ni butimwaei bwaintangira, ao e a moana karakinan bukin kabwakaan Nebukaneta are tibun Beretiata man te nakoa n uea. E taku Taniera: ‘E rangi ni kamoamoa, ngaia are e a katuuaeaki iroun Iehova.’
Imwina e taku Taniera nakon Beretiata: ‘Ma ngkoe e ngae ngke ko atai bwaai ni kabane ake a riki nakon Nebukaneta, ma ko boni kamoamoa naba n arona. Ko kabonganai mwangko ma boora ake bwain ana tembora Iehova, ma ni mooi iai. Ko neboia atua aika a karaoaki man te kai ao te atibu, ao ko aki karinea ara tia Karikiriki ae Kakannato. Anne bukina ae e a karokoa iai te koroboki aei nakoim te Atua.
E taku Taniera: ‘Aikai taeka aika a koreaki: “MENE, MENE, TEKERI, UBARETIN.”
Nanon MENE e a tia te Atua n tiatiana mwaitin am ririki n uea, ao e nang katokia. Nanon TEKERI e a tia ni baireaki taekam kaanga n te bwai ni katine, ma ni motikaki taekam bwa ko buakaka. Nanon UBARETIN bwa e nang bwaka ueam ao a na anganaki I-Miria ao I-Botia.’
Ngke e kume n taetae Taniera, ao a a tia I-Miria ma I-Botia ni moana niniakin Baburon. A taua te kaawa ao a tiringa Beretiata. E kakoroaki bukin te koroboki are i aon te oo, n te tairiki naba arei! Ma tera ngkanne ae e na riki nakoia tibun Iteraera? Imwain ae ti ukeria nako bwa ti aonga n ataia, ti na noria moa bwa tera ae riki nakon Taniera.