KARAKI 85
Bungian Iesu Ni Nneia Maan
KO ATAIA bwa antai te merimeri aei? Bon Iesu. E a tibwa tia ni bungiaki ni nneia maan. Te tabo aei bon te kateitei teuana are a kawakinaki iai maan. E kawenea Iesu Maria ni nneni kanaia taongki ma maan riki tabeua. Ma e aera ngkai a a mena i buakoia maan, Maria ma Ioteba? E tau te tabo aei ibukin bungian te merimeri?
E bon aki. Ma aio bukin menaia ikai: E karaoa te tua te tia tautaeka i Rom ae Kaitara Aukutito, bwa a na bane n okira aia kaawa aomata ake a bungiaki iai ibukin te koroara. E bungiaki Ioteba i Betereem. Ma ngke e a roko i Betereem ma Maria, ao ai akea te auti ae mwaawa ibukiia. Ngaia are a a nako n tiku i rarikia maan. Ao n te bong raoi arei, e a bungia iai Iesu Maria! Ma ko kona n nora te merimeri bwa e marurung.
Ko noriia taani kawakin tiibu akana a roko bwa a na kawara Iesu? A mena n te tawaana n te tairiki anne bwa a tantani i rarikia aia tiibu, ngke e a tii ota naba rarikia. Bon te anera ae kaoti! A a rangi ni maaku taani kawakin tiibu aikai. Ma e taku te anera nakoia: ‘Tai maaku! Iai te rongorongo ae raoiroi ae N na kaongoingkami. N te bong aei, ao e a bungiaki Kristo ae te Uea i Betereem. E na boni kamaiua te botannaomata! Kam na noria bwa e niniraki n te kunnikai ao e kaweneaki ni nneni kanaia maan.’ N te tai arei ao a a roko naba anera aika mwaiti ma n nebonebo nakon te Atua. Mangaia are a a nako taani kawakin tiibu akekei ni kakaaea Iesu, ao ngkai a a kunea.
Ko ataia bwa bukin tera ngkai e rangi n rianako okoron Iesu? Ko ataia bwa antai raoi ngaia? Uringnga are n te moani karaki n te boki aei ao ti kaongoaki iai taekan ana moan Nati te Atua. Te Nati aei are e mwakuri ngkoa ma Iehova, ni karika karawa ma aonnaba ao bwaai ni kabane. Te Nati aei bon Iesu!
E anaa maiun Natina aei Iehova mai karawa, ao e karinna i nanoni biroton Maria. N te tai naba arei ao e a moanna n rikirake te merimeri are i birotona, n aekakin rikirakeia merimeri ni birotoia tinaia. Ma te merimeri aei bon Natin te Atua. N tokina ao e a bungiaki Iesu ikai, ni nneia maan i Betereem. Ko a ataa ngkanne bukin ingaingaia anera ni kaongoia aomata are e a tia ni bungiaki Iesu?