KARAKI 87

Iesu N Te Tembora

NORA te teinimwaane ae taetae nakoia unimwaane aikai. Bon taan reirei n ana tembora te Atua i Ierutarem. Ao te teinimwaane anne bon Iesu. E a moanna riki n ikawai. Ngkai ai 12 ana ririki.

A rangi ni kubanako taan reirei aikai n rabakaun Iesu i aon taekan te Atua ao baika koreaki n te Baibara. Ma e aera ngkai akea Ioteba ao Maria ikai? A mena iia? Ti na noria.

Ni katoa ririki e kaakairiia kaain ana utu Ioteba nako Ierutarem, ibukin te botaki ae okoro are te Toa are te Riao. E rangi n abwabwaki te mwananga mai Natareta nako Ierutarem. Akea ae iai ana motokaa, ao akea naba taian turein bwa akea baikai n taai akekei. Angiia aomata a rianna, ao e tangiraki tao tenua te bong n rianna, bwa a aonga n roko i Ierutarem.

N te tai aei ao e a bati natin Ioteba. Mangaia are iai tarin Iesu ao mwanena aika a uarereke ake a riai n tararuaki. Ngkai, a a tia ni moana okiia Ioteba ao Maria ma natiia nako Natareta. A taku n aia iango bwa e ira naba te mwananga n oki arei Iesu. Ma ngke a a motirawa ni banen te bong arei, ao a aikoa kona n nora kabaangin Iesu. A kakaaea i buakoia aia koraki ma raoraoia, ma bon akea naba i rarikia! Mangaia are a a manga okira Ierutarem ni kakaaea ikekei.

N tokina ao a a kunea ikai i rarikia taan reirei. E ongora Iesu irouia ao e titirakinia naba. A a rangi ni mimi aomata ni kabane ni wanawanana. Ma e taku Maria nakoina: ‘Natiu, e aera ngkai ko karaoa aei nakoira? Ko ataia? Ti rangi n raraoma ngke ti kakaaeko ngai ma tamam.’

E kaeka Iesu ni kangai: ‘Bwa e aera ngkai kam kakaaeai? Kam bon aki ataia ae N na bae ni mena n ana auti Tamau?’

E kani memena Iesu n te tabo are e na reiakina iai taekan te Atua. Tiaki anne naba ae ti riai n uaiakinna? N ana tabo Iesu i Natareta ao e kakaonimaki ni kaakaea te taromauri ni katoa wiki. E rangi ni bati reireiana ae karekea man te Baibara, ibukina bwa e teimatoa ni kakauongo raoi. Ti riai n uaiakina anuan Iesu aei, ao n toua naba mwin ana katoto.

Ruka 2:​41-52; Mataio 13:​53-56.