KARAKI 88

E Bwabetitoa Iesu Ioane

NORA te taobe ae tiku i aon atun te mwaane aei. Teuaei bon Iesu. Tao ai 30 ngkai ana ririki. Ao te mwaane are i rarikina bon Ioane. Ti a tia n ongo taekana mai mwaina. Ko uringa ngkoa Maria ngke e nako ni kawara Eritabeta are ana koraki, ao te merimeri are i nanon biroton Eritabeta, e ewewe ni kukurei? Te merimeri are e tuai ngkoa ni bungiaki arei bon Ioane. Ma tera ngkai ae a karaoia Ioane ao Iesu?

E a bon tibwa tia ni kateboaki Iesu n te Karaanga are te Ioretan iroun Ioane. Aio aroni bwabetitoan te aomata. Te moanibwai e na kateboaki i aan te ran, ao imwina e na manga kaotirakeaki. E aki toki ni kaakaraoa aei Ioane nakoia aomata, ngaia are e a aranaki iai bwa Ioane te tia Bwabetito. Ma e aera ngkai e a bwabetitoaki Iesu iroun Ioane?

E karaoa aei Ioane bwa e bon roko Iesu n tuangnga bwa e na bwabetitoia. E bwabetitoia aomata Ioane ake a kani kaotia bwa a a tia n raraoma man karaoan ae buakaka. Ma iai te bure ae e a tia ni karaoia Iesu, ae e riai n raraoma iai? Akea. E aki bure Iesu ibukina bwa bon Natin te Atua ae roko mai karawa ngaia. Mangaia are e butiia Ioane bwa e na bwabetitoia ibukin te bwai teuana. Ti na noria bwa tera bukina.

Imwain rokon Iesu iroun Ioane, ao bon te kabenta ngaia. Te kabenta bon te tia karaobwai man te kai, n aron te taibora ma te kaintekateka n aekana nako. Buun Maria are Ioteba bon te kabenta, ao e reireina Iesu bwa e na kabenta. Ma e aki kanakoa Natina Iehova nako aon te aba bwa e na riki bwa te kabenta. Iai tabena ae okoro are e riai ni karaoia, ao e a roko ngkai te tai are e nang moana karaoana. Mangaia are ibukina bwa e nang tauraoi ni karaoa nanon Tamana, e a tuanga moa Ioane Iesu bwa e na bwabetitoia. E kukurei te Atua n aei?

Eng e kukurei, ibukina bwa ngke e otirake Iesu man te ran, ao e a kangai naba te bwana mai karawa: ‘Aio Natiu ae I kakatonga irouna.’ E taraa naba n uki karawa ao e ruo te taobe nako aon Iesu. Ma tiaki te taobe ni koaua bwa bon tii katotongana. Bon te taamnei ae raoiroi mairoun te Atua.

A rangi ni bati bwaai ake e riai n iangoi Iesu, ngaia are e a nakon te tabo ae akea kaaina n tiku iai i nanon 40 te bong. Ikekei are e a kawaraki iai iroun Tatan. E kataia Tatan ni kaira Iesu tenua te tai bwa e na karaoa te mwakuri ni kaitaraa ana tua te Atua, ma e rawa ni karaoia Iesu.

Imwin anne ao e a oki Iesu, ike e a kaitiboo iai ma mwaane tabeman ake a a riki bwa taani moan iriria, ke taan rimwina. Tabeman mai buakoia bon Anterea, Betero (arana naba Timon), Biribo, ao Natanaera (arana naba Baretoromaio). E mwananga Iesu ma taan rimwina aika boou aikai nako Kariraia. A motirawa n ana kaawa Natanaera i Kariraia ae Kana. Ikanne are e a nako iai Iesu ni kaea te botaki ni mare ae bubura, ao e a karaoa naba iai ana moani kakai. Ko ataia bwa tera ana kakai are e karaoia? E bita te ran nakon te wain.

Mataio 3:​13-17; 4:​1-11; 13:55; Mareko 6:3; Ioane 1:​29-51; 2:​1-12.