KARAKI 108
Te Mwananga Nako Tamateko
KO ATAIA bwa antai te aomata ane wene i nanon te kawai anne? Bon Tauro. Uringnga are ngaia ngkoa are e tataraa aia kooti mwaane ake a karebana Tetebano. Nora ngkanne te oota ane e otamwaaka anne! Tera ae riki?
Imwin kamatean Tetebano, ao e a kaira te waaki Tauro ibukin kakaaeaia taan rimwin Iesu bwa a na bwainikirinaki. E katoai auti nako ao ni katikiia mai iai ni kamatawarikia. A a birinako nakon aaba tabeua taan rimwin Kristo aika bati, ao ni moana aia mwakuri n tataekina te ‘rongorongo ae raoiroi’ ikekei. Ma e nako naba Tauro ni kaawa tabeua ni kakaaeia iai taan rimwin Iesu. N te tai aei ao e na nako Tamateko. Ma i aoni kawaina, ao aio te bwai ae kamimi ae riki:
E a tii karina naba ni bwakaraki Tauro n te oota mai karawa, n te aro are e a bwaka i aontano ae ti noria ikai. Imwina ao e a taku naba te bwanaa: ‘Tauro, Tauro! E aera ngkai ko bwainikirinai?’ A nora naba te oota mwaane ake raon Tauro, ma n ongo naba tangin te bwanaa, ma a aki ataa te bwai ae taekinaki.
E titiraki Tauro ao e taku: ‘Antai ngkoe, te Uea?’
E a manga taku riki te bwana: ‘Iesu ngai, ae ko bwainikirinna.’ E taekina aei Iesu ibukina bwa Tauro e bwainikirinia taan rimwina, ao e namakina naba te maraki iai Iesu.
E titiraki Tauro n te tai aei ao e taku: ‘Tera ae N na karaoia te Uea?’
E taku Iesu: ‘Teirake ao naako Tamateko. Ikanne ae ko na tuangaki iai te bwai ae ko riai ni karaoia.’ Ngke e a teirake Tauro ma ni kaurea matana, ao e a aki kona n noraaba. E a mataki! Mangaia are a a taua baina mwaane akekei, ni kairia nako Tamateko.
E a manga taetae Iesu nakon temanna te tia rimwina i Tamateko ao e taku: ‘Anania, teirake ao naako nakon te kawai ae arana Eti. Nakon ana auti Iuta ao titiraki iai taekan te mwaane ae arana Tauro. I a tia n rinea teuanne bwa au toro ae okoro.’
E ongeaba Anania. Ngke e a kaitiboo ma Tauro, ao e a katokaa baina i aona ao e taku: ‘E kanakomaiai te Uea bwa ko aonga ni manga noraaba, ao ni kaonaki n te taamnei ae raoiroi.’ N te tai arei ao a bwaka mai matan Tauro, bwaai aika ai aron iina, ao e a manga noraaba.
E kabonganaki Tauro n te aro ae korakora, bwa e na uarongorongo nakoia aomata ma natannaomata aika bati. Imwina riki, e a kinaaki n arana ae te abotoro Bauro, ao ti na reiakini taekana aika bati. Ma ti na noria moa bwa tera are e kanakoaki Betero bwa e na karaoia iroun te Atua.
Mwakuri 8:1-4; 9:1-20; 22:6-16; 26:8-20.