KARAKI 109

E Kawara Korenerio Betero

ANE tei anne bon te abotoro Betero, ao akana i akuna bon raoraona. Ma e aera ngkai e bobaraki te mwaane anne nakon Betero? E riai ni karaoa anne? Ko ataia bwa antai?

Te mwaane aei boni Korenerio. Bon tautian Rom ngaia. E aki kinaa Betero Korenerio ma e tuangaki bwa e na kaoa nakon ana auti. Ti na noria bwa e a kanga naba n riki aei.

Taan moan rimwin Iesu bon I-Iutaia, ma Korenerio bon tiaki te I-Iutaia. Ma e ngae n anne e bon tangira te Atua, ao e tatataro nakoina, ao ni kaakaraoa naba te atataiaomata nakoia aomata. N te bwakantaai teuana, ao e a kaoti te anera nakoina ao e kangai: ‘E kukurei iroum te Atua, ao e na kaekai am tataro. Kanakoia mwaane bwa a na kawaekoaa te aomata ae arana Betero. E mena i Iobe n ana auti Timon ae maeka i rarikin taari.’

N te tai naba arei ao e a kanakoia tabeman mwaane Korenerio bwa a na kakaaea Betero. N te bong are imwina, ngke a a uakaan mwaane akekei ma Iobe, ao e tabe ni mena Betero i taubukin ana auti Timon are borababaua. Ikekei are e a kamiiaki iai Betero iroun te Atua bwa aongkoa e nora te kunnikai ae buburakaei ae nnaki mai karawa. I nanon te kunnikai aei, ao iai maan iai n aekaia nako. Ni kaineti ma ana tua te Atua ao a aki itiaki ibukin te amwarake, ma e ngae n anne e taku te bwanaa are e roko: ‘Teirake Betero. Tiringnga ao kanna.’

E kaeka Betero ao e taku: ‘I aki! I tuai ni kakana ae aki itiaki mai mwaina.’ Ma e taku te bwanaa nakon Betero: ‘Katoka atongakin bwaai ake e kaitiaki ngkai te Atua bwa a aki itiaki.’ E riki aei tenua te tai. Ngke e tabe n iango Betero bwa baikara nanon baikai ni kabane, ao a roko raoi n te auti ana aomata Korenerio ake e kanakoia, ma n titiraki ibukin Betero.

E ruo rikaaki Betero ao e taku: ‘Ngai te aomata are kam kakaaea. Tera bukin rokomi?’ Ngke a a kabwarabwaraa nakoina taekan te anera are e tuanga Korenerio bwa e na kaoa Betero nakon ana auti, ao e a kariaia bwa e na iriia Betero. N te bong are imwina ao e a mwananga Betero ma raoraona bwa a na kawara Korenerio i Kaitareia.

E botiia ana koraki Korenerio ao raoraona ake e kaan ma ngaiia. Ngke e a roko Betero, ao e a nako Korenerio ni kawaria. E bwaka nako aontano ao e bobaraki i waen Betero n aron ae ko noria ikai. Ma e taku Betero: ‘Teirake, bwa bon te aomata naba ngai.’ E kaotaki n te Baibara bwa e aki riai ni bobaraki te aomata n taromauria raona n aomata. Ti riai n taromauria Iehova n tii ngaia.

E angareirei Betero nakoia te koraki ake a ikotaki. E taku: ‘I a ataia bwa ngaia e kariaia te Atua bwa a na toro irouna aomata nako.’ Ao i nanon ana tai n taetae ni kawai, ao e a karuoa ana taamnei ae raoiroi te Atua, ao a a bane aomata akekei n taetae n taetae aika kakaokoro. A kubanako I-Iutaia ake taan rimwin Iesu n te baei ake raon Betero, ibukina bwa n aia iango ao a tii akoaki I-Iutaia iroun te Atua. Mangaia are e a reke reireiaia n aei bwa e aki kaokoroia aomata te Atua ake n te reeti teuana, bwa aongkoa e akoiia riki kaain te reeti teuana. E aki raoiroi anne bwa ti na ururingnga ngaira ni kabane?

Mwakuri 10:​1-48; 11:​1-18; Te Kaotioti 19:10.