KARAKI 110

Timoteo​—Buokan Bauro Ae Boou

TE ROROBUAKA n ataei ae ko noria ikai ma te abotoro Bauro, bon Timoteo. E maeka Timoteo ma ana utu i Rutetera. Aran tinana Eunike ao tibuna te unaine, Roiti.

Aio ai bon ana katenua n tai Bauro ni kawara Rutetera. Tao teuana tabun te ririki n nako, ao a moan roko ikai Bauro ao Barenaba ibukin aia uarongorongo. Ao ngkai e a manga oki naba Bauro ma raoraona ae Tira.

Ko ataa te bwai ae e taekinna Bauro nakon Timoteo? E titiraki ni kangai: ‘Ko aki kan raonira ngai ma Tira? E manena am ibuobuoki bwa ko na uarongorongo nakoia aomata n taabo ake a raroa nako.’

E kaeka Timoteo ao e taku: ‘Eng, I kukurei n nako.’ Mangaia are n te tai ae waekoa ao e a kitania ana utu Timoteo ao n iriia nako Bauro ao Tira. Ma imwain ae ti nora aroni mwanangaia, ti na noria moa bwa tera ae riki nakon Bauro. Tao ai 17 ngkai te ririki imwin kaotin Iesu nakoina n te kawai nako Tamateko.

Uringnga are e na nako Tamateko Bauro bwa e na bwainikirinia taan rimwin Iesu iai, ma ngkai e a manga riki ngaia bwa te tia rimwin Iesu! Imwina riki ao a a iangoia taiani kairiribai tabeman bwa a na kamatea Bauro, ibukina bwa a aki kukurei n ana reirei ibukin Iesu. Ma a buoka Bauro bwa e na rabanako taan rimwin Kristo tabeman. A karinna i nanon te bwaene, ao a nnaia rikaaki nako tinanikun oon te kaawa.

Imwina ao e a nako n uarongorongo Bauro i Antioka. Ikai are a a moanna n aranaki iai taan rimwin Iesu bwa Kristian. A a manga nako mai Antioka Bauro ao Barenaba, n nako n uarongorongo ni kaawa ake tabeua ake a raroa riki. Teuana mai buakon kaawa ake a kawari, bon ana tabo Timoteo.

N te tai aei ae tao ai teuana te ririki n nako, ao e a manga roko naba Bauro n ana kauoua ni mwananga n okira Rutetera. Ngke a a nako Timoteo ma Bauro ao Tira, ko ataia bwa a nakea? Taraa te mwabe, ao ti na nori taabo tabeua iai.

A nako moa Ikonio ae aki rangi n raroa, ao imwina a nakon te kaawa are Antioka. Imwina ao a nako Teroa, ao imwina Biribi, Tetaronike, ao Beroia. Ko nora Atenai ane i aon te mwabe? E uarongorongo Bauro ikekei. Imwin anne ao a kabanea teuana ao te iterana te ririki, n uarongorongo i Korinto. Imwina ao a katoki naba i Ebeto. Imwina ao a a okira Kaitareia n te kaibuke, ao ni manga nako Antioka, ike e a tiku iai Bauro.

Mangaia are e a tia ni mwananga Timoteo i nanon te raroa ae bubua ma bubua te kiromita, ni buoka Bauro n tataekina ‘te rongorongo ae raoiroi,’ ao ni katei ekaretia ni Kristian. Ngkana ko ikawai, ko kan riki bwa ana toro te Atua ae kakaonimaki n aron Timoteo ke ko aki?

Mwakuri 9:​19-30; 11:​19-26; mwakoro 13 nakon 17; 18:​1-22.

[Mwabe]

Rom

Merita

Tetaronike

Beroia

Korinto

Biribi

Atenai

Kirete

Teroa

Ebeto

Mireto

Korote

Antioka

Ikonio

Rutetera

Antioka

Kubero

Tamateko

Kaitareia

Iobe

Ierutarem

TAARI ARE ABWABWAKI

(MERITERENIAN)