Mwakoro 9
Aron Ataakin ae Ti a Maeka ni “Boong Aika Kaitira”
1, 2. Ti kanga n ataia bwa tao ti a mena ni boong aika kaitira ke ti aki?
TI KANGA ni koaua raoi bwa ti a maeka n te tai are e nang ekaki nako iai aia waaki ni kairiri aomata n Ana Tautaeka n Uea te Atua? Ti kanga n ataia bwa e a rangi ni kaan ngkai te tai are e nang katoki iai buakaka ao karawawataki ni kabane te Atua?
2 A kan atai baikanne taan rimwin Iesu Kristo. A titirakinna bwa “tera kanikinaean” manga menana ma aomata bwa te Uea n ana Tautaeka ao “tokin te waaki i aon te aba.” (Mataio 24:3, NW) E kaekaia Iesu ni kabwarabwarai baika a na riki n te aonnaba ni kaotan ae e a mena te botannaomata n “tain te toki,” ae “boong aika kaitira” ni kaineti ma te waaki i aon te aba. (Taniera 11:40; 2 Timoteo 3:1) Ti a tia n nora te kanikina ae bati mwakorona n ara tai aei? Eng, ti noria bwa e rangi ni mataata!
Buaka n te Aonnaba
3, 4. A kanga buaka n te tienture ae nako ni botau ma ana taetae ni burabeti Iesu?
3 E taetae ni burabetiia Iesu bwa “e na tei rake te botanaomata teuana n eka nako te botanaomata teuana, ao uean te uea temanna n eka nako uean te uea temanna.” (Mataio 24:7) N 1914 ao e a taonaki nako te aonnaba n te buaka ae a boo atiia iai botannaomata ao tautaeka, ae te waaki ae a tuai ni buaka aomata iai mai mwaina. Ni kaineti ma anne, a aranna taani korea rongorongon rimoa bwa te Buaka ae Korakora. Bon te moani buaka ae akea n ai arona, ae te moani buaka ae kabutaa aonnaba. A bua maiuia iai 20,000,000 tabun tautia ma aomata, ae te mwaiti ae korakora riki nakoni buaka aika nako.
4 E kanikinaeaki moanakin boong aika kaitira n te Moani Buaka Are Kabutaa Aonnaba. E taku Iesu bwa boni “moan rikini maraki” te waaki aei n ikotaki ma waaki tabeua riki. (Mataio 24:8) E boni kakoauaki anne, ibukina bwa e a karuanikai riki te Kauoua ni Buaka Are Kabutaa Aonnaba, bwa a bua maiuia 50,000,000 tabun tautia ma aomata iai. N te ka-20 n tienture, e raka i aon 100,000,000 aomata ake a mate n taiani buaka. Te mwaiti aei bon aua te tai okiokin mwaitiia aomata ake a mate ni buaka ake a boo i nanon ririki aika 400 aika nako! Ai korakorara kabuakakaan aia kairiri aomata iai!
Bwaai ni Kakoaua Riki Tabeua
5-7. Baikara kakoaua tabeua bwa ti a mena ngkai ni boong aika kaitira?
5 E taekin bwaai tabeua riki Iesu ake a na noraki ni boong aika kaitira: “A na roko mwaeiein aaba aika korakora, ao rongo ma aoraki aika kamamate [aika ewewe] n taabo tabeua.” (Ruka 21:11) E botau raoi anne ma baika riki man 1914, bwa iai rikiraken te kabuanibwai ae riki man baikanne.
6 A katoatai n roko mwaeiei aika kokorakora ake a anai maiuia aomata aika bati. A bua maiuia tao 20,000,000 n te Spanish influenza n tii ngaia imwin te Moani Buaka Are Kabutaa Aonnaba, ma a katautaua tabeman bwa 30,000,000 ke e nako riki. E a tia ni kabuai maiuia aomata te AIDS aika bubua ni ngaa mwaitiia, ao e katautauaki bwa mirion ma mirion riki ake a na mate iai. Ni katoa ririki ao a mate aomata aika mirion ma mirion ibukin aorakin burooia, te kaentia, ao aoraki riki tabeua. Iai naba mirion ma mirion aika mate man te baki. Akea te nanououa bwa a a tabe ngkai ‘taan toka i aoia aoti aika kabwarabwaraki n Te Kaotioti’ ni kakenakoa mwaitiia aomata n te buaka, te rongo, ao aoraki aika kamamate man 1914.—Te Kaotioti 6:3-8.
7 E taetae ni burabetiia naba Iesu rikiraken mwaitin te kakeru ae e a noraki ngkai n aaba ni kabane. E taku: “E a kani mauna tangiran te Atua irouia aomata aika bati, ba ane e na kabatiaki te buakaka.”—Mataio 24:12.
8. E kanga ni botau raoi ma taai aikai te taetae ni burabeti n 2 Timoteo mwakoro 3?
8 Irarikina, e taetae ni burabetinaki n te Baibara bwa e na mauna te aroaro ni maiu ae riai ni katobibia te aonnaba ni boong aikai ni kangai: “Ane a na roko tai aika kamamate ni boong aika kaitira. Ba ane a na riki aomata ba taan tangiriia i bon i rouia, n taani kani manemane, taani kamoamoaia, taani kainikatonga, taan taetaebuaka te Atua, taan aki iri nanoia aia karo, taani bangaomata, taan aki itiaki, taani babakaine, taani kainamatoa, taani winanti, taan aki tauu baangia, taan tiritiri, taan riba te raoiroi, taani kamwanea te aba, taan tautau aroia, taan nanorietata, taan tangira riki te maie nakon te Atua; . . . ane a na riki ni buakaka riki aomata aika buakaka ma taani mamana-te-aba.” (2 Timoteo 3:1-13) A a bane ni koro bukin baikanne bwa ti a bon nori.
Bukina Riki Teuana
9. Tera ae riki i karawa, ae boraoi ma moanakin boong aika kaitira n te aonnaba?
9 Iai riki te bwai ae karika rikiraken te karawawataki n ara tai aikai. Ni moanakin boong aika kaitira n 1914 ao e riki naba te bwai teuana are e a rangi n ruanikai riki iai maiun te botannaomata. N te tai anne ao e taetae ni burabetinaki ni bokin te Baibara are te kabane ni kangai: “E riki te buaka i karawa: Mikaera [Kristo ni mwaakana i karawa] ma ana anera a buakana te rakon [Tatan]; ao e buaka te rakon ma ana anera [taimonio]; ao a aki tokanikai, ao e aki manga noraki aia tabo i karawa. Ao e teweaki rio te rakon are korakora, are te naeta nikawai, are arana te Riaboro ao Tatan, are mamanaiia kaain aonaba ni kabane: e teweaki rio nako aon te aba, ao a teweaki rio naba ana anera ma ngaia.”—Te Kaotioti 12:7-9.
10, 11. Tera rotakin te botannaomata ni karenakoaia Tatan ma ana taimonio nakon te aonnaba?
10 Tera mwina nakoia aomata? E reitakinako te taetae ni burabeti ni kangai: “E na reke kain te aba ma marawa: ba e ruo te riaboro nako imi, ao e bati n unun, ngkae e ataia ba a kani bane ana bong.” Eng, e ataia Tatan ae e a kani bane ana bong, ngaia are e a kabanea ana konaa ni katannakoia aomata mairoun te Atua, imwain kamaunakina ma ana waaki ni kairiri. (Te Kaotioti 12:12; 20:1-3) E a riao buakakaia anera aikai ibukina bwa a aikoa kabongana raoi inaomataia n rinea ae a na karaoia! Ai buakakara waakin te aonnaba n aia kairiri, ao e a moamoa riki man 1914!
11 Maroaka ae e taetae ni burabetiia ara tai aei Iesu ni kangai: “A na roko baika kakamaku ma kanikina aika ababaki mai karawa.”—Ruka 21:11.
E a Kaan Toki Aia Tautaeka Aomata ma Taimonio
12. Tera te taetae ni burabeti teuana ae na kakororaoaki teutana te tai imwain tokin te waaki i aon te aba?
12 A na mwaitira riki taetae ni burabeti n te Baibara aika a na kakororaoaki, imwain kamaunan te waaki i aon te aba iroun te Atua? E a karako! Teuana mai buakoia e taekinaki n 1 I-Tetaronike 5:3 ni kangai: “N aia tai n tataekina are e rau te aba ao e mweeraoi, ao e na karina n roko naba kamaunakiia.” (The New English Bible) E oti n aei bwa e na moanaki tokin te waaki i aon te aba ‘n aia tai n taetae ni kawai.’ E na roko te kamaunaki n te tai ae aki ataaki ma n aki kariaaki irouia kaain te aonnaba, ae te tai ae a na kaantaningaa iai te rau ao te mweeraoi aomata.
13, 14. Te tai ni karuanikai raa are e taetae ni burabetiia Iesu, ao tera ae na riki n tokina?
13 E a kani bane ana tai Tatan n taua te aonnaba. E a kaan roko n tokina te rawawata are taekinaki iroun Iesu ni kangai: “E na bati te rawawata iai, ae akea arona ma ngke a moa ni karikaki aonaba, ao bon akea arona naba rimwi.”—Mataio 24:21.
14 Kabanean raoi ‘te rawawata ae korakora’ bon ana buaka te Atua ae Aremaketon. Te tai anne are e taekinaki iroun te burabeti ae Taniera bwa e nang “kamaunai uea akanne [te Atua] ni kabane.” Aei ai tokin naba aia tautaeka aomata ni kabane aika inaomata mairoun te Atua. E na oneaki mwin aia waaki n tautaeka aomata n Ana Tautaeka ae e na kairaki mai karawa. E taetae ni burabetiia Taniera, bwa akea te tautaeka ae e na manga katukaki taekana “nakon te botanaomata teuana.”—Taniera 2:44; Te Kaotioti 16:14-16.
15. Tera ae na riki nakon ana kairiri Tatan ma ana taimonio?
15 N te tai anne, ao a na bane ni mauna ana waaki ni kairiri Tatan ao taimonio. A na kamwawaaki anera akana karitei akanne bwa a na aki manga “mamanaiia riki botanaomata.” (Te Kaotioti 12:9; 20:1-3) A taningaa ngkai kakororaoan kabureakiia nakon te mate. Ai karaunanora aei nakoia te botannaomata ngkai a nang kainaomataki man aia waaki ni kairiri anera aika bubuaka aikai!
Antai Aika A na Kamaiuaki ao Aika A na Aki?
16-18. Antai aika a na kamaiuaki n tokin te waaki i aon te aba, ao aika a na aki?
16 Ngkana a kakororaoaki ana motikitaeka te Atua i aon te waaki ae ngkai, antai aika a na kamaiuaki ao aika a na aki? E kaotia te Baibara bwa a na kamanoaki te koraki ake a tangira ana kairiri te Atua ao a na kamaiuaki. Ma a na aki kamanoaki naake a aki tangira ana kairiri te Atua, ao a na iraanako kamaunakin ana waaki Tatan.
17 E taku Taeka N Rabakau 2:21, 22: “Ba a na maekana aon te aba akana raoiroi [ake a aantaeka nakon ana kairiri te Atua], ao a na tiku i aona akana moa n raoiroi. Ma a na teweaki nako akana buakaka mai aon te aba [ake a aki aantaeka nakon ana kairiri te Atua], ao a na taekaki taani bure mai nanona.”
18 E taku naba Taian Areru 37:10, 11: “Ai ti teutana riki, ao akea naba te aomata ae buakaka . . . ma a na abana te aba akana nimamanei; ao a na kukurei ni kabatian te raoi.” E reitia te kibu 29 ni kangai: “A na abana te aba akana raoiroi, ao a na mamaeka iai n aki toki.”
19. Tera te reirei ae ti riai ni mutiakinna?
19 Ti riai ni mutiakina te reirei ae taekinaki n Taian Areru 37:34, ae kangai: “Ko na kaantaninga Iehova, ma ni kawakina ana aro, ao E na neboiko ba ko aonga n abana te aba. Ngkana a teweaki nako akana buakaka, ao ko na noria.” E taku te kibu 37 ao 38: “Tarataraa te aomata ae moan te raoiroi, ao nora te aomata ae e eti arona: Ba bon te rau tokin te aomata aei. A na bane ni kamaunaki taani bure: Ao tokiia akana buakaka bon te koreaki nako.”
20. E aera ngkai ti kona n taekinna bwa a kakukurei taai aikai?
20 Ai karaunanora, eng, ai raoiroira ataakin ae e bon tabeakinira te Atua, ao n te tai ae waekoa e nang kamaunai buakaka ni kabane ma karawawataki! Ai kakukureira ataakin ae a nang kakoroaki bukin taetae ni burabeti aika raraoi aikai!
[Taamnei n iteraniba 20]
E taetae ni burabetinaki n te Baibara, kanoan te ‘kanikina’ ibukin boong aika kaitira
[Taamnei n iteraniba 22]
A nang kamaunaki naake a aki aantaeka nakon ana kairiri te Atua n Aremaketon ae e a kaan roko.
A na kamaiuaki ake a aantaeka, nakon te waaki i aon te aba ae boou ae raoiroi