Reirei 3

Ko Kainnanoa Reiakinan Taekan te Atua

Ibukin raoraonakin te Atua, ko kainnanoa reiakinan taekana. A ataa aram raoraom ao a kakabongana? A boni karaoa anne. Te Atua e tangiriko bwa ko na ataa naba arana ao ni kabongana. Aran te Atua bon Iehova. (Taian Areru 83:18; Mataio 6:9) Ko riai naba n reiakinna bwa tera ae e tatangiria ao ae e riribaia. Ko kainnanoa ataakin ae antai raoraona ao antai ana kairiribai. E kainnanoaki te tai ae bati ibukin kinaakin temanna. E taku te Baibara bwa e riai karekean te tai ibukin reiakinan taekan Iehova.​—I-Ebeto 5:15, 16.

Raoraon te Atua a kakaraoa ae E na kukurei iai. Iangoia moa raoraom. Ngkana ko karaoa ae buakaka nakoia ni karaoi mwakuri ake a riribai, a kona n teimatoa n raoraoniko? A na bon aki! N aron naba aei, ngkana ko kan riki bwa raoraon te Atua, ko riai ni kakaraoa ae e na kukurei iai.​—Ioane 4:24.

A aki bane Aaro ni kairiiri nakon te iraorao ma te Atua. Iesu, ae e kaan riki ana iraorao ma te Atua, e taekin kawai aika uaai. Te kawai are teuana e rababa, ao e onrake irouia aomata. Te kawai anne e tiki nakon te kamaunanakoaki. Te kawai are teuana e irariki, ao tii tabeman aomata aika a mwananga iai. Te kawai anne e tiki nakon te maiu are aki toki. E nanonaki n aei bwa ngkana ko tangiria ni karekea te iraorao ma te Atua, ko riai n reiakina te kawai ae eti ibukin taromauriana.​—Mataio 7:13, 14.