Reirei 6

E a Kaan te Baretaiti!

Bwaai aika bubuaka aika a tabe n riki ngkai n te aonnaba, a kaotia bwa e a kaan te Baretaiti. E taku te Baibara bwa ti na nori taai aika a kakamaaku, teutana te tai imwain rokon te Baretaiti. Boni ngaia raoi ae ti a maeka iai ngkai n te tai aei! Aikai tabeua bwaai ake e taku te Baibara bwa a na riki:

Buaka aika korakora. “Ba ane e na tei rake te botanaomata teuana n eka nako te botanaomata teuana, ao uean te uea temanna n eka nako uean te uea temanna.” (Mataio 24:7) E a tia ni koro bukin te taetae ni burabeti aio. Man te ririki 1914, a a tia n riki buaka aika uoua aika a kabuta te aonnaba, ao buaka aika uarereke aika bati. Mirion ma mirion mwaitiia aomata aika a mate iai.

Te aoraki ae kabuta. A na roko “aoraki aika kamamate n taabo tabeua.” (Ruka 21:11) E a tia ni koro bukin aei? Eng. Te kaentia, aorakin te buroo, te kangenge, te maraeria, te AIDS, ao aoraki riki tabeua aika a a tia ni kamateia aomata aika mirion ma mirion mwaitiia.

Akean te amwarake. Ni kabuta te aonnaba bon iai aomata aika a aki tau kanaia ibukin maiuiia. Iai mirion ma mirion mwaitiia aomata aika a mate n te baki ni katoa ririki. Aio naba te kanikina teuana bwa e a kaan rokon te Baretaiti. E taku te Baibara: “Ane a na roko rongo.”​—Mareko 13:8.

Mwaeiein te aba. “A na roko ... mwaeiein te aba n te aba teuana ao n te aba teuana.” (Mataio 24:7) Aio e a boni koro naba bukina n ara tai aei. E raka i aon teuana te mirion mwaitiia aomata aika a a tia ni mate ni mwaeiein te aba man 1914 ni karokoa ngkai.

Aomata aika a buakaka. Aomata a na riki bwa “taani kani manemane” ao “taan tangiriia i bon i rouia.” A na riki bwa “taan tangira riki te maie nakon te Atua.” Ataei, a na bon “aki iri nanoia aia karo.” (2 Timoteo 3:1-5) Ko kakoauaa ae a rangi ni bati aomata aika ai aroia aikai ni boong aikai? Akea aia karinerine nakon te Atua, ao a karekei kangaanga nakoia aomata ake a kataia n reiakina taekan te Atua.

Ekinakoan te tua. E na “kabatiaki te buakaka.” (Mataio 24:12) Ko na boni bae ni kakoauaa ae e a rangi ni korakora riki ngkai ekinakoan tuua, nakon ririki aika a nako. Aomata n taabo nako a maaka te kamwaruaaki, te babakanikawaiaki, ke te kaikoakaki.

Ni kabane bwaai aikai, a kaotia bwa e a kaan Ana Tautaeka n Uea te Atua. E taku te Baibara: “Ao ai aromi naba, ngkana kam nori baikai ba a roko, ao kam na ataia iai ba e a kaan uean te Atua.” (Ruka 21:31) Tera Uean te Atua? Bon ana tautaeka te Atua i karawa ae e na karokoa te Baretaiti n te aonnaba aei. Ana Tautaeka n Uea te Atua e na bon onea mwiin aia tautaeka aomata.​—Taniera 2:44.