Mwakoro Uabwi Ma Teuana
E a Kakoroaki Bukin Ana Kaantaninga Iehova n te Aro ae Moanibaan te Raoiroi
1, 2. (a) Tera ana kaantaninga Iehova ibukia ana karikibwai aika wanawana? (b) Antai kaain ana utu te Atua ngkoa aika a katiteuanaki n taromauri?
BON ana kaantaninga Iehova ae tatangira, bwa te koraki aika karikaki aika wanawana, a na bane ni katiteuanaki n taromauria te Atua ae tii ngaia ae koaua. Ao a na bane n inaaomata te koraki aikai, n aroia natin te Atua. Boni ngaia anne ae a ingainga nako iai taan tangira te raoiroi.
2 E moana kakoroan bukin ana kaantaninga aei Iehova ngke e moana ana mwakuri ni karikibwai. E boni moani karika Natina, ao imwin kautana man te mate, te Nati aei e a riki bwa “raneaneani mimitongin te Atua, ao boni katotongan naba te Atua.” (Ebera 1:1-3, BK) E kaokoro te Nati aei, ibukina bwa e karikaki iroun te Atua n akea ae buokia. Imwin anne, aomata ni kabane a a karikaki rinanon te Nati aei: anera ake i karawa moa, ao imwina aomata aika kaain te aonnaba. (Iobi 38:7; Ruka 3:38) Aomata aikai a bane ni kaaina te utu ae tii teuana. Iehova bon Atuaia, ae te tia Tautaeka i aon bwaai ni kabane, ao Tamaia ae tatangira.
3. (a) Tera ae ti bane n itiuaki iai mairouia ara moani karo? (b) Tera te babaire ae tatangira, are e karaoia Iehova ibukia natin Atam?
3 Ngke a kabuakakaki nakon te mate ara moani karo ibukina bwa a kani karaoa ae bure, a kanakoaki mai Eten ao a kakeaaki iroun te Atua. A aikoa kaaina ana utu. (Karikani Bwaai 3:22-24; Te Tua-Kaua 32:4, 5) Ti bane n riki mairouia, ngaia are ti itiuaki naba ni kani karaoan ae bure. Ma e ataia Iehova bwa a na iai tabeman ana kariki Atam ao Nei Ewa aika a na tangira te raoiroi. Mangaia are ibukin ana tangira, E karaoa te babaire teuana bwa a aonga te koraki aei ni karekea “tibangaia n te inaomata, ma te neboaki ae aia bai natin te Atua.”—I-Rom 8:20, 21, BK.
E A Toki Akoakin Iteraera
4. Tera te kakabwaia ae e anga Iehova nakoia I-Iteraera rimoa?
4 Tao 2,500 tabun te ririki imwin karikan Atam, Iehova e weteia aomata tabeman bwa a na karekea te iraorao ae okoro ma Ngaia. E rinea Iteraera rimoa bwa ana aomata, ao e angania ana Tua. (Karikani Bwaai 12:1, 2) E karaoia bwa te botannaomata, ao e kabonganaia ni kaineti ma ana kaantaninga. (Te Tua-Kaua 14:1, 2; Itaia 43:1) Ma e ngae n anne, a teimatoa n tautoronaki i aan te bure ao te mate, ao e aikoa reke irouia te inaaomata ae moan te raoiroi are a anganaki Atam ma Nei Ewa ngkoa.
5. A kanga tibun Iteraera ni kabuaa akoakiia ae okoro i matan te Atua?
5 Ma e ngae n anne, a akoaki I-Iteraera iroun te Atua. A riai ni karinea Iehova bwa Tamaia, ao a riai naba ni kakaraoa ae boraoi ma nanona. Iesu e kaatuua riain kakaraoan anne irouia. (Mataio 5:43-48) Ma a aki karaoa anne tibun Iteraera. A taekina ae kangai I-Iutaia aikai: “Ti temanna Tamara, ba te Atua.” Ma Iesu e taekinna bwa aia mwakuri ao aroaroia e kakewea aia taeka anne. (Ioane 8:41, 44, 47) N 33 C.E., e a katokaki te Tua iroun te Atua, ao e a toki naba akoakia I-Iteraera ae okoro i matan te Atua. E nanonaki iai bwa a nang aki kona aomata n akoaki n te iraorao ma te Atua?
Ikotakin “Baini Karawa”
6. Tera bukin katean te “babaire” ae taekinaki iroun Bauro n I-Ebeto 1:9, 10?
6 Te abotoro Bauro e kaotia bwa tabeman aomata a kona ni karekea te iraorao ae okoro ma te Atua. N aron anne, e korea ae kangai Bauro ni kaineti ma ana babaire Iehova are aomata aika onimaki a kona n riki bwa kaain Ana utu: “[Te Atua] e kaota nakoira nanona ae e raba ma ana iango n akoi, are e a kamani baireia i boni irouna [“ae e na katea te babaire teuana,” NW]. E na kakoroa bukina ngkana e roko taina, ao e na boti bai ni kabane, aika baini karawa ma bain aonteaba, i an te mataniwi ae ti temanna, ae boni Kristo.” (I-Ebeto 1:9, 10, BK) Te “babaire” aei e boto i aon Iesu Kristo. Rinanon Iesu a buokaki aomata bwa a na karekea akoakiia i matan te Atua. Tabeman mai buakoia a kaantaningaa te nako karawa. A rangi ni mwaiti riki aika a na maiu n aki toki n te aonnaba.
7. Antai “baini karawa”?
7 Ni Bentekota 33 C.E., a tabeakinaki moa “baini karawa,” ake te koraki ake a na uaia n ababa ma Kristo n te Tautaeka n Uea i karawa. A karaoiroaki iroun te Atua, kioina ngkai a onimakina ana karea Iesu. (I-Rom 5:1, 2) Imwin tabeua te tai a uaia n ikotaki iai I-Iutaia ao Tientaire, ao e a katauaki mwaitin “baini karawa,” bwa 144,000. (I-Karatia 3:26-29; Te Kaotioti 14:1) Ai bon tii nikiraia te koraki aikai aika a maiu ngkai n te aonnaba.
Ikotakin “Bain Aonteaba”
8. Antai “bain aonteaba,” ao tera aron aia iraorao ma Iehova?
8 I aan te babaire anne, a na ikotaki naba “bain aonteaba.” Mirion ma mirion mwaitiia aomata ngkai aika a tabe n ikotaki bwa a na maiu n aki toki i aon te aba. A katiteuanaki ma taan ababa n te Tautaeka n Uea, ao a kamoamoaa aran Iehova ma taromauriana. (Itaia 2:2, 3; Tebania 3:9) A arana Iehova bwa “Tamaia” kioina ngkai a ataia bwa boni mairouna te maiu. A akoaki naba i matana ibukina bwa a onimakina raraan Iesu are e anga. (Te Kaotioti 7:9, 14) Ma a tuai n atongaki raoi bwa natin te Atua n te tai aei, kioina ngkai a tuai ni kororaoi.
9. Tera te berita nakoia aomata ae kaotaki n I-Rom 8:21?
9 Te koraki aikai aika a kaantaningaa te maiu i aon te aonnaba a ingainga n tataningaa te tai are a na “kainaomataki . . . man te kabureaki nakon te mka.” (I-Rom 8:21, BK) Te kainaaomataki anne e na moanaki n tokin te rawawata ae korakora, imwin tian te buaka are Aremaketon are e na waakinaki iroun Kristo ma ana taanga ni buaka ake i karawa. E nanonaki iai bwa e na kamaunaki moa ana waaki ae buakaka Tatan, ao imwina, a na roko taiani kakabwaia rinanon ana Tautaeka n Uea Kristo ae Maanna Tenga te Ririki.—Te Kaotioti 19:17-21; 20:6.
10. Tera te anene n nebonebo ae e na aneneaki irouia ana toro Iehova?
10 Ai raoiroi ra ngkana a katiteuanaki ana toro Iehova i aon te aba, bwa a na kaota boraoin nanoia ma ana toro ake i karawa ake a kakatonga ni kangai: “Te Uea ae te Atua, ae Moan te Mwaka, A kakanato am makuri ao a kamimi; A raraoi arom ao a koaua, Ngkoe ae aia Uea botanaomata! Ai antai ae na aki maku i Roum, te Uea, ma n aki neboa aram? Ba ti Ngkoe ae Ko raoiroi; ba a bane botanaomata n roko n taromauri i matam; ba a kaotaki am moti aika riai.” (Te Kaotioti 15:3, 4) Eng, ana toro Iehova ni kabane a na katiteuanaki n taromauria te Atua ae tii ngaia ae koaua. A na kautaki naba maate ao a na anganaki aia tai ni botii bwanaia ma te koraki ake a neboa Iehova.—Mwakuri 24:15.
Te Inaaomata ae Moanibaan te Raoiroi ae Mena Imwaira
11. Tera te inaaomata ae moanibaan te raoiroi ae e na reke irouia aomata ake a na kamaiuaki man te rawawata ae korakora?
11 Imwin te rawawata ae korakora are e na kaitiakaki iai te aonnaba man te buakaka, n te buaka are Aremaketon, e nang aki manga atongaki Tatan te Riaboro bwa “atuan aon te aba.” Taan taromauria Iehova a nang aki kaririaki moa nakon te buakaka iroun Tatan. (2 I-Korinto 4:4; Te Kaotioti 20:1, 2) E nang aki manga kabuakakaki Iehova irouia Aaro aika kewe, ao a nang aki naba karika te iraraure i marenaia aomata. Akea te ribuaka ao te babakanikawai ae e na manga karaoaki nakoia taan taromauria te Atua ae koaua, irouia taian tautaeka. Ai raoiroi ra te inaaomata are e na reke irouia n te tai arei!
12. A na kanga aomata ni bane ni kainaaomataki man te bure ao uaana?
12 Iesu ae “ana Tiibutetei te Atua, ae uoti nako aia bure kain aonaba,” e na kamanena mwakaan ana karea, ibukin kamaunan aia bure aomata. (Ioane 1:29) Ngke e mena i aon te aba Iesu, ao e kakoauaa kabwaran ana bure te aomata temanna n arona ni kamaiua man aorakina. (Mataio 9:1-7; 15:30, 31) N aron naba anne, Kristo Iesu ae te Uea n ana Tautaeka n Uea te Atua i karawa, e na boni kamaiuia te koraki aika mataki, a bae neweia, a bonotaningaia, a mwauku, iai aorakin aia iango, ao ai aorakia aika kakaokoro nako. (Te Kaotioti 21:3, 4) E na kamaunaki “ana tua te bure” mairouia aomata ni kabane aika ongeaba, mangaia are aia iango ao aia mwakuri e na kakukureiia ao e na kakukureia naba te Atua. (I-Rom 7:21-23) N tokin te Mireniam, ao a nang bane n tia ni kororaoi, ao a nang ‘katotonga’ raoi te Atua ae tii ngaia ae koaua.—Karikani Bwaai 1:26.
13. N tokin te Tautaeka are Maanna Tenga te Ririki, tera te mwakuri ae e na karaoia Kristo, ao tera mwina?
13 Ngkana a a bane ni kororaoi aomata, ao Kristo e nang kaoka ngkanne te mwaaka are e anganna ngkoa Tamana ibukin katiaan te mwakuri anne: “I muina ao e na roko te toki, ae ana tai Kristo n angan te Atua te Tama Ueana, ngkana e a tia ni kamaunai taian nakoa n uea, taian tautaeka ma taiani maka. Ba e riai n uea Kristo ni karokoa te tai ae a na bane iai ana kairiribai ni kaweneaki i ani waena.” (1 I-Korinto 15:24, 25, BK) N te tai anne ao e nang tia iai ana mwakuri te Tautaeka n Uea are Maanna Tenga te Ririki; mangaia are e na aki manga kainnanoaki te tautaeka aei, i marenaia aomata ma Iehova. Ao ibukina bwa e nang bane n tia ni kamaunaki te bure ao te mate ao a nang kamaiuaki iai aomata, e na aki manga kainnanoaki ngkanne ana mwakuri Iesu n tia Kamaiu. E kabwarabwaraa ni kangai te Baibara: “Ngkana a bane bai ni mena i an ana tautaeka Kristo, ao e na mena naba ngaia, ae te Nati, i an ana tautaeka te Atua, ao e na kororaoi ana tautaeka te Atua i aoni bai ni kabane.”—1 I-Korinto 15:28, BK.
14. Tera ae e na karaoaki nakoia aomata ni kabane ake a kororaoi, ao bukin tera?
14 Imwin anne, a nang manga anganaki aia tai te botannaomata ae kororaoi, ni kaotia bwa a tangiria ni beku iroun te Atua n aki toki. Mangaia are imwain te tai are e na natinia raoi aomata aika kororaoi aikai Iehova, e na bon angania moa te kabanea ni kataaki. E na kainaaomataki Tatan ma ana taimonio man te kinono. A aki kona ni kabuanibwai iai aomata aika a tangira Iehova ni koaua. Ma aomata aika aki-kakaonimaki ao a kariaia kairakiia nakon te aki-ongeaba iroun Iehova, a na kamaunaki n aki toki, n ikotaki ma te tia karitei nikawai ma ana taimonio.—Te Kaotioti 20:7-10.
15. Tera te aroaro ae e na manga reke irouia te koraki ake a wanawana ake a karikaki iroun Iehova?
15 Imwin anne, Iehova e na natinia aomata ni kabane ake a kororaoi ake a boutokoa riain ana tautaeka te Atua rinanon te kabanea ni kataaki. Mai mwin te tai anne, ao a nang anganaki te inaaomata ae tabwanin raoi, kioina ngkai natin te Atua ngaiia aika kaain ana utu. Te koraki ake a karikaki ni kabane ake a wanawana ake i karawa ao i aon te aba, a nang katiteuanaki n taromauria te Atua ae tii ngaia ae koaua. E nang boni kakoroaki bukin ana kaantaninga Iehova ae moanibaan te raoiroi! Ko kani kaaina te utu ae kakukurei ae e na teimatoa n aki toki aei? Ngkana ngaia, ao ti kaungaa nanom bwa ko na mutiakina raoi ana taeka te Baibara n te 1 Ioane 2:17: “Ao e kume ni mauna aon te aba ma kaibabaruna: ma ane kakaraoa ae E tangiria te Atua, ao e teimatoa n aki toki.”
Te Maroro Ibukin te Kauring
• Imwain te karitei i Eten, tera aron te iraorao i marenan Iehova ma taan taromauriia?
• Tera tabeia ana toro te Atua ni kabane?
• Antai aika a na manga riki bwa natin te Atua, ao tera irekereken aei ma ana kaantaninga Iehova ni kaineti ma te katiteuanaki n taromauri?
[Taamnei n iteraniba 190]
Aomata aika ongeaba a na kukurei ni maiu n te baretaiti ae kabutaa te aonnaba