REIREI 6
Tera te Kantaninga Ibukia Maate?
1. Tera te rongorongo ae raoiroi ibukia maate?
Ngke e roko Iesu i Betania ae uakaan ma Ierutarem, ao ai abong ana bongi ni mate raoraona ae Rataro. E kawara te ruanimate Iesu ma Mareta ao Maria, ake mwaanen teuare mate. Imwina ao a roko aomata aika bati. Ko kona n iangoa kukureia Mareta ma Maria ngke e a kautaki Rataro iroun Iesu?—Wareka Ioane 11:21-24, 38-44.
E a kaman ataaki irouni Mareta te rongorongo ae raoiroi ibukia maate. E ataia ae a na kautaki maate iroun Iehova bwa a na maiu i aon te aba.—Wareka Iobi 14:14, 15.
2. Tera ae e na riki nakoia maate?
E tuangaki Atam iroun te Atua ni kangai: “Bon te tano ngkoe, ao ko na manga okira te tano.”—KARIKANI BWAAI 3:19, BG.
A karikaki aomata man te tano. (Karikani Bwaai 2:7; 3:19) Akea te taamnei ae maiu i nanora, ngaia are ti aki teimatoa ni maiu imwini matera. Ngkana ti mate ao ti a aikoa kona n iango, ao a mauna naba nanora. Mangaia are bon akea te bwai ae e karakinna Rataro are e riki nakoina ngke e mate, ibukina bwa a bon aki ataa te bwai teuana akana mate.—Wareka Taian Areru 146:4; Te Minita 9:5, 6, 10.
Te koaua bwa e kammarakiia aomata te Atua ni kabuekiia n te ai ni moone imwini mateia? Kioina ngkai e taekinaki n te Baibara bwa akea te bwai teuana ae a ataia maate, e mataata ngkanne bwa bon te reirei ae kewe te ai ni moone, ae e kabuakakaaki iai te Atua. E ribaaki iroun te Atua kammarakaia aomata.—Wareka Ieremia 7:31.
3. A kona n taetae nakoira maate?
A aki kona n taetae maate ke ni kakauongo. (Taian Areru 115:17) Ma iai anera tabeman aika buakaka, ake a kona ni karikiia bwa aomata ake a a tia ni mate ao n taetae nakoia aomata. (2 Betero 2:4) E aki kariaia te Atua bwa ti na taetae ma ake a a tia ni mate.—Wareka Te Tua-Kaua 18:10, 11.
4. Antai aika a na kautaki?
Mirion ma mirion aomata ake a a tia ni mate, aika a na kautaki nako aon te aba. A na kautaki naba aomata aika tuai ataa te Atua, aika a kakaraoi mwakuri aika buakaka.—Wareka Ruka 23:43; Mwakuri 24:15.
E na reke aia tai aomata aika kautaki, ni manga reiakina te koaua ibukin te Atua ao ni kaotiota onimakinan Iesu ngkana a ongeaba irouna. (Te Kaotioti 20:11-13) A na karekea te maiu are aki toki i aon te aba, te koraki ake a na kautaki ao ni karaoi mwakuri aika raoiroi.—Wareka Ioane 5:28, 29.
5. Tera reireiara ibukin Iehova, n te kantaninga ibukin te mangauti?
E karekea te Atua te kantaninga ibukia maate, ngke e kanakoa Natina bwa e na mate ibukira. Mangaia are ti reireiaki ana tangira Iehova ao ana akoi ae rianako, n te kantaninga ibukin te mangauti. Antai ae ko tangiria ni kaitiboo ma ngaiia ngkana a kautaki maate?—Wareka Ioane 3:16; I-Rom 6:23.