E Teimatoa ni Kakaraoa ae Raoiroi Tamuera

Ngke e rangi n uarereke Tamuera ao e maeka ao ni mwakuri n te umwanrianna ae tabu, ae te tabo ae a kakawaria aomata ibukin taromaurian Iehova. Ko ataia bwa e kangaa ni maeka Tamuera n te umwanrianna ae tabu? Ti na reiakina moa taekan Nei Anna are tinan Tamuera.

I nanon te tai ae maan, ao e tuai man riki natin Nei Anna e ngae ngke e rangi n tangiria bwa e na riki natina. Ngaia are e a tataro nakon Iehova ao ni bubutiia buokana. E berita bwa ngkana e riki natina te mwaane, ao e na kanakoa bwa e na maeka ao ni mwakuri n te umwanrianna ae tabu. E kaekaaki ana tataro iroun Iehova, ao e a riki natina te mwaane. E aranna bwa Tamuera. N aron are e a tia ni beritanna Nei Anna, ao e a kaira Tamuera ngke e a koro tenua ke aua ana ririki nakon te umwanrianna ae tabu bwa e na beku iai ibukin te Atua.

Bon te ibonga ae rietata Eri n te umwanrianna ae tabu. A mwakuri naba ikanne natina mwaane aika uoman. Uringnga are te umwanrianna ae tabu bon ana auti te Atua ibukin taromauriana, ao a riai aomata ni kakaraoa ae raoiroi iai. Ma a kakaraoi mwakuri aika rangi ni bubuaka natin Eri ake mwaane. E nori Tamuera aia mwakuri ake a kakaraoi. E karaoi baika bubuaka Tamuera n aron are a kakaraoia natin Eri ake mwaane?— E aki, e teimatoa ni kakaraoa ae raoiroi n aron reireiana irouia ana karo.

Tera am iango n te bae e riai ni karaoia Eri nakoia natina mwaane ake uoman?— E riai ni katuuaaeia. E riai n aki kariaia bwa a na tiku ni mwakuri n umwan te Atua. Ma e aki karaoa anne Eri, ngaia are e a un Iehova irouna ao irouia naba natina mwaane ake uoman. E a baireia Iehova bwa e na katuuaaeia.

N te tairiki teuana ngke e matu Tamuera, ao e a ongo bwanaan temanna ae e weteia ni kangai: ‘Tamuera!’ E biri nakon Eri, ma e taku Eri: ‘I aki weteiko.’ E riki aei uoua riki te tai. Imwin rikin aei n te katenua n tai, e a tuangaki Tamuera iroun Eri bwa ngkana e a manga ongo riki te bwanaa ao e riai ni kangai: ‘Taiaoka Iehova, taetae bwa I ongora.’ Mangaia are e karaoa anne Tamuera. E taku Iehova nakon Tamuera: ‘Tuanga Eri bwa N na katuuaaeia kaain ana utu ibukini baika bubuaka ake a kakaraoi.’ N am iango, e bebete iroun Tamuera karokoan te rongorongo aei iroun Eri?— E bon aki. Ma e ngae ngke e maaku Tamuera, ma e karaoa te baere e tuangaki iroun Iehova. E a koro bukin te baere e taekinna Iehova. A mate natin Eri mwaane ake uoman, ao e mate naba Eri.

Bon te banna ni katoto ae tamaroa ibukira Tamuera. E kakaraoa ae raoiroi e ngae ngke e noriia aomata ake tabeman bwa a kakaraoa ae buakaka. Ao ngkoe tera arom? Ko na katotonga Tamuera ao n teimatoa ni kakaraoa ae raoiroi? Ngkana ko karaoa anne, ko na kakukureia iai nanon Iehova ao am karo.