Reirein te Tautaeka n Uea​—Kataneiaakia Ana Toro te Uea

KO WINGARE ni kaungaa te tia kabwarabwara are tei mai moa. Bon te rorobuaka n ataei n am ekaretia, ao e a anga ana moani kabwarabwara n tain te runga n aono. Ngke ko tabe n ongora ana kabwarabwara, ao ko rangi ni mimi naba n aroni kataneiaakia ana aomata te Atua. Ko uringa ana moani kakorakora te rorobuaka anne, ao ko a nora aron rikirakena! E kataneiaaki n te Kuura ni Kataneiai Ibukia Taan Uarongorongo ao n te Kuura Ibukin te Mwakuri ni Bwaiania. Ao e a bon tibwa oki naba ma buuna ni kaea te Kuura Ibukia Taan Uarongorongoa te Tautaeka n Uea. Ngke e a uboaki ni kaitauaki te tari aei n ana kabwarabwara ae moan te tamaroa, ao ko a taratara nako ma n iaiangoa te kaetieti are a kakarekei ana aomata nako te Atua.

E a kaman taekinaki n te Baibara taekan te tai ae a na “reireinaki iroun Iehova” ana aomata. (Ita. 54:13) Ti a maeka ngkai n te tai anne. Ti reireinaki tiaki tii rinanon ara boki ma rinanon naba ara bobotaki, taian runga n aono, bwabwaro, ao ai reirei aika kakaokoro ake a katauraoaki ibukini kataubobongaara nakoni mwioko aika okoro n ana botaki Iehova. N te mwakoro aei ao ti na noria bwa a kangaa reirei aikai ni bane n riki bwa te bwai ni kakoaua ae aki kona ni kakeweaki, ae e a kairiri ngkai ana Tautaeka n Uea te Atua.