MWAKORO 5
E Bungiaki Iesu Ia Ao N Ningai?
E BUNGIAKI IESU I BETEREEM
A KAWARA TE TEEI AE IESU TAANI KAWAKINTIIBU
E kanakoa ana moti te embera n te Embwaea n Rom ae Kaitara Aukutito, bwa a riai aomata nako ni koreaki araia. Ngaia are a riai ni mwananga Ioteba ao Maria nakon te kaawa are e bungiaki iai teuaei ae Betereem i maiakin Ierutarem.
A mwaiti aomata ake a roko i Betereem bwa a na koreaki araia. Te tabo ae a tii kona n tiku iai Ioteba ao Maria boni nneia maan ike a kawakinaki iai taongki ao maan riki tabeua. E bungiaki Iesu ikanne. E niria Maria n te kunnikai ae te ninira ma ni kawenea ni nneni kanaia maan.
E bae n taraia te Atua bwa e riai Kaitara Aukutito ni karaoa te tua ibukin te koreara. Bukin tera? Ibukina bwa e a reke iai angani bungiakin Iesu i Betereem ae ana kaawa ana bakatibu ae te Uea are Tawita. E a kaman taekinaki n te Baibara bwa aei te kaawa are e na bungiaki iai te tia Tautaeka are beritanaki.—Mika 5:2.
Ai boni kakawakira te tairiki aei! E ootanako rarikia taani kawakintiibu n te tawaana. Aei boni mimitongin Iehova! E taku ana anera te Atua temanna: “Tai maaku, bwa noria! I roko bwa N na taekina te rongorongo ae raoiroi nakoimi ae taekan te kimwareirei ae bati ae e na reke irouia aomata nako. Bwa e a bungiaki ibukimi n te bong aei n ana kaawa Tawita, te tia kamaiu ae Kristo ae te Uea. Ao aio te kanikina nakoimi: Ane kam na nora te merimeri ae niraki n te kunnikai ae te ninira, ae wene ni nneni kanaia maan.” Ao a rina ni kaoti anera aika bati riki ao a taku: “E na neboaki te Atua i karawa, ao te raoi i aon te aba nakoia aomata ake e reke akoaia irouna.”—Ruka 2:10-14.
Ngke a a nako anera ao a taku taani kawakintiibu i marenaia: “Ti a nako Betereem bwa ti na nora te baere riki ikekei are e kaotia Iehova nakoira.” (Ruka 2:15) A kawaekoaia n nako ni kakaaea Iesu are e a tibwa bungiaki n te tabo are e taekinna te anera bwa e mena iai. Ngke a taekina te baere e tuangia te anera, a a bane ni mimi ake a ongora. E kawakini baike a taekinaki Maria ao e kananoi iangoaia.
A mwaiti aomata ni boong aikai ake a kakoauaa bwa e bungiaki Iesu n Ritembwa 25. Ma bon tain te kakarau ao te mwaitoro Ritembwa n te tabo ae Betereem. N tabetai, e kona ni bwaka te tino. A aki kona ni mena n te tawaana taani kawakintiibu ma aia nanai n te tai anne. E bon aki naba kona te embera n Rom n tuangia aomata ake a kani karitei bwa a na mwananga i nanon irabong ribuakon te mwaitorotoro ibukin te koreara. E oti ngkanne bwa e bungiaki Iesu tao i nanon Okitobwa.