MWAKORO 19

Reireinan Ainen Tamaria

E REIREINA AINEN TAMARIA IESU AO TABEMAN RIKI
TE TAROMAURI AE KARIAIA TE ATUA

A mwananga ni kaineta meang Iesu ma taan rimwina mai Iutaia nako Kariraia n rinanon Tamaria. A a boni kua ni mwanangaia aei. Ngke e a tawanou ao a motirawa n te kaawa ae Tukara i rarikin te mwanibwa are tao e karaoia Iakoba ke e kabwakaa te mwane ibukini karaoana, n tienture ake a a bwakanako. Bon iai te mwanibwa anne ni karokoa boong aikai ae kona n noraki n te kaawa ae boou ae Nablus.

Ni motirawan Iesu ikanne ao a nakon te kaawa ae uakaan taan rimwina ni kabooi amwarake. Ngke a a nako, e a roko naba ainen Tamaria bwa e na itiran. E taku Iesu nakoina: “Anganai nimau.”—Ioane 4:7.

E motirawa Iesu i rarikin te mwanibwa, a nako taan rimwina, ao e a roko ainen Tamaria n itiran

A aki iraorao I-Iutaia ma I-Tamaria ibukina bwa a kairiribai i marenaia. Mangaia are e a rangi ni mimi neiei ao e titirakinna ni kangai: “Ko kangaa n tuangai nimam ngkai te I-Iutaia ngkoe ao ngai ainen Tamaria?” E kaekaa ni kangai: “Ngke arona bwa ko ataa ana bwaintituaraoi te Atua ae akea boona, ma te aomata ae tuangko ni kangai, ‘Anganai nimau,’ ao ko na boni butiia, ao e na anganiko te ran ni kamaiu.” E kaeka neiei ni kangai: “Nao, akea am roa ibukin te itiran, ao e nano te mwanibwa, ko na karekea ngkanne mai ia te ran ni kamaiu? Ko kakannato riki nakon ara bakatibu are Iakoba, are e anganira te mwanibwa aei ao e momoi mai iai ma natina nako ma ana nanai?”—Ioane 4:9-12.

E taku Iesu: “Ane e moi man te ran aei e na manga taka. Ma ane e moi man te ran ae N na anganna, e na bon aki manga taka teutana. Ma e na riki te ran ae N na anganna, bwa te koburake n ran i nanona ae raanganako bwa e na anganga te maiu are aki toki.” Eng, e ngae ngke e kua Iesu ma e kukurei n tibwai taeka aika koaua ma ainen Tamaria aika a na karekea te kamaiuaki.

E taku ngkanne neiei: “Nao, anganai te ran anne, bwa I aonga n aki manga taka ke n aki manga okiokira te tabo aei n itiran.” E a bita ngkanne te maroro Iesu ao e taku nakoina: “Naako wetea buum ao nakomai ikai.” E kaeka neiei ni kangai: “Akea buu.” Ma e mimi neiei ngke e kaekaa ni kangai: “E eti am taeka anne ae, ‘Akea buu.’ Bwa niman buum ngkoa ae ko mare ma ngaiia, ao te mwaane ae ko tekateka ma ngaia ngkai bon tiaki buum ni mare.”—Ioane 4:15-18.

E ataa raoi neiei kakawakin te baere e taekinna ao e taetae ma te kubanako ni kangai: “Nao, I a ataiko bwa bon te burabeti ngkoe.” E a kaotia ngkanne neiei bwa bon iai ana onimaki. N te aro raa? E reitia n taku: “A tataromauri ara bakatibu [i Tamaria] i aon te maunga aei [te Maunga ae Keritim ae uakaan], ma kam taku ngkami [I-Iutaia] bwa Ierutarem bon te tabo ae a riai aomata n taromauri iai.”—Ioane 4:19, 20.

Ma e kamataataa Iesu bwa e aki kakawaki te tabo n taromauri. E taku: “E na bon roko te tai are kam nang aki taromauria iai te Tama i aon te maunga aei ke i Ierutarem.” E a manga tuanga neiei ni kangai: “E a roko ngkai te tai, are a nang taromauria iai te Tama n te taamnei ao n te koaua, taan taromauri ni koaua, bwa e bon ukoukoriia aekaki n aomata aikai te Tama bwa a na taromauria.”—Ioane 4:21, 23, 24.

Te bwai ae e taraia te Tama irouia taan taromauria, tiaki te tabo are a taromauri iai ma bon aroia n taromauri. E rangi n anaaki nanon neiei ao e taku: “I ataia bwa e nang roko te Mesia, are atongaki bwa Kristo. Ngkana e roko, ao e na kaotiotii bwaai ni kabane nakoira.”—Ioane 4:25.

E kaota ngkanne te koaua ae kakawaki Iesu ni kangai: “Boni ngaia ngai ae I taetae nakoim.” (Ioane 4:26) Iangoia! E roko te aine aei n itiran n te tawanou, ao e akoia Iesu n te aro ae kamimi. E a kamataataa nakoina te rongorongo ae tuai n taekinna nakoia tabeman ae boni ngaia te Mesia.

A A BATI I-TAMARIA AKE A KAKOAUAA

A oki mai Tukara taan rimwin Iesu ma te amwarake. A noria n te tabo are a kitanna iai n ana mwanibwa Iakoba, ma e a maroro ngkai ma ainen Tamaria. Ngke a a roko taan rimwina, e a boonako neiei nakon te kaawa ni kitana ana kaatibu n ran.

A okira rarikin te mwanibwa taan rimwin Iesu ao e a nako ainen Tamaria

Ngke e roko neiei i Tukara ao e a tuangia kaaina baike e taekin Iesu nakoina ma te aki nanokokoraki ni kangai: “Nakomai nora te mwaane ae tuangai taekani bwaai nako ake I karaoi.” Tao ibukin anaakin nanoia, e a tabeka te titiraki ae kangai: “Tao ai kan te Kristo ngaia?” (Ioane 4:29) Anne te titiraki ae kakawaki are tataekinaki man ana bongi Mote. (Te Tua-Kaua 18:18) A a kairaki iai aomatan te kaawa bwa a na otinako n nora Iesu.

E tuangia kaain te kaawa i Tukara ainen Tamaria bwaai ake e taekin nakoina Iesu

N te tai anne ao a a kaumaka Iesu taan rimwina bwa e na amwarake ni baike a uotii. Ma e kaeka ni kangai: “Iai kanau ae kam aki ataia.” A mimi taan rimwina ao a taku i marenaia: “Kai akea ae e anganna kanana, kee?” E kamataataia ma te akoi n taekin taeka aika a na ota iai ni kangai: “Kanau boni karaoan nanon teuare kanakomaiai, ao katiaan te mwakuri are e anganai.”—Ioane 4:32-34.

E aki taetae Iesu ibukin te mwakuri n tai are ai tii aua riki tabun namwakaina ao e a roko. Ma e nanona te mwakuri n tai ni kaineti ma te onimaki ngke e kangai: “Kam na euti matami ao tarai tawaana, bwa a a tai ibukin te taiaki. E a tabe ngkai n anganaki te tia tai boona ao e a ikotii uaa ibukin te maiu are aki toki, bwa a aonga ni kaai ni kimwareirei te tia ununiki ao te tia tai.”—Ioane 4:35, 36.

E a bae n tia n noria Iesu bwa iai uaani kaitiboona ma ainen Tamaria. A a bati mai Tukara aika onimaki man ana rongorongo neiei bwa e tuangia ni kangai: “E tuangai taekani bwaai ni kabane ake I karaoi.” (Ioane 4:39) Mangaia are ngke a roko i Tukara n te mwanibwa ao a butiia bwa e na tiku n reireinia riki. E kariaia Iesu ao e tiku i Tamaria uabong.

A a bati riki I-Tamaria ake a kakoauaa Iesu ngke a ongora irouna ao a taku nakon neiei: “Ti a aki ngkai kakoauaa man am taeka, bwa ti a bon ongo mairouna, ao ti a ataia bwa teuaei bon te tia kamaiuia kaain te aonnaba.” (Ioane 4:42) E boni karaoa te katoto ae raoiroi ainen Tamaria, n arora n uarongorongo ibukini Kristo, n anai nanoia aomata bwa a na kan ongora.

Uringnga bwa ai aua ngkai namwakaina imwain te tai ae taiakin uaan te baare are e kakaraoaki n te aono aei n tain te abue. Mangaia are tao ai Nobembwa ngkai ke Ritembwa. Nanona bwa a kabanea wanua namwakaina ke e nako riki i Iutaia, Iesu ma taan rimwina n angareirei ao ni bwabetito imwin te Toa ae te Riao n 30 C.E. A kaineta ngkai meang nako Kariraia are abaia. Tera ae e na riki ikekei?

ANTAI I-TAMARIA?

E mena te aono ae Tamaria i marenan Iutaia nako maiaki ao Kariraia nako meang. Imwini maten te Uea are Toromon, ao a raurenako baronga ake tebwina mai meang i aon Iteraera ma te baronga are Iuta ao Beniamin.

A a rairaki nakon taromaurian te kao te tei kaaini baronga akana tebwina akanne. Ngaia are e a kariaia Iehova I-Aturia bwa a na kataenikaia Tamaria n 740 B.C.E. A rangi ni bati aomata ake a kairakinako irouia taani buaka ao n onei mwia irouia aomata man taabo ake a mena i aan te Embwaea n Aturia. A a imaremare taan taromaurii atua aika ianena aikai ma tibun Iteraera ake a tiku n te aba. Ni waakinakon te tai ao e a rikirake irouia kaain te tabo aei te aeka n taromauri are a a rengani iai koaua tabeua ao mwakuri ake kanoan ana Tua te Atua n aron te korotobibi, ma e aki kona n atongaki aei bwa te taromauri ae koaua.—2 Uea 17:9-33; Itaia 9:9.

N ana bong Iesu, a butimwaei ana boki Mote kaain Tamaria, ma a aki tataromauri n te tembora i Ierutarem. I nanon ririki aika bati, a kakabongana te tembora are kateaki i aon te Maunga ae Keritim, ae aki rangi n raroa ma Tukara ao n teimatoa n tataromauri n te maunga anne ni karokoa ae e a uruakaki. E ataaki raoi bwa a teimatoa ni kairiribai I-Tamaria ma I-Iutaia n ana tai ni mwakuri ni minita Iesu.—Ioane 8:48.