E Rineiia Ana Abotoro Aika Tengauni ma Uoman Iesu

Tao ai teuana ao te iterana ngkai te ririki imwin are e kaotia Ioane te tia Bwabetito bwa Iesu bon ana Tiibutetei te Atua. Ngke e a moana ana mwakuri ni minita Iesu, a riki tabeman mwaane aika raoiroi nanoia bwa taan rimwina, n aron Anterea, Timon Betero, Ioane, ao tao Iakobo are (tarin Ioane), Biribo ao ai Baretoromaio (ae arana naba Natanaera). Imwina riki ao a bati aika riki bwa taan rimwin naba Kristo.​—Ioane 1:45-47.

E a tauraoi ngkai Iesu n rineiia ana abotoro, ake a na riki bwa raona ni kaan aika a nang anganaki te kataneiai ae okoro. Ma imwaini karaoan aei, e nakon te maunga teuana ae tao e kaan ma Namani Kariraia ae aki raroa ma Kaberenaum. E kangaina n tataro, tao ni bubutii wanawanana ao ana kakabwaia te Atua. N te bong are imwina e weteiia taan rimwina ao e a rineiia 12 mai buakoia bwa ana abotoro.

E rineiia onoman ake a taekinaki araia mai eta n ikotaki naba ma Mataio are e weteia ngkoa man aobitin te taekiti. Ake niman riki ake a rineaki bon Iuta (ae arana teuana Tataio “ae natin Iakobo”), Timon are te Kananaian, Toma, Iakobo ae natin Arebaio, ao Iuta Itekariota.​—Mataio 10:2-4; Ruka 6:16.

E a mwamwananga ngkai Iesu ma naaka 12 aikai, ao e a rangi ni kinaia raoi. Tabeman mai buakoia bon ana koraki. E oti bwa Iakobo ma tarina are Ioane bon ai tarin Iesu. Ao n aron ae a iangoia tabeman, ngkana Arebaio bon tarin Ioteba are e kaikawaa Iesu ao natini ngkanne Arebaio ae te abotoro Iakobo tao ai tarin naba Iesu.

Akea ana kangaanga Iesu n uringi araia ana abotoro. Ma ko kona ngkoe n uringi araia? E na buokira anne ngkana ti uringnga ae iai uoman ae araia Timon, uoman ae araia Iakobo, ao uoman ae araia Iuta. Iai tarin Timon (Betero) ae Anterea, ao Iakobo (are natin Tebetaio) iai tarina ae Ioane. Anne raoi aron uringaia naake waniman. Ake aman riki bon te tia rikoa te taekiti are (Mataio), teuare nanououa imwina riki are (Toma), teuare weteaki mai aan te aroka are (Natanaera), ao raoraon Natanaera are (Biribo).

Tengauni ma temanna mai buakoia abotoro boni kaaini Kariraia are aban naba Iesu, Natanaera mai Kana, Biribo, Betero, ao Anterea boni kaain raoi te kaawa ae Betetaita ma imwina riki a mwaing nako Kaberenaum ae te kaawa are tao e maeka iai Mataio. Iakobo ao Ioane a maeka naba n uakaan ma Kaberenaum, ao e uakaan ma ngaiia aia bitineti n te akawa. Iuta Itekariota are e kamwanea Iesu imwina riki tao bon tii ngaia te abotoro ae kaain Iutaia.