E Kamarurunga te Teinnaine ao Teuae Bonotaninga Iesu

E a nako Iesu ma taan rimwina imwini kabuakakaaia Baritaio irouna ibukin aia katei aika bangaomata. E a nako n aonon Turo ma Titon aika mena i Boinike ae iraua te maire raroana nako meangimaeao.

E a kunea Iesu te auti are a na tiku iai, ma e aki tangiria bwa a na ataia aomata ae e mena ikanne. E ngae n anne, e bon aki kona naba ni karabaa ikai. E noraki Iesu iroun te aine ae te I-Kuriiti are e bungiaki n te aono aei, ao e a bubutiia ni kangai: “Ko na nanoangaai te Uea ae Natin Tawita. E korakora taniakin natiu te aine n te taimonio.”​—Mataio 15:22; Mareko 7:26.

Imwina riki ao a kaumakia taan rimwina ni kangai: “Kanakoa neiei bwa ae e a ririmwira n tatakarua.” E kaekaia n taekina bukin aki mutiakinan neiei ni kangai: “I aki kanakoaki nakoia aomata nako ma tii nakoia tiibu aika bua aika tibun Iteraera.” Ma e bon aki bwara nanon neiei. E kawara Iesu ao e katorobubua i matana ma ni bubutiia ni kangai: “Ko na buokai te Uea!”​—Mataio 15:23-25.

Tao e kani kataa ana onimaki neiei Iesu, ngaia are e a taekina aroia I-Iutaia n riribaiia reeti tabeua ni kangai: “E aki riai anaakini kanaia ataei ao karenakoana nakoia kamea aika uarereke.” (Mataio 15:26) E kaota mwamwannanoaia aomata aika tiaki I-Iutaia ngke e taekinia “kamea aika uarereke,” ke bunnikamea. E oti naba ana namakin mani bwanaana ae kaota te nanoanga ao n tein ubuna.

E bon ota neiei n nanon ana taeka Iesu ibukin aroia I-Iutaia ni kairiribai nakoia aika tiaki aia reeti, ma e aki un ao e kananorinanoa ni kangai: “Eng te Uea ma ni koauana, kamea aika uarereke a kaakang tamruru aika bwaka man aia taibora aia toka.” E noria Iesu bwa e raoiroi nanon neiei ao e a kaekaa ni kangai: “Neiko, ai korakorara am onimaki. E na kakororaoaki nakoim ae ko tangiria.” (Mataio 15:27, 28) Ao e bon riki anne, e ngae ngke e aki mena ikanne te teinnaine arei! Ngke e a okira mwengana te aine aei ao e a nora natina ni wene i aon te kainiwene, are e a marurung raoi bwa “e a kitanna te taimonio”!​—Mareko 7:30.

A a manga kitana aononi Boinike Iesu ma taan rimwina ao a nako n iteran te aba ni kaineta te Karaanga ae Ioretan n iterana are mai eta. A bae n rinanon te Ioretan mai meangin Namani Kariraia ao n rinnako n aonon Tekabori. A ararakea te maunga ikanne ma a a manga noraki irouia aomata aika uanao. A kairiia nakon Iesu aia koraki aika mwauku, a toabuaka bwain rabwataia, a mataki, ao a baennewe. A kaweneia aoraki aikai i rarikini waen Iesu ao e a kamarurungia. A mimi aomata ao a neboa Atuaia Iteraera.

Ma e karaoa te bae okoro Iesu nakon teuae bonotaninga ma ni baennewe. Ko bae n ota n ana namakin teuaei i buakon te koraki. Tao e noria Iesu bwa e nako nanon teuaei, ngaia are e a kairianako mai buakoia te koraki. Ngke ai tii ngaiia, e a kaota te baere e nang karaoia nakoina. E karini baina i taningan teuaei ao e ringa newena ngke e tia ni baware. E tararake ngkanne nako ­karawa Iesu ao n taekina ae kangai: “Ebata” ae nanona, “Uki.” N taekinan anne, e a uki naba taningan teuanne ao e a kona n taetae. E aki tangiria Iesu bwa e na ataaki aei irouia aomata ma e tangira riki are a na kakoauaa man te bwai are a bon noria ao n ongo.​—Mareko 7:32-36.

E korakora rotakia taani mataku ni mwaakan Iesu ni karaoi waaki ni kamarurung, bwa a “rangi ni kubanako.” A taku: “A bane n raraoi baika e karaoi. E kauki taningaia bonotaninga ao e karaoiia ake a baennewe bwa a na taetae.”​—Mareko 7:37.