Antai Natin te Aomata?

E a roko Iesu ma taan rimwina i Betetaita. A a kaira teuae mataki aomata nakon Iesu ao a butiia bwa e na ringnga bwa e aonga ni marurung.

E taua bain teuaei ao ni kairia nako tinanikun te kaawa. Ngke e tia ni bawarei matan teuaei, e a titirakinna Iesu ni kangai: “Iai te bwai ae ko noria?” E kaeka teuaei ni kangai: “I noriia aomata, ma titeboo taraaia ma aroka aika ririaki.” (Mareko 8:23, 24) E katokai baina Iesu i aoni matan teuaei, ao e a noraaba naba. E kaokia nakoni mwengana ao n tuangnga bwa e na aki nakon te kaawa.

Imwina ao e a mwananga Iesu ma taan rimwina ni kaineta meang nakon aononi Kaitareia Biribi. A ararake n te raroa ae tao 25 te maire. E mena te kaawa aei n te tabo ae rietata ae 350 te mita rietana mai aon taari. E kona n noraki mai iai te Maunga ae Oman nako meangimainiku ae e tino aona ae tao uoua te bong maanin te mwananga nako iai.

N te tai teuana i aoni kawaia, e a nako Iesu ni kaokoroa n tataro. Ai tii ruaiwa ke tebwina namwakaina imwaini matena ao e a tabeaianga ibukia taan rimwina. A bati ake a a tibwa kitanna ao iai naba ake a bae n aki ota ke a bwara nanoia. Tao a mimi bwa e aera ngke e rawa nakon aia kakorakora aomata ni kani kaueaa, ke bukin tera bwa e rawa ni karaoa te kanikina ni kaotia bwa antai raoi ngaia.

Ngke a roko taan rimwina n te tabo are e tataro iai, e a titirakinia Iesu ni kangai: “Antai Natin te aomata ae a taku te koraki?” A kaeka ni kangai: “A taku tabeman bwa Ioane te tia Bwabetito, ao tabeman a taku bwa Eria, ao ake tabeman a taku bwa Ieremia, ke temanna mai buakoia burabeti.” Eng, a iangoia aomata bwa Iesu bon temanna mai buakoia ake a kautaki man te mate. Ibukini kan ataakin aia iango taan rimwina e titirakinia ni kangai: “Ao ngkami, antai ngai iroumi?” E waekoa ni kaeka Betero ni kangai: “Bon te Kristo ngkoe, ae Natin te Atua are maiu.”​—Mataio 16:13-16.

E taekinna Iesu bwa e kona ni kukurei Betero bwa e kaota taekan aei te Atua nakoina, ao e reitia ni kangai: “I taku naba nakoim: Boni Betero ngkoe, ao N na katea au ekaretia i aon te bwaa aei, ao e na aki tokanikai mataroan te Ruanimate i aon au ekaretia.” E nanonna Iesu bwa boni ngaia ae e na katea ana ekaretia ao e na aki naba tokanikai te Ruanimate i aoia kaaina ngkana a teimatoa ni kakaonimaki n aia tai ni maiu. E berita nakoni Betero ni kangai: “N na anganiko taiani kiing ibukin te Tautaeka n Uea ae bwaini karawa.”​—Mataio 16:18, 19.

E aki baireia Iesu bwa e na moanibwai Betero i buakoia abotoro, ao e aki naba riki bwa aan te ekaretia. Iesu bon te Bwaa are e na boni katea i aona ana ekaretia. (1 I-Korinto 3:11; I-Ebeto 2:20) Ma e na anganaki Betero taiani kiing aika tenua, are e na kauka iai te kawai ibukia botannaomata nako bwa a na rin n te Tautaeka n Uea ae bwaini karawa.

E na kabongana te moani kiing Betero ni Bentekota 33 C.E., ni kaotia iai bwa tera ae a riai ni karaoia I-Iutaia ake a rairi nanoia ao naake a rairaki nakon te Aro n Iutaia bwa a aonga ni kamaiuaki. E na kabongana te kauoua ni kiing ni karekea te anga nakoia I-Tamaria aika onimaki bwa a na kaaina naba ana Tautaeka n Uea te Atua. Imwina n 36 C.E., e na kabongana te katenua ni kiing ni karekea te anga nakoia Tientaire ake a aki korotobibiaki, n aroni Korenerio ao ake tabeman riki.​—Mwakuri 2:37, 38; 8:14-17; 10:44-48.

N te maroro aei, ao a tabeaianga ana abotoro ngke e tuangia taekani karawawataana ao matena are e nang kaitaraa i Ierutarem. E aki mataata Betero n are e na mangauti Iesu nakon te maiu i karawa, ngaia are e kaira Iesu ni kaokoroa ao e boaia ni kangai: “Te Uea, ke e kawakiniko mai iai te Atua, e na aki riki anne nakoim.” Ma e tannako Iesu ao e kaekaa Betero ni kangai: “Naako akuu, Tatan! Ko a riki bwa te bwai ni kabwakabwaka nakoiu, bwa tiaki ana iango te Atua am iango, ma bon te iango n aomata.”​—Mataio 16:22, 23.

E a weteiia ngkai aomata tabeman aika tiaki ana abotoro ao e a kabwarabwaraa nakoia bwa e aki bebete te riki bwa te tia rimwina. E taku: “Ngkana iai ae e kan rimwiu ao ke e kakeaa boni ngaia, ke e tabeka ana kai ni kammaraki ao ke e teimatoa n irai. Bwa ane e kani kawakina maiuna ao e na boni kabuaa, ma ane e kabuaa maiuna ibukiu ao ibukin te rongorongo ae raoiroi ao e na boni karekea.”​—Mareko 8:34, 35.

Eng, ngkana a kan akoaki taan rimwina irouna, a riai n ninikoria ao n anga boni ngaiia. E taku: “Bwa ane e maamaa n ririmwiu ma ni maamaa naba n au taeka i buakon te roro ae aki kakaonimaki nakon te Atua ma ni bubure aei, ao e na maamaa naba Natin te aomata ni butimwaeia, ngkana e a roko ma te mimitong mairoun Tamana ma anera aika itiaki.” (Mareko 8:38) Eng, ngkana e a roko Iesu, “e na angania ngkanne aomata nako booni mwin aia mwakuri.”​—Mataio 16:27.