Reireiara i Aon Akoaia Iruwa ao te Tataro

E mena te kaawa ae Betania n rabeen te Maunga ae Oriweta mai mainiku ae tao uoua te maire raroana mai Ierutarem. (Ioane 11:18) E nako iai Iesu ao n rin n aia auti taari aika uoman aika Mareta ao Maria. Bon raoraon Iesu naakai ma mwaaneia ae Rataro ao a rangi ni kukurei ni butimwaeia.

Bon te kakabwaia ni koaua ngkana e riki te Mesia bwa am iruwa. E ingainga Mareta ni katauraoa butimwaean Iesu, ngaia are e a rangi n tabetabe ni katauraoa te amwarake ae bane burengana. E tabe ni mwakuri Mareta ngke e tekateka tarina are Maria i rarikini waen Iesu ao n ongora irouna. Imwina riki ao e a taetae Mareta nakon Iesu ni kangai: “Te Uea, ko aki muti ngkai e katukai tariu n tii ngai bwa N na karaoi bwaai? Tuangnga bwa e na nakomai ni buokai.”​—Ruka 10:40.

N oneani mwin are e na tiriburea Maria, e a anga te reirei ni kairiri nakoni Mareta ibukin arona n tabeaianga ni bwaikoraki ao e taku: “Mareta, Mareta, ko raraoma ao ko katabeaiangako ni baika bati. Ma bon tii tabeua baika kainnanoaki ke bon tii teuana. E rinea te tibwanga ae raoiroi Maria, ao e na aki anaaki mairouna.” (Ruka 10:41, 42) Eng, e katerea Iesu bwa e aki kakawaki kabanean te tai ae bati ibukini katauraoan te amwarake ae bati. E a tau naba te amwarake ae tii teuana.

E raoiroi nanoni Mareta bwa e kan akoakoiia iruwa. Ma ibukin arona n tabeaianga n te marike, e a aki ongora te reirei ae kakawaki mairoun natin te Atua! E katereterea Iesu bwa e raoiroi te bwai ae e rineia Maria bwa e teimaan kabwaiana iai, ao e reke naba iai reireiara ni kabane ae ti na ururingnga.

N te tai teuana ao e a anga te reirei ae kaokoro Iesu ma bon titeboo kakawakia. E bubutiia te tia rimwina temanna ni kangai: “Te Uea, reireinira n tataro, n aron Ioane ngke e reireinia taan rimwina.” (Ruka 11:1) E a bon tia ni karaoa anne Iesu tao teuana ao te iterana te ririki n nako n ana Kabwarabwara i aon te Maunga. (Mataio 6:9-13) Ma tao e aki kaoti te tia rimwina aio n te tai anne, ngaia are e a manga taekin riki reirei aika kakawaki Iesu. E a anga ngkanne te kaikonaki ni katuruturua iai kakawakin te botumwaaka n tataro.

“Ngkana tao iai temanna iroumi ae iai raoraona, ao e kawaria n te nukanibong ao e kangai nakoina, ‘Nao, N na kabaeai n tenua te kariki, bwa e a tibwa roko naba ngkai raoraou temanna mani mwanangana ao akea au nikira nakoina.’ Ma e kaeka are i nanon te auti ni kangai, ‘Tai kakiriweai. E a roka te mataroa, ao I a matu ma natiu aika uarereke n te nne ni wene. I a aki kona n teirake ao n anganiko te bwai teuana.’ I tuangingkami, bwa e ngae ngkana e na aki teirake n anganna te bwai teuana ibukina ngkai raoraona, ma e na bon teirake n anganna te baere e kainnanoia ibukina bwa e nanomwaaka ni bubutii.”​—Ruka 11:5-8.

E aki nanonna Iesu bwa e aki kani kaekai bubutii Iehova n aron te rao arei. Ma e kaotia bwa ngkana e kaekai bubutii aika okioki te rao are e aki kan ibuobuoki, e na boni kaekai Tamara ae tatangira are i karawa aia bubutii ana toro aika kakaonimaki aika nako mai nanoia! E reitia riki Iesu ni kangai: “I taku nakoimi, teimatoa ni bubutii ao kam na anganaki, teimatoa n ukeuke ao kam na kunea, teimatoa ni karebwerebwe ao e na kaukaki nakoimi. Bwa ane e bubutii e na anganaki, ao ane e ukeuke e na kunea, ao ane e karebwerebwe e na kaukaki nakoina.”​—Ruka 11:9, 10.

E katuruturua ngkanne Iesu kakawakin te baere taekinna ni kabotauia taama aika aomata ni kangai: “Antai te karo i buakomi ae ngkana e bubutii natina te ika, ao e na anganna te naeta bwa oneani mwin te ika? Ke ngkana e bubutii te bunnimoa ao e na anganna te tikaobian? Mangaia ae e ngae ngke kam buakaka ma kam ataa te angania natimi bwaintangira aika raraoi, ao ai batira riki ngkanne nanon te Tama are i karawa ni kan anga te taamnei ae raoiroi nakoia akana butiia!” (Ruka 11:11-13) Ai boni karaunanora ae e na bon ongo iroura Tamara ao ni karekei baika ti kainnanoi!